9. опаммасам̣йуттам̣

1. кӯт̣асуттаван̣н̣ана̄

223. опаммасам̣йуттасса пат̣хаме кӯт̣ам̣ гаччхантӣти кӯт̣ан̇гама̄. кӯт̣ам̣ самосарантӣти кӯт̣асамосаран̣а̄. кӯт̣асамуггха̄та̄ти кӯт̣асса самуггха̄тена. авиджджа̄самуггха̄та̄ти арахаттамаггена авиджджа̄йа самуггха̄тена. аппаматта̄ти сатийа̄ авиппава̄се т̣хита̄ хутва̄. пат̣хамам̣.

2. накхасикхасуттаван̣н̣ана̄

224. дутийе мануссесу пачча̄джа̄йантӣти йе мануссалокато чута̄ мануссесу джа̄йанти, те евам̣ аппака̄ти адхиппа̄йо. ан̃н̃атра мануссехӣти йе пана мануссалокато чута̄ т̣хапетва̄ мануссалокам̣ чатӯсу апа̄йесу пачча̄джа̄йанти, те маха̄патхавийам̣ пам̣су вийа бахутара̄. имасмин̃ча сутте дева̄пи мануссехева сан̇гахита̄. тасма̄ йатха̄ мануссесу джа̄йанта̄ аппака̄, евам̣ девесупӣти ведитабба̄. дутийам̣.

3. куласуттаван̣н̣ана̄

225. татийе суппадхам̣сийа̄нӣти сувихет̣хийа̄ни. кумбхаттхенакехӣти йе парагхарам̣ пависитва̄ дӣпа̄локена олокетва̄ парабхан̣д̣ам̣ харитука̄ма̄ гхат̣е дӣпам̣ катва̄ пависанти, те кумбхаттхенака̄ на̄ма, техи кумбхаттхенакехи. суппадхам̣сийо хоти амануссехӣти метта̄бха̄вана̄рахитам̣ пам̣суписа̄чака̄ видхам̣сайанти, пагева ул̣а̄ра̄ аманусса̄. бха̄вита̄ти вад̣д̣хита̄. бахулӣката̄ти пунаппунам̣ ката̄. йа̄нӣката̄ти йуттайа̄нам̣ вийа ката̄. ваттхуката̄ти патит̣т̣ха̄нат̣т̣хена ваттху вийа ката̄. анут̣т̣хита̄ти адхит̣т̣хита̄. паричита̄ти самантато чита̄ сувад̣д̣хита̄. сусама̄раддха̄ти читтена сут̣т̣ху сама̄раддха̄. татийам̣.

4. оккха̄суттаван̣н̣ана̄

226. чатуттхе оккха̄сатанти маха̄мукхауккхалӣнам̣ сатам̣. да̄нам̣ дадеййа̄ти пан̣ӣтабходжанабхарита̄нам̣ маха̄уккхалӣнам̣ сатам̣ да̄нам̣ дадеййа. ‘‘укка̄сата’’нтипи па̄т̣хо, тасса дан̣д̣адӣпика̄сатанти аттхо. ека̄йа пана дӣпика̄йа йаттаке т̣ха̄не а̄локо хоти, тато сатагун̣ам̣ т̣ха̄нам̣ саттахи ратанехи пӯретва̄ да̄нам̣ дадеййа̄ти аттхо. гаддуханаматтанти годуханаматтам̣, га̄вийа̄ екава̄рам̣ аггатхана̄кад̣д̣ханаматтанти аттхо. гандхаӯханаматтам̣ ва̄, двӣхи ан̇гулӣхи гандхапин̣д̣ам̣ гахетва̄ екава̄рам̣ гха̄йанаматтанти аттхо. еттакампи хи ка̄лам̣ йо пана габбхапаривен̣авиха̄рӯпача̄ра париччхедена ва̄ чаккава̄л̣апариччхедена ва̄ апарима̄н̣а̄су локадха̄тӯсу ва̄ саббасаттесу хитапхаран̣ам̣ меттачиттам̣ бха̄ветум̣ саккоти, идам̣ тато екадивасам̣ тиккхаттум̣ диннада̄нато махаппхалатарам̣. чатуттхам̣.

