2-4. етам̣мамасутта̄диван̣н̣ана̄

207-209. дит̣т̣хантиа̄дӣсу дит̣т̣хам̣ рӯпа̄йатанам̣. сутам̣ садда̄йатанам̣. мутам̣ гандха̄йатанам̣ раса̄йатанам̣ пхот̣т̣хабба̄йатанам̣. тан̃хи патва̄ гахетаббато мутанти ча вуттам̣. авасеса̄ни сатта̄йатана̄ни вин̃н̃а̄там̣ на̄ма. паттанти парийеситва̄ ва̄ апарийеситва̄ ва̄ паттам̣. парийеситанти паттам̣ ва̄ апаттам̣ ва̄ парийеситам̣. анувичаритам̣ манаса̄ти читтена анусан̃чаритам̣. локасмин̃хи парийеситва̄ паттампи аттхи, парийеситва̄ нопаттампи, апарийеситва̄ паттампи, апарийеситва̄ нопаттампи. таттха парийеситва̄ паттам̣ паттам̣ на̄ма, парийеситва̄ нопаттам̣ парийеситам̣ на̄ма. апарийеситва̄ паттан̃ча апарийеситва̄ нопаттан̃ча манаса̄нувичаритам̣ на̄ма. атха ва̄ парийеситва̄ паттампи апарийеситва̄ паттампи паттат̣т̣хена паттам̣ на̄ма, парийеситва̄ нопаттамева парийеситам̣ на̄ма, апарийеситва̄ нопаттам̣ манаса̄нувичаритам̣ на̄ма. саббам̣ ва̄ етам̣ манаса̄ анувичаритамева.