2. абхисамайасам̣йуттам̣

1. накхасикха̄суттаван̣н̣ана̄

74. абхисамайасам̣йуттасса пат̣хаме накхасикха̄йанти мам̣сат̣т̣ха̄нена вимутте накхагге. накхасикха̄ ча на̄ма локийа̄нам̣ махатӣпи хоти, саттху пана раттуппалапаттакот̣и вийа сукхума̄. катхам̣ панеттха пам̣су патит̣т̣хитоти? адхит̣т̣ха̄набалена. бхагавата̄ хи аттхам̣ н̃а̄петука̄мена адхит̣т̣ха̄набалена таттха патит̣т̣ха̄пито. сатимам̣ каланти маха̄патхавийа̄ пам̣сум̣ сатакот̣т̣ха̄се катва̄ тато екакот̣т̣ха̄сам̣. паратопи есева найо. абхисамета̄виноти пан̃н̃а̄йа арийасачча̄ни абхисаметва̄ т̣хитасса. пуримам̣ дуккхаккхандхам̣ париккхӣн̣ам̣ парийа̄дин̣н̣ам̣ упанидха̄йа̄ти етадева бахутарам̣ дуккхам̣, йадидам̣ париккхӣн̣анти евам̣ пат̣хамам̣ вуттам̣ дуккхаккхандхам̣ упанидха̄йа, н̃а̄н̣ена там̣ тасса сантике т̣хапетва̄ упапариккхийама̄нети аттхо. катамам̣ панеттха пуримадуккхам̣ на̄ма? йам̣ париккхӣн̣ам̣. катамам̣ пана париккхӣн̣ам̣? йам̣ пат̣хамамаггасса абха̄витатта̄ уппаджджеййа. катамам̣ пана упанидха̄йа? йам̣ саттасу аттабха̄весу апа̄йе ат̣т̣хаман̃ча пат̣исандхим̣ а̄дим̣ катва̄ йаттха каттхачи уппаджджеййа, саббам̣ там̣ париккхӣн̣анти ведитаббам̣. саттаккхаттунти сатта ва̄ре, саттасу аттабха̄весӯти аттхо. парамата̄ти идамасса парам̣ пама̄н̣анти дассети. махаттхийоти махато аттхасса ниппха̄дако. пат̣хамам̣.

2. поккхаран̣ӣсуттаван̣н̣ана̄

75. дутийе поккхаран̣ӣти ва̄пӣ. уббедхена̄ти гамбхӣрата̄йа. саматиттика̄ти мукхават̣т̣исама̄. ка̄капеййа̄ти сакка̄ хоти тӣре т̣хитена ка̄кена пакатийа̄пи мукхатун̣д̣икам̣ ота̄ретва̄ па̄тум̣. дутийам̣.

3. сам̣бхеджджаудакасутта̄диван̣н̣ана̄

76-77. татийе йаттхима̄ти йасмим̣ самбхиджджат̣т̣ха̄не има̄. сам̣сандантӣти сама̄гантва̄ санданти. саментӣти сама̄гаччханти. две ва̄ ти ва̄ти две ва̄ тӣн̣и ва̄. удакапхусита̄нӣти удакабиндӯни. сам̣бхеджджаудаканти ан̃н̃а̄хи надӣхи саддхим̣ самбхиннат̣т̣ха̄не удакам̣. чатуттхам̣ утта̄наттхамева. татийачатуттха̄ни.

5. патхавӣсутта̄диван̣н̣ана̄

78-84. пан̃чаме маха̄патхавийа̄ти чаккава̄л̣аббхантара̄йа маха̄патхавийа̄ уддхаритва̄. колат̣т̣химаттийоти падарат̣т̣хипама̄н̣а̄. гул̣ика̄ти маттикагул̣ика̄. упаниккхипеййа̄ти екасмим̣ т̣ха̄не т̣хапеййа. чхат̣т̣ха̄дӣсу вуттанайенева аттхо ведитаббо. парийоса̄не пана ан̃н̃атиттхийасаман̣абра̄хман̣апарибба̄джака̄нам̣ адхигамоти ба̄хирака̄нам̣ саббопи гун̣а̄дхигамо пат̣хамамаггена адхигатагун̣а̄нам̣ сатабха̄гампи сахассабха̄гампи сатасахассабха̄гампи на упагаччхатӣти. пан̃чама̄дӣни.

абхисамайасам̣йуттаван̣н̣ана̄ нит̣т̣хита̄.