5. саттисуттаван̣н̣ана̄

227. пан̃чаме пат̣илен̣исса̄мӣтиа̄дӣсу агге пахаритва̄ каппа̄сават̣т̣им̣ вийа на̄менто ниййа̄сават̣т̣им̣ вийа ча екато катва̄ аллийа̄пенто пат̣илен̣ети на̄ма. маджджхе пахаритва̄ на̄метва̄ дха̄ра̄йа ва̄ пахаритва̄ двепи дха̄ра̄ екато аллийа̄пенто пат̣икот̣т̣ети на̄ма. каппа̄сават̣т̣анакаран̣ӣйам̣ вийа паваттенто чирака̄лам̣ сам̣веллитакилан̃джам̣ паса̄ретва̄ пуна сам̣велленто вийа ча пат̣иват̣т̣ети на̄ма. пан̃чамам̣.

6. дхануггахасуттаван̣н̣ана̄

228. чхат̣т̣хе дал̣хадхамма̄ дхануггаха̄ти дал̣хадхануно исса̄са̄. дал̣хадхану на̄ма двисахассатха̄мам̣ вуччати, двисахассатха̄мам̣ на̄ма йасса а̄ропитасса джийа̄баддхо лохасӣса̄дӣнам̣ бха̄ро дан̣д̣е гахетва̄ йа̄ва кан̣д̣аппама̄н̣а̄ уккхиттасса патхавито муччати. сусиккхита̄ти дасадва̄дасавасса̄ни а̄чарийакуле уггахитасиппа̄. катахаттха̄ти йо сиппамева угган̣ха̄ти, со катахаттхо на хоти, име пана катахаттха̄ чин̣н̣авасӣбха̄ва̄. катӯпа̄сана̄ти ра̄джакула̄дӣсу дасситасиппа̄.

тасса пурисасса джавоти еварӯпо ан̃н̃о пурисо на̄ма на бхӯтапуббо, бодхисаттассева пана джаванахам̣сака̄ло на̄ма а̄си. тада̄ бодхисатто чатта̄ри кан̣д̣а̄ни а̄хари. тада̄ кирасса канит̣т̣хабха̄таро ‘‘майам̣, бха̄тика, сӯрийена саддхим̣ джависса̄ма̄’’ти а̄рочесум̣. бодхисатто а̄ха – ‘‘сӯрийо сӣгхаджаво, на саккхиссатха тумхе тена саддхим̣ джавиту’’нти. те дутийам̣ татийампи татхева ватва̄ екадивасам̣ ‘‘гаччха̄ма̄’’ти йугандхарапаббатам̣ а̄рухитва̄ нисӣдим̣су. бодхисатто ‘‘кахам̣ ме бха̄таро’’ти? пуччхитва̄, ‘‘сӯрийена саддхим̣ джавитум̣ гата̄’’ти вутте, ‘‘винассиссанти тапассино’’ти те анукампама̄но сайампи гантва̄ тесам̣ сантике нисӣди. атха сӯрийе уггаччханте двепи бха̄таро сӯрийена саддхим̣йева а̄ка̄сам̣ паккханта̄, бодхисаттопи техи саддхим̣йева паккханто. тесу екасса апаттейева антарабхаттасамайе паккхантаресу агги ут̣т̣хахи, со бха̄тарам̣ паккоситва̄ ‘‘на саккомӣ’’ти а̄ха. таменам̣ бодхисатто ‘‘ма̄ бха̄йӣ’’ти самасса̄сетва̄ паккхапан̃джарена паливет̣хетва̄ даратхам̣ винодетва̄ ‘‘гаччха̄’’ти песеси.

