7. анатталаккхан̣асуттаван̣н̣ана̄

59. саттаме пан̃чаваггийети ан̃н̃а̄си кон̣д̣ан̃н̃аттхера̄дике пан̃ча джане пура̄н̣упат̣т̣ха̄ке. а̄мантесӣти а̄са̄л̣хипун̣н̣амадивасе дхаммачаккаппаваттанато пат̣т̣ха̄йа ануккамена сота̄паттипхале патит̣т̣хите ‘‘ида̄ни несам̣ а̄саваккхайа̄йа дхаммам̣ десесса̄мӣ’’ти пан̃чамийам̣ паккхасса а̄мантеси. етадавоча̄ти етам̣ ‘‘рӯпам̣, бхиккхаве, анатта̄’’тиа̄динайаппаваттам̣ анатталаккхан̣асуттам̣ авоча. таттха анатта̄ти пуббе вуттехи чатӯхи ка̄ран̣ехи анатта̄. там̣ ким̣ ман̃н̃атха, бхиккхавети идам̣ касма̄ а̄раддхам̣? еттакена т̣ха̄нена анатталаккхан̣амева катхитам̣, на аниччадуккхалаккхан̣а̄ни, ида̄ни та̄ни дассетва̄ самодха̄нетва̄ тӣн̣ипи лаккхан̣а̄ни дассетум̣ идама̄раддханти ведитаббам̣. тасма̄ти йасма̄ име пан̃чаккхандха̄ аничча̄ дуккха̄ анатта̄, тасма̄. йам̣кин̃чи рӯпантиа̄дӣсу виттха̄ракатха̄ висуддхимагге пан̃н̃а̄бха̄вана̄дхика̄ре кхандханиддесе вутта̄ва. сесам̣ саббаттха вутта̄нуса̄ренева ведитаббам̣. имасмим̣ пана сутте анатталаккхан̣амева катхитанти. саттамам̣.