7. хетусуттаван̣н̣ана̄

212. наттхи хету наттхи паччайоти еттха паччайоти хетувевачанамева. убхайена̄пи виджджама̄намева ка̄йадуччарита̄дӣнам̣ сам̣килесапаччайам̣, ка̄йасучарита̄дӣнан̃ча висуддхипаччайам̣ пат̣иккхипанти. наттхи баланти йамхи аттано бале патит̣т̣хита̄ име сатта̄ деваттампи ма̄раттампи брахматтампи са̄вакабодхимпи паччекабодхимпи саббан̃н̃утампи па̄пун̣анти, там̣ балам̣ пат̣иккхипанти. наттхи вӣрийантиа̄дӣни сабба̄ни ан̃н̃аман̃н̃авевачана̄нева. ‘‘идам̣ но вӣрийена, идам̣ пурисатха̄мена, идам̣ пурисапараккамена патта’’нти, евам̣ паваттавачанапат̣иккхепакаран̣авасена панета̄ни висум̣ а̄дийанти.

саббе сатта̄ти от̣т̣хагон̣агадрабха̄дайо анавасесе паригган̣ханти. саббе па̄н̣а̄ти екиндрийо па̄н̣о, двиндрийо па̄н̣отиа̄дивасена ваданти. саббе бхӯта̄ти ан̣д̣акосаваттхикосесу бхӯте сандха̄йа ваданти. саббе джӣва̄ти са̄лийавагодхума̄дайо сандха̄йа ваданти. тесу хи те вируханабха̄вена джӣвасан̃н̃ино. аваса̄ абала̄ авӣрийа̄ти тесам̣ аттано васо ва̄ балам̣ ва̄ вӣрийам̣ ва̄ наттхи. нийатисан̇гатибха̄вапарин̣ата̄ти еттха нийатӣти нийатата̄. сан̇гатӣти чханнам̣ абхиджа̄тӣнам̣ таттха таттха гаманам̣. бха̄воти сабха̄войева. евам̣ нийатийа̄ ча сан̇гатийа̄ ча бха̄вена ча парин̣ата̄ на̄наппака̄ратам̣ патта̄. йена хи йатха̄ бхавитаббам̣, со татхева бхавати. йена на бхавитаббам̣, со на бхаватӣти дассенти. чхасвева̄бхиджа̄тӣсӯти чхасу ева абхиджа̄тӣсу т̣хатва̄ сукхан̃ча дуккхан̃ча пат̣исам̣веденти, ан̃н̃а̄ сукхадуккхабхӯми наттхӣти дассенти.