дутийо йа̄ва антарабхатта̄ джавитва̄ паккхантаресу аггимхи ут̣т̣хахите татхева̄ха. тампи со татхева катва̄ ‘‘гаччха̄’’ти песеси. сайам̣ пана йа̄ва маджджханхика̄ джавитва̄, ‘‘ете ба̄ла̄ти майа̄пи ба̄лена на бхавитабба’’нти ниваттитва̄ – ‘‘адит̣т̣хасаха̄йакам̣ ба̄ра̄н̣асира̄джам̣ пассисса̄мӣ’’ти ба̄ра̄н̣асим̣ агама̄си. тасмим̣ нагараматтхаке париббхаманте два̄дасайоджанам̣ нагарам̣ паттакат̣а̄хена оттхат̣апатто вийа ахоси. атха париббхамантасса париббхамантасса таттха таттха чхидда̄ни пан̃н̃а̄йим̣су. сайампи анекахам̣сасахассасадисо пан̃н̃а̄йи. со вегам̣ пат̣исам̣харитва̄ ра̄джагеха̄бхимукхо ахоси. ра̄джа̄ олокетва̄ – ‘‘а̄гато кира ме пийасаха̄йо джаванахам̣со’’ти ва̄тапа̄нам̣ виваритва̄ ратанапӣт̣хам̣ пан̃н̃а̄петва̄ олокенто ат̣т̣ха̄си. бодхисатто ратанапӣт̣хе нисӣди.

атхасса ра̄джа̄ сахассапа̄кена телена паккхантара̄ни маккхетва̄, мадхула̄дже чева мадхурапа̄накан̃ча ада̄си. тато нам̣ катапарибхогам̣ ‘‘самма, кахам̣ агама̄сӣ’’ти? пуччхи. со там̣ паваттим̣ а̄рочетва̄ ‘‘атха̄хам̣, маха̄ра̄джа, йа̄ва маджджханхика̄ джавитва̄ – ‘наттхи джавитена аттхо’ти ниватто’’ти а̄чиккхи. атха ра̄джа̄ а̄ха – ‘‘ахам̣, са̄ми, тумха̄кам̣ сӯрийена саддхим̣ джаванавегам̣ пасситука̄мо’’ти. дуккарам̣, маха̄ра̄джа, на сакка̄ тайа̄ пасситунти. тена хи, са̄ми, сариккхакаматтампи дассехӣти. а̄ма, маха̄ра̄джа, дхануггахе саннипа̄техӣти. ра̄джа̄ саннипа̄теси. хам̣со тато чатта̄ро гахетва̄ нагарамаджджхе торан̣ам̣ ка̄ретва̄ аттано гӣва̄йа гхан̣д̣ам̣ пил̣андха̄петва̄ торан̣асса упари нисӣдитва̄ – ‘‘чатта̄ро джана̄ торан̣ам̣ нисса̄йа чатудиса̄бхимукха̄ екекам̣ кан̣д̣ам̣ кхипантӯ’’ти ватва̄, сайам̣ пат̣хамакан̣д̣енева саддхим̣ уппатитва̄, там̣ кан̣д̣ам̣ аггахетва̄ва, даккхин̣а̄бхимукхам̣ гатакан̣д̣ам̣ дхануто ратанаматта̄пагатам̣ ган̣хи. дутийам̣ двиратанаматта̄пагатам̣, татийам̣ тиратанаматта̄пагатам̣, чатуттхам̣ бхӯмим̣ аппаттамева ган̣хи. атха нам̣ чатта̄ри кан̣д̣а̄ни гахетва̄ торан̣е нисиннака̄лейева аддасам̣су. со ра̄джа̄нам̣ а̄ха – ‘‘пасса, маха̄ра̄джа, евам̣сӣгхо амха̄кам̣ джаво’’ти. евам̣ бодхисаттенева джаванахам̣сака̄ле та̄ни кан̣д̣а̄ни а̄харита̄нӣти ведитабба̄ни.

