1. аттадӣпасуттаван̣н̣ана̄

43. аттадӣпаваггасса пат̣хаме аттадӣпа̄ти атта̄нам̣ дӣпам̣ та̄н̣ам̣ лен̣ам̣ гатим̣ пара̄йан̣ам̣ патит̣т̣хам̣ катва̄ вихаратха̄ти аттхо. аттасаран̣а̄ти идам̣ тассева вевачанам̣. анан̃н̃асаран̣а̄ти идам̣ ан̃н̃асса саран̣апат̣иккхепавачанам̣. на хи ан̃н̃о ан̃н̃асса саран̣ам̣ хоти ан̃н̃асса ва̄йа̄мена ан̃н̃асса асиджджханато, вуттампи четам̣ –

‘‘атта̄ хи аттано на̄тхо,

ко хи на̄тхо паро сийа̄’’ти. (дха. па. 160);

тена̄ха ‘‘анан̃н̃асаран̣а̄’’ти. ко панеттха атта̄ на̄ма? локийалокуттаро дхаммо. тенева̄ха – ‘‘дхаммадӣпа̄ дхаммасаран̣а̄ анан̃н̃асаран̣а̄’’ти. йонӣти ка̄ран̣ам̣ – ‘‘йони хеса̄, бхӯмиджа, пхаласса адхигама̄йа̄’’тиа̄дӣсу (ма. ни. 3.227) вийа. ким̣пахотика̄ти ким̣пабхутика̄, куто пабхавантӣти аттхо? рӯпасса твева̄ти идам̣ тесам̣йева сока̄дӣнам̣ паха̄надассанаттхам̣ а̄раддхам̣. на паритассатӣти на ган̣ха̄ти на гахати. тадан̇ганиббутоти тена випассанан̇гена килеса̄нам̣ ниббутатта̄ тадан̇ганиббуто. имасмим̣ сутте випассана̄ва катхита̄. пат̣хамам̣.