1. сантут̣т̣хасуттаван̣н̣ана̄

144. кассапасам̣йуттасса пат̣хаме сантут̣т̣ха̄йанти сантут̣т̣хо айам̣. итарӣтарена̄ти на тхӯласукхумалӯкхапан̣ӣтатхираджин̣н̣а̄нам̣ йена кеначи, атха кхо йатха̄ладдха̄дӣнам̣ итарӣтарена йена кеначи сантут̣т̣хоти аттхо. чӣварасмин̃хи тайо сантоса̄ йатха̄ла̄бхасантосо йатха̄баласантосо йатха̄са̄руппасантосоти. пин̣д̣апа̄та̄дӣсупи есева найо.

тесам̣ айам̣ пабхедасам̣ван̣н̣ана̄ – идха бхиккху чӣварам̣ лабхати сундарам̣ ва̄ асундарам̣ ва̄, со тенева йа̄пети, ан̃н̃ам̣ на паттхети, лабхантопи на ган̣ха̄ти. айамасса чӣваре йатха̄ла̄бхасантосо. атха пана пакатидуббало ва̄ хоти а̄ба̄дхаджара̄бхибхӯто ва̄, гаручӣварам̣ па̄рупанто киламати, со сабха̄гена бхиккхуна̄ саддхим̣ там̣ париваттетва̄ лахукена йа̄пентопи сантут̣т̣хова хоти. айамасса чӣваре йатха̄баласантосо. апаро пан̣ӣтапаччайала̄бхӣ хоти, со пат̣т̣ачӣвара̄дӣнам̣ ан̃н̃атарам̣ махаггхачӣварам̣ бахӯни ва̄ чӣвара̄ни лабхитва̄ – ‘‘идам̣ тхера̄нам̣ чирапаббаджита̄нам̣, идам̣ бахуссута̄нам̣ анурӯпам̣, идам̣ гила̄на̄нам̣, идам̣ аппала̄бхӣнам̣ хотӯ’’ти датва̄ тесам̣ пура̄н̣ачӣварам̣ ва̄ сан̇ка̄ракӯт̣а̄дито ва̄ пана нантака̄ни уччинитва̄ техи сан̇гха̄т̣им̣ катва̄ дха̄рентопи сантут̣т̣хова хоти. айамасса чӣваре йатха̄са̄руппасантосо.

идха пана бхиккху пин̣д̣апа̄там̣ лабхати лӯкхам̣ ва̄ пан̣ӣтам̣ ва̄, со тенева йа̄пети, ан̃н̃ам̣ на паттхети, лабхантопи на ган̣ха̄ти. айамасса пин̣д̣апа̄те йатха̄ла̄бха сантосо. йо пана аттано пакативируддхам̣ ва̄ бйа̄дхивируддхам̣ ва̄ пин̣д̣апа̄там̣ лабхати, йенасса парибхуттена апха̄су хоти, со сабха̄гасса бхиккхуно там̣ датва̄ тасса хаттхато саппа̄йабходжанам̣ бхутва̄ саман̣адхаммам̣ каронтопи сантут̣т̣хова хоти. айамасса пин̣д̣апа̄те йатха̄баласантосо. апаро бахум̣ пан̣ӣтам̣ пин̣д̣апа̄там̣ лабхати, со там̣ чӣварам̣ вийа чирапаббаджита-бахуссута-аппала̄бхагила̄на̄нам̣ датва̄, тесам̣ ва̄ сесакам̣ пин̣д̣а̄йа ва̄ чаритва̄ миссака̄ха̄рам̣ бхун̃джантопи сантут̣т̣хова хоти. айамасса пин̣д̣апа̄те йатха̄са̄руппасантосо.

идха пана бхиккху сена̄санам̣ лабхати мана̄пам̣ ва̄ амана̄пам̣ ва̄, со тена нева соманассам̣ на пат̣игхам̣ уппа̄дети, антамасо тин̣асантха̄ракена̄пи йатха̄ладдхенева туссати. айамасса сена̄сане йатха̄ла̄бхасантосо. йо пана аттано пакативируддхам̣ ва̄ бйа̄дхивируддхам̣ ва̄ сена̄санам̣ лабхати, йаттхасса васато апха̄су хоти, со там̣ сабха̄гасса бхиккхуно датва̄ тасса сантаке саппа̄йасена̄сане васантопи сантут̣т̣хова хоти. айамасса сена̄сане йатха̄баласантосо. апаро маха̄пун̃н̃о лен̣аман̣д̣апакӯт̣а̄га̄ра̄дӣни бахӯни пан̣ӣтасена̄сана̄ни лабхати, со та̄ни чӣвара̄дӣни вийа чирапаббаджитабахуссутааппала̄бхагила̄на̄нам̣ датва̄ йаттха каттхачи васантопи сантут̣т̣хова хоти. айамасса сена̄сане йатха̄са̄руппасантосо. йопи ‘‘уттамасена̄санам̣ на̄ма пама̄дат̣т̣ха̄нам̣, таттха нисиннасса тхинамиддхам̣ оккамати, нидда̄бхибхӯтасса пат̣ибуджджхато па̄павитакка̄ па̄тубхавантӣ’’ти пат̣исан̃чиккхитва̄ та̄дисам̣ сена̄санам̣ паттампи на сампат̣иччхати, со там̣ пат̣иккхипитва̄ аббхока̄саруккхамӯла̄дӣсу васанто сантут̣т̣хова хоти. айампи сена̄сане йатха̄са̄руппасантосо.