пурато дха̄вантӣти аггато джаванти. на панета̄ саббака̄лам̣ пуратова хонти, када̄чи пурато, када̄чи паччхато хонти. а̄ка̄сат̣т̣хакавима̄несу хи уййа̄на̄нипи хонти поккхаран̣ийопи, та̄ таттха наха̄йанти, удакакӣл̣ам̣ кӣл̣ама̄на̄ паччхатопи хонти, вегена пана гантва̄ пуна пуратова дха̄ванти. а̄йусан̇кха̄ра̄ти рӯпаджӣвитиндрийам̣ сандха̄йа вуттам̣. тан̃хи тато сӣгхатарам̣ кхӣйати. арӯпадхамма̄нам̣ пана бхедо на сакка̄ пан̃н̃а̄петум̣. чхат̣т̣хам̣.

7. а̄н̣исуттаван̣н̣ана̄

229. саттаме даса̄раха̄нанти евам̣на̄мака̄нам̣ кхаттийа̄нам̣. те кира сатато дасабха̄гам̣ ган̣хим̣су, тасма̄ ‘‘даса̄раха̄’’ти пан̃н̃а̄йим̣су. а̄накоти евам̣ладдхана̄мо мудин̇го. химаванте кира маха̄кул̣ӣрадахо ахоси. таттха маханто кул̣ӣро отин̣н̣отин̣н̣ам̣ хаттхим̣ кха̄дати. атха хаттхӣ упаддута̄ екам̣ карен̣ум̣ саккарим̣су ‘‘имисса̄ путтам̣ нисса̄йа амха̄кам̣ соттхи бхависсатӣ’’ти. са̄пи махесаккхам̣ путтам̣ виджа̄йи. те тампи саккарим̣су. со вуддхиппатто ма̄тарам̣ пуччхи, ‘‘касма̄ мам̣ ете саккаронтӣ’’ти? са̄ там̣ паваттима̄чиккхи. со ‘‘ким̣ майхам̣ кул̣ӣро пахоти? етха гаччха̄ма̄’’ти маха̄хаттхипарива̄ро таттха гантва̄ пат̣хамамева отари. кул̣ӣро удакасадденева а̄гантва̄ там̣ аггахеси. маханто кул̣ӣрасса ал̣о, со там̣ ито ва̄ етто ва̄ ча̄летум̣ асакконто мукхе сон̣д̣ам̣ паккхипитва̄ вирави. хаттхино ‘‘йам̣нисса̄йа майам̣ ‘соттхи бхависсатӣ’ти аман̃н̃имха̄, со пат̣хаматарам̣ гахито’’ти тато тато пала̄йим̣су.

атхасса ма̄та̄ авидӯре т̣хатва̄ ‘‘майам̣ тхалана̄га̄, тумхе удакана̄га̄ на̄ма, на̄гехи на̄го на вихет̣хетаббо’’ти кул̣ӣрам̣ пийавачанена ватва̄ имам̣ га̄тхама̄ха –

‘‘йе кул̣ӣра̄ самуддасмим̣, ган̇га̄йа йамуна̄йа ча;

тесам̣ твам̣ ва̄риджо сет̣т̣хо, мун̃ча родантийа̄ паджа’’нти.

ма̄туга̄масаддо на̄ма пурисе кхобхетва̄ тит̣т̣хати, тасма̄ со гахан̣ам̣ ситхиламака̄си. хаттхипото вегена убхо па̄де уккхипитва̄ там̣ пит̣т̣хийам̣ акками. саха аккамана̄ пит̣т̣хи маттикабха̄джанам̣ вийа бхиджджи. атха нам̣ дантехи виджджхитва̄ уккхипитва̄ тхале чхад̣д̣етва̄ тут̣т̣харавам̣ рави. атха нам̣ хаттхӣ ито чито ча а̄гантва̄ маддим̣су. тасса еко ал̣о пат̣иккамитва̄ пати, там̣ сакко девара̄джа̄ гахетва̄ гато.

