10. нируттипатхасуттаван̣н̣ана̄

62. дасаме нируттийова нируттипатха̄, атха ва̄ нируттийо ча та̄ нируттивасена вин̃н̃а̄табба̄нам̣ аттха̄нам̣ патхатта̄ патха̄ ча̄ти нируттипатха̄. сесапададвайепи есева найо. тӣн̣ипи чета̄ни ан̃н̃аман̃н̃авевачана̄нева̄ти ведитабба̄ни. асам̣кин̣н̣а̄ти авиджахита̄, ‘‘ко имехи аттхо’’ти ватва̄ ачхад̣д̣ита̄. асам̣кин̣н̣апубба̄ти атӣтепи на джахитапубба̄. на сам̣кӣйантӣти етарахипи ‘‘киметехӣ’’ти на чхад̣д̣ӣйанти. на сам̣кӣйиссантӣти ана̄гатепи на чхад̣д̣ӣйиссанти. аппат̣икут̣т̣ха̄ти аппат̣иба̄хита̄. атӣтанти аттано сабха̄вам̣ бхан̇гамева ва̄ атиккантам̣. нируддханти десантарам̣ асан̇камитва̄ таттхева нируддхам̣ вӯпасантам̣. випарин̣атанти випарин̣а̄мам̣ гатам̣ нат̣т̣хам̣. аджа̄танти ануппаннам̣. апа̄тубхӯтанти апа̄кат̣ӣбхӯтам̣.

уккала̄ти уккаладжанападава̄сино. вассабхан̃н̃а̄ти вассо ча бхан̃н̃о ча. двепи хи те мӯладит̣т̣хигатика̄. ахетукава̄да̄тиа̄дӣсу ‘‘наттхи хету наттхи паччайо’’ти гахитатта̄ ахетукава̄да̄. ‘‘карото на карӣйати па̄па’’нти гахитатта̄ акирийава̄да̄. ‘‘наттхи динна’’нтиа̄дигахан̣ато наттхикава̄да̄. таттха име две джана̄, тиссо дит̣т̣хийо, ким̣ екекасса дийад̣д̣ха̄ хотӣти? на татха̄, йатха̄ пана еко бхиккху пат̣ипа̄т̣ийа̄ чатта̄рипи джха̄на̄ни ниббаттети, еваметтха екеко тиссопи дит̣т̣хийо ниббаттесӣти ведитаббо. ‘‘наттхи хету наттхи паччайо’’ти пунаппунам̣ а̄ваджджентасса а̄харантасса абхинандантасса асса̄дентасса маггадассанам̣ вийа хоти. со миччхаттанийа̄мам̣ оккамати, со екантака̄л̣акоти вуччати. йатха̄ пана ахетукадит̣т̣хийам̣, евам̣ ‘‘карото на карӣйати па̄пам̣, наттхи динна’’нти имесупи т̣ха̄несу миччхаттанийа̄мам̣ оккамати.

на гарахитаббам̣ наппат̣иккоситаббам̣ аман̃н̃им̣сӯти еттха ‘‘йадетам̣ атӣтам̣ на̄ма, найидам̣ атӣтам̣, идамасса ана̄гатам̣ ва̄ паччуппаннам̣ ва̄’’ти ваданто гарахати на̄ма. таттха досам̣ дассетва̄ ‘‘ким̣ имина̄ гарахитена̄’’ти? ваданто пат̣иккосати на̄ма. име пана нируттипатхе тепи аччантака̄л̣ака̄ дит̣т̣хигатика̄ на гарахитаббе на пат̣иккоситаббе ман̃н̃им̣су. атӣтам̣ пана атӣтамева, ана̄гатам̣ ана̄гатамева, паччуппаннам̣ паччуппаннамева катхайим̣су. нинда̄гхат̣т̣анабйа̄росаупа̄рамбхабхайа̄ти вин̃н̃ӯнам̣ сантика̄ нинда̄бхайена ча гхат̣т̣анабхайена ча доса̄ропанабхайена ча упа̄рамбхабхайена ча. ити имасмим̣ сутте чатубхӯмикакхандха̄нам̣ пан̣н̣атти катхита̄ти. дасамам̣.

упайавагго чхат̣т̣хо.