5. саманупассана̄суттаван̣н̣ана̄

47. пан̃чаме пан̃чупа̄да̄наккхандхе саманупассанти етесам̣ ва̄ ан̃н̃атаранти парипун̣н̣ага̄хавасена пан̃чаккхандхе саманупассанти, апарипун̣н̣ага̄хавасена етесам̣ ан̃н̃атарам̣. ити айан̃чева саманупассана̄ти ити айан̃ча дит̣т̣хисаманупассана̄. асмӣти часса авигатам̣ хотӣти йасса айам̣ саманупассана̄ аттхи, тасмим̣ асмӣти тан̣ха̄ма̄надит̣т̣хисан̇кха̄там̣ папан̃чаттайам̣ авигатамева хоти. пан̃чаннам̣ индрийа̄нам̣ авакканти хотӣти тасмим̣ килесаджа̄те сати каммакилесапаччайа̄нам̣ пан̃чаннам̣ индрийа̄нам̣ ниббатти хоти.

аттхи, бхиккхаве, маноти идам̣ каммаманам̣ сандха̄йа вуттам̣. дхамма̄ти а̄рамман̣ам̣. авиджджа̄дха̄тӯти джаванаккхан̣е авиджджа̄. авиджджа̄сампхассаджена̄ти авиджджа̄сампайуттапхассато джа̄тена. апича маноти бхаван̇гаккхан̣е випа̄каманодха̄ту, а̄ваджджанаккхан̣е кирийаманодха̄ту. дхамма̄дайо вуттаппака̄ра̄ва. асмӣтиписса хотӣти тан̣ха̄ма̄надит̣т̣хивасена асмӣти евамписса хоти. ито паресу айамахамасмӣти рӯпа̄дӣсу кин̃чидева дхаммам̣ гахетва̄ ‘‘айам̣ ахамасмӣ’’ти аттадит̣т̣хивасена вуттам̣. бхависсанти сассатадит̣т̣хивасена. на бхависсанти уччхедадит̣т̣хивасена. рӯпӣ бхависсантиа̄дӣни сабба̄ни сассатамева бхаджанти. атхеттха̄ти атха тенева̄ка̄рена т̣хитесу етесу индрийесу. авиджджа̄ пахӣйатӣти чатӯсу саччесу ан̃н̃а̄н̣абхӯта̄ авиджджа̄ пахӣйати. виджджа̄ уппаджджатӣти арахаттамаггавиджджа̄ уппаджджати. еваметтха асмӣти тан̣ха̄ма̄надит̣т̣хийо. каммасса пан̃чаннан̃ча индрийа̄нам̣ антаре еко сандхи, випа̄каманам̣ пан̃чиндрийапаккхикам̣ катва̄ пан̃чаннан̃ча индрийа̄нам̣ каммасса ча антаре еко сандхӣти. ити тайо папан̃ча̄ атӣто аддха̄, индрийа̄дӣни паччуппанно аддха̄, таттха каммаманам̣ а̄дим̣ катва̄ ана̄гатасса паччайо дасситоти. пан̃чамам̣.