6. ассаджисуттаван̣н̣ана̄

88. чхат̣т̣хе кассапака̄ра̄мети кассапасет̣т̣хина̄ ка̄рите а̄ра̄ме. ка̄йасан̇кха̄рети асса̄сапасса̄се. со хи те чатуттхаджджха̄нена пассамбхитва̄ пассамбхитва̄ виха̄си. евам̣ хотӣти ида̄ни там̣ сама̄дхим̣ аппат̣илабхантасса евам̣ хоти. но часса̄хам̣ париха̄йа̄мӣти каччи ну кхо ахам̣ са̄санато на париха̄йа̄ми? тасса кира а̄ба̄дхадосена аппитаппита̄ сама̄патти париха̄йи, тасма̄ евам̣ чинтеси. сама̄дхиса̄рака̄ сама̄дхиса̄ман̃н̃а̄ти сама̄дхим̣йева са̄ран̃ча са̄ман̃н̃ан̃ча ман̃н̃анти. майхам̣ пана са̄сане на етам̣ са̄рам̣, випассана̄маггапхала̄ни са̄рам̣. со твам̣ сама̄дхито париха̄йанто касма̄ чинтеси ‘‘са̄санато париха̄йа̄мӣ’’ти. евам̣ тхерам̣ асса̄сетва̄ ида̄нисса типариват̣т̣ам̣ дхаммадесанам̣ а̄рабханто там̣ ким̣ ман̃н̃асӣтиа̄дима̄ха. атхасса типариват̣т̣адесана̄васа̄не арахаттам̣ паттасса сататавиха̄рам̣ дассенто со сукхам̣ че веданам̣ ведайатӣтиа̄дима̄ха. таттха анабхинандита̄ти паджа̄на̄тӣти сукхаведана̄йа та̄ва абхинандана̄ хоту, дуккхаведана̄йа катхам̣ хотӣти? дуккхам̣ патва̄ сукхам̣ паттхети, йадаггена сукхам̣ паттхети, тадаггена дуккхам̣ паттхетийева. сукхавипарин̣а̄мена хи дуккхам̣ а̄гатамева хотӣти евам̣ дуккхе абхинандана̄ ведитабба̄. сесам̣ пуббе вуттанайамева̄ти. чхат̣т̣хам̣.