итаро пана ал̣о ва̄та̄тапена суккхитва̄ паккала̄кха̄расаван̣н̣о ахоси, со деве вут̣т̣хе удакогхена вуйханто дасабха̄тика̄нам̣ ра̄джӯнам̣ упарисоте джа̄лам̣ паса̄ра̄петва̄ ган̇га̄йа кӣл̣анта̄нам̣ а̄гантва̄ джа̄ле лагги. те кӣл̣а̄парийоса̄не джа̄ламхи уккхипийама̄не там̣ дисва̄ пуччхим̣су ‘‘ким̣ ета’’нти? ‘‘кул̣ӣраал̣о са̄мӣ’’ти. ‘‘на сакка̄ еса а̄бхаран̣аттха̄йа упанетум̣, парийонандха̄петва̄ бхерим̣ карисса̄ма̄’’ти? парийонандха̄петва̄ пахарим̣су. саддо два̄дасайоджанам̣ нагарам̣ аваттхари. тато а̄хам̣су – ‘‘на сакка̄ идам̣ дивасе дивасе ва̄детум̣, чхан̣адивасаттха̄йа ман̇галабхерӣ хотӯ’’ти ман̇галабхерим̣ акам̣су. тасмим̣ ва̄дите маха̄джано анха̄йитва̄ апил̣андхитва̄ хаттхийа̄на̄дӣни а̄руйха сӣгхам̣ саннипатанти. ити маха̄джанам̣ паккоситва̄ вийа а̄нетӣти а̄нако твевасса на̄мам̣ ахоси.

ан̃н̃ам̣ а̄н̣им̣ одахим̣сӯти ан̃н̃ам̣ суван̣н̣араджата̄димайам̣ а̄н̣им̣ гхат̣айим̣су. а̄н̣исан̇гха̄т̣ова авасиссӣти суван̣н̣а̄димайа̄нам̣ а̄н̣ӣнам̣ сан̇гха̄т̣аматтамева авасесам̣ ахоси. атхасса два̄дасайоджанаппама̄н̣о саддо антоса̄ла̄йампи дуккхена суййиттха.

гамбхӣра̄ти па̄л̣ивасена гамбхӣра̄ салласуттасадиса̄. гамбхӣраттха̄ти аттхавасена гамбхӣра̄ маха̄ведалласуттасадиса̄ (ма. ни. 1.449 а̄дайо). локуттара̄ти локуттарааттхадӣпака̄. сун̃н̃атаппат̣исам̣йутта̄ти саттасун̃н̃атадхаммаматтамева пака̄сака̄ сам̣кхиттасам̣йуттасадиса̄. уггахетаббам̣ парийа̄пун̣итаббанти уггахетаббе ча парийа̄пун̣итаббе ча. кавиката̄ти кавӣхи ката̄. итарам̣ тассева вевачанам̣. читтаккхара̄ти вичитрааккхара̄. итарам̣ тассева вевачанам̣. ба̄хирака̄ти са̄санато бахибхӯта̄. са̄вакабха̄сита̄ти тесам̣ тесам̣ са̄вакехи бха̄сита̄. суссӯсиссантӣти аккхарачиттата̄йа чева саванасампаттийа̄ ча аттамана̄ хутва̄ са̄ман̣ерадахарабхиккхума̄туга̄мамаха̄гахапатика̄дайо ‘‘еса дхаммакатхико’’ти саннипатитва̄ сотука̄ма̄ бхависсанти. тасма̄ти йасма̄ татха̄гатабха̄сита̄ суттанта̄ ануггайхама̄на̄ антарадха̄йанти, тасма̄. саттамам̣.