идха пана бхиккху бхесаджджам̣ лабхати лӯкхам̣ ва̄ пан̣ӣтам̣ ва̄, со йам̣ лабхати тенева туссати, ан̃н̃ам̣ на паттхети, лабхантопи на ган̣ха̄ти. айамасса гила̄напаччайе йатха̄ла̄бхасантосо. йо пана теленаттхико пха̄н̣итам̣ лабхати, со там̣ сабха̄гасса бхиккхуно датва̄ тасса хаттхато телам̣ гахетва̄ ва̄ ан̃н̃адева ва̄ парийеситва̄ бхесаджджам̣ каронтопи сантут̣т̣хова хоти. айамасса гила̄напаччайе йатха̄баласантосо. апаро маха̄пун̃н̃о бахум̣ теламадхупха̄н̣ита̄дипан̣ӣтабхесаджджам̣ лабхати, со там̣ чӣварам̣ вийа чирапаббаджита-бахуссута-аппала̄бхагила̄на̄нам̣ датва̄ тесам̣ а̄бхатена йена кеначи йа̄пентопи сантут̣т̣хова хоти. йо пана екасмим̣ бха̄джане муттахарӣтакам̣ т̣хапетва̄ екасмим̣ чатумадхурам̣ ‘‘ган̣ха, бханте, йадиччхасӣ’’ти вуччама̄но сачасса тесу ан̃н̃атаренапи рого вӯпасаммати, атха ‘‘муттахарӣтакам̣ на̄ма буддха̄дӣхи ван̣н̣ита’’нти чатумадхурам̣ пат̣иккхипитва̄ муттахарӣтакена бхесаджджам̣ каронто парамасантут̣т̣хова хоти. айамасса гила̄напаччайе йатха̄са̄руппасантосо. ити име тайо сантосе сандха̄йа ‘‘сантут̣т̣ха̄йам̣, бхиккхаве, кассапо итарӣтарена чӣварена̄’’ти вуттам̣.

ван̣н̣ава̄дӣти еко сантут̣т̣хо хоти, сантосасса ван̣н̣ам̣ на катхети. еко на сантут̣т̣хо хоти, сантосасса ван̣н̣ам̣ катхети. еко нева сантут̣т̣хо хоти, на сантосасса ван̣н̣ам̣ катхети. еко сантут̣т̣хо ча хоти, сантосасса ча ван̣н̣ам̣ катхети. айам̣ та̄дисоти дассетум̣ итарӣтарачӣварасантут̣т̣хийа̄ ча ван̣н̣ава̄дӣти вуттам̣. анесананти дӯтеййапахин̣агамана̄нуйогаппабхедам̣ на̄наппака̄рам̣ анесанам̣. аладдха̄ти алабхитва̄. йатха̄ ча екаччо ‘‘катхам̣ ну кхо чӣварам̣ лабхисса̄мӣ’’ти пун̃н̃авантехи бхиккхӯхи саддхим̣ екато хутва̄ кохан̃н̃ам̣ каронто уттасати паритассати, айам̣ евам̣ аладдха̄ ча чӣварам̣ на паритассати. ладдха̄ ча̄ти дхаммена самена лабхитва̄. агадхитоти вигаталобхагедхо. амуччхитоти адхиматтатан̣ха̄йа муччхам̣ ана̄панно. анаджджха̄панноти тан̣ха̄йа аноттхат̣о апарийонаддхо. а̄дӣнавадасса̄вӣти анесана̄паттийан̃ча гадхитапарибхоге ча а̄дӣнавам̣ пассама̄но. ниссаран̣апан̃н̃оти, ‘‘йа̄вадева сӣтасса пат̣игха̄та̄йа̄’’ти вуттаниссаран̣амева джа̄нанто парибхун̃джатӣти аттхо. итарӣтарена пин̣д̣апа̄тена̄тиа̄дӣсупи йатха̄ладдха̄дӣнам̣ йена кеначи пин̣д̣апа̄тена, йена кеначи сена̄санена, йена кеначи гила̄напаччайабхесаджджапариккха̄рена̄ти еваматтхо дат̣т̣хаббо.

кассапена ва̄ хи во, бхиккхаве, овадисса̄мӣти еттха йатха̄ маха̄кассапаттхеро чатӯсу паччайесу тӣхи сантосехи сантут̣т̣хо, тумхепи татха̄рӯпа̄ бхаватха̄ти оваданто кассапена овадати на̄ма. йо ва̄ панасса кассапасадисоти еттха̄пи йо ва̄ панан̃н̃опи кассапасадисо маха̄кассапаттхеро вийа чатӯсу паччайесу тӣхи сантосехи сантут̣т̣хо бхавеййа, тумхепи татха̄рӯпа̄ бхаватха̄ти оваданто кассапасадисена овадати на̄ма. татхатта̄йа пат̣ипаджджитаббанти ‘‘самма̄самбуддхасса има̄йа имасмим̣ сантут̣т̣хисутте вуттасаллекха̄ча̄рапат̣ипаттийа̄ катханам̣ на̄ма бха̄ро, амха̄кампи имам̣ пат̣ипаттим̣ парипӯрам̣ катва̄ пӯран̣ам̣ бха̄ройева, а̄гато кхо пана бха̄ро гахетаббо’’ти чинтетва̄ йатха̄ майа̄ катхитам̣, татхатта̄йа татха̄бха̄ва̄йа тумхехипи пат̣ипаджджитаббанти. пат̣хамам̣.