7. упа̄да̄паритассана̄суттаван̣н̣ана̄

7. саттаме упа̄да̄паритассананти гахан̣ена уппаннам̣ паритассанам̣. анупа̄да̄апаритассананти аггахан̣ена апаритассанам̣. рӯпавипарин̣а̄ма̄нупариваттивин̃н̃а̄н̣ам̣ хотӣти ‘‘мама рӯпам̣ випарин̣ата’’нти ва̄ ‘‘аху вата метам̣, да̄ни вата ме наттхӣ’’ти ва̄ а̄дина̄ найена каммавин̃н̃а̄н̣ам̣ рӯпасса бхеда̄нупариватти хоти. випарин̣а̄ма̄нупариваттиджа̄ти випарин̣а̄масса анупариваттито випарин̣а̄ма̄рамман̣ачиттато джа̄та̄. паритассана̄ дхаммасамуппа̄да̄ти тан̣ха̄паритассана̄ ча акусаладхаммасамуппа̄да̄ ча. читтанти кусалачиттам̣. парийа̄да̄йа тит̣т̣хантӣти парийа̄дийитва̄ тит̣т̣ханти. утта̄сава̄ти саутта̄со. вигха̄тава̄ти савигха̄то садуккхо. апеккхава̄ти са̄лайо. упа̄да̄йа ча паритассатӣти ган̣хитва̄ паритассако на̄ма хоти. на рӯпавипарин̣а̄ма̄нупариваттӣти кхӣн̣а̄савасса каммавин̃н̃а̄н̣амева наттхи, тасма̄ рӯпабхеда̄нупариватти на хотӣти ваттум̣ ват̣т̣ати. саттамам̣.