8. калин̇гарасуттаван̣н̣ана̄

230. ат̣т̣хаме калин̇гарӯпадха̄на̄ти калин̇гарагхат̣икам̣ сӣсӯпадха̄нан̃чева па̄дӯпадха̄нан̃ча катва̄. аппаматта̄ти сиппуггахан̣е аппаматта̄. а̄та̄пиноти ут̣т̣ха̄навӣрийа̄та̄пена йутта̄. упа̄санасминти сиппа̄нам̣ абхийоге а̄чарийа̄нан̃ча пайирупа̄сане. те кира тада̄ па̄това ут̣т̣ха̄йа сиппаса̄лам̣ гаччханти, таттха сиппам̣ уггахетва̄ саджджха̄йа̄дӣхи абхийогам̣ катва̄ мукхам̣ дховитва̄ йа̄гупа̄на̄йа гаччханти. йа̄гум̣ пивитва̄ пуна сиппаса̄лам̣ гантва̄ сиппам̣ ган̣хитва̄ саджджха̄йам̣ каронта̄ па̄тара̄са̄йа гаччханти. катапа̄тара̄са̄ сама̄на̄ ‘‘ма̄ пама̄дена чирам̣ ниддоккаманам̣ ахосӣ’’ти кхадирагхат̣ика̄су сӣсе ча па̄де ча упадахитва̄ тхокам̣ нипаджджитва̄ пуна сиппаса̄лам̣ гантва̄ сиппам̣ гахетва̄ саджджха̄йанти. са̄йам̣ саджджха̄йам̣ каронта̄ ча гехам̣ гантва̄ бхуттаса̄йама̄са̄ пат̣хамайа̄мам̣ саджджха̄йам̣ катва̄ сайанака̄ле татхева калин̇гарам̣ упадха̄нам̣ катва̄ сайанти. евам̣ те аккхан̣аведхино ва̄лаведхино ча ахесум̣. идам̣ сандха̄йетам̣ вуттам̣.

ота̄ранти виварам̣. а̄рамман̣анти паччайам̣. падха̄насминти падха̄набхӯмийам̣ вӣрийам̣ курума̄на̄. пат̣хамабодхийам̣ кира бхиккхӯ бхаттакиччам̣ катва̄ва каммат̣т̣ха̄нам̣ манаси каронти. тесам̣ манасикаронта̄нам̣йева сӯрийо аттхам̣ гаччхати. те нха̄йитва̄ пуна чан̇камам̣ отаритва̄ пат̣хамайа̄мам̣ чан̇каманти. тато ‘‘ма̄ чирам̣ нидда̄йимха̄’’ти сарӣрадаратхавиноданаттхам̣ нипаджджанта̄ кат̣т̣хакхан̣д̣ам̣ упадахитва̄ нипаджджанти, те пуна паччхимайа̄ме вут̣т̣ха̄йа чан̇камам̣ отаранти. те сандха̄йа идам̣ вуттам̣. айампи дӣпо тин̣н̣ам̣ ра̄джӯнам̣ ка̄ле екагхан̣д̣иниггхосо екападха̄набхӯми ахоси. на̄на̄мукхе пахат̣агхан̣д̣и пиличчхикол̣ийам̣ осарати, калйа̄н̣ийам̣ пахат̣агхан̣д̣и на̄гадӣпе осарати. ‘‘айам̣ бхиккху путхуджджано, айам̣ путхуджджано’’ти ан̇гулим̣ паса̄ретва̄ дассетаббо ахоси. екадивасам̣ саббе арахантова ахесум̣. тасма̄ти йасма̄ калин̇гарӯпадха̄на̄нам̣ ма̄ро а̄рамман̣ам̣ на лабхати, тасма̄. ат̣т̣хамам̣.

