5. саттат̣т̣ха̄насуттаван̣н̣ана̄

57. пан̃чаме саттат̣т̣ха̄накусалоти саттасу ока̄сесу чхеко. вуситава̄ти вуситава̄со. уттамапурисоти сет̣т̣хапурисо. сесаметтха вуттанайенева ведитаббам̣. идам̣ пана суттам̣ уссаданандийан̃чева палобханӣйан̃ча̄ти ведитаббам̣. йатха̄ хи ра̄джа̄ виджитасан̇га̄мо сан̇га̄ме виджайино йодхе уччат̣т̣ха̄не т̣хапетва̄ тесам̣ сакка̄рам̣ кароти. ким̣ ка̄ран̣а̄? етесам̣ сакка̄рам̣ дисва̄ сеса̄пи сӯра̄ бхавитум̣ ман̃н̃иссантӣти, евамева бхагава̄ аппамеййам̣ ка̄лам̣ па̄рамийо пӯретва̄ маха̄бодхиман̣д̣е килесама̄равиджайам̣ катва̄ саббан̃н̃утам̣ патто са̄ваттхийам̣ джетаванамаха̄виха̄ре нисӣдитва̄ имам̣ суттам̣ десенто кхӣн̣а̄саве уккхипитва̄ тхомеси ван̣н̣еси. ким̣ ка̄ран̣а̄? евам̣ авасеса̄ секкхапуггала̄ арахаттапхалам̣ паттаббам̣ ман̃н̃иссантӣти. еваметам̣ суттам̣ кхӣн̣а̄сава̄нам̣ уккхипитва̄ пасам̣ситатта̄ уссаданандийам̣, секкха̄нам̣ палобхитатта̄ палобханӣйанти ведитаббам̣.

евам̣ кхо, бхиккхаве, бхиккху саттат̣т̣ха̄накусало хотӣти етта̄вата̄ четтха маггапхалапаччавеккхан̣авасена десанам̣ нит̣т̣хапетва̄пи пуна катхан̃ча, бхиккхаве, бхиккху тивидхӯпапариккхӣ хотӣти идам̣ ‘‘кхӣн̣а̄саво йасмим̣ а̄рамман̣е сататавиха̄рена вихарати, там̣ сатто ва̄ пуггало ва̄ на хоти, дха̄туа̄диматтамева пана хотӣ’’ти евам̣ кхӣн̣а̄савасса сататавиха̄ран̃ча, ‘‘имесу дхаммесу каммам̣ катва̄ айам̣ а̄гато’’ти а̄гаманӣйапат̣ипадан̃ча дассетум̣ вуттам̣. таттха дха̄тусо упапариккхатӣти дха̄тусабха̄вена пассати олокети. сесапададвайепи есева найо. пан̃чамам̣.