9. на̄гасуттаван̣н̣ана̄

231. наваме ативеланти атиккантавелам̣ ка̄лам̣ атиккантаппама̄н̣ам̣ ка̄лам̣. киман̇гам̣ пана̄ханти ахам̣ пана ким̣ка̄ран̣а̄ на упасан̇камисса̄ми? бхисамул̣а̄ланти бхисан̃чева мул̣а̄лан̃ча. аббухетва̄ти уддхаритва̄. бхин̇каччха̄па̄ти хаттхипотака̄. те кира абхин̣хам̣ бхин̇ка̄расаддам̣ каронти, тасма̄ бхин̇каччха̄па̄ти вуччанти. пасанна̄ка̄рам̣ каронтӣти пасаннехи каттабба̄ка̄рам̣ каронти, чатта̄ро паччайе денти. дхаммам̣ бха̄сантӣти екам̣ две джа̄така̄ни ва̄ суттанте ва̄ угган̣хитва̄ асамбхиннена сарена дхаммам̣ десенти. пасанна̄ка̄рам̣ каронтӣти тесам̣ та̄йа десана̄йа пасанна̄ гихӣ паччайе денти. нева ван̣н̣а̄йа хоти на бала̄йа̄ти нева гун̣аван̣н̣а̄йа, на н̃а̄н̣абала̄йа хоти, гун̣аван̣н̣е пана париха̄йанте сарӣраван̣н̣опи сарӣрабалампи париха̄йати, тасма̄ сарӣрасса нева ван̣н̣а̄йа на бала̄йа хоти. навамам̣.

10. бил̣а̄расуттаван̣н̣ана̄

232. дасаме сандхисамаласам̣кат̣ӣрети еттха сандхӣти бхиннагхара̄нам̣ сандхи, самалоти га̄мато гӯтханиккхаманамагго, сам̣кат̣ӣранти сан̇ка̄рат̣т̣ха̄нам̣. мудумӯсинти мудукам̣ мӯсикам̣. вут̣т̣ха̄нам̣ пан̃н̃а̄йатӣти десана̄ пан̃н̃а̄йати. дасамам̣.

11. син̇га̄ласуттаван̣н̣ана̄

233. ека̄дасаме йена йена иччхатӣти со джарасин̇га̄ло иччхитиччхитат̣т̣ха̄не ирийа̄патхакаппанена сӣтава̄тӯпава̄йанена ча антарантара̄ читтасса̄дампи лабхатӣти дассети. сакйапуттийапат̣ин̃н̃оти идам̣ девадаттам̣ сандха̄йа вуттам̣. со хи еттакампи читтасса̄дам̣ ана̄гате аттабха̄ве на лабхиссатӣти. ека̄дасамам̣.

12. дутийасин̇га̄ласуттаван̣н̣ана̄

234. два̄дасаме катан̃н̃ута̄ти катаджа̄нанам̣. катаведита̄ти катависесаджа̄нанам̣. татридам̣ джарасин̇га̄ласса катан̃н̃ута̄йа ваттху – сатта кира бха̄таро кхеттам̣ касанти. тесам̣ саббаканит̣т̣хо кхеттапарийанте т̣хатва̄ га̄во раккхати. атхекам̣ джарасин̇га̄лам̣ аджагаро ган̣хи, со там̣ дисва̄ йат̣т̣хийа̄ потхетва̄ виссаджджа̄песи. аджагаро син̇га̄лам̣ виссаджджетва̄ тамева ган̣хи. син̇га̄ло чинтеси – ‘‘майхам̣ имина̄ джӣвитам̣ диннам̣, ахампи имасса дасса̄мӣ’’ти йа̄гугхат̣асса упари т̣хапитам̣ ва̄сим̣ мукхена д̣ам̣ситва̄ тасса сантикам̣ агама̄си. итаре бха̄таро дисва̄, ‘‘син̇га̄ло ва̄сим̣ харатӣ’’ти анубандхим̣су. со техи дит̣т̣хабха̄вам̣ н̃атва̄ ва̄сим̣ тасса сантике чхад̣д̣етва̄ пала̄йи. итаре а̄гантва̄ канит̣т̣хам̣ аджагарена гахитам̣ дисва̄ ва̄сийа̄ аджагарам̣ чхиндитва̄ там̣ гахетва̄ агамам̣су. евам̣ джарасин̇га̄ле сийа̄ йа̄ ка̄чи катан̃н̃ута̄ катаведита̄. сакйапуттийапат̣ин̃н̃ети идампи девадаттасса а̄ча̄рамева сандха̄йа вуттанти. два̄дасамам̣.

опаммасам̣йуттаван̣н̣ана̄ нит̣т̣хита̄.