6. брахмалокасуттаван̣н̣ана̄

177. чхат̣т̣хе паччекам̣ два̄раба̄ханти екеко екекам̣ два̄раба̄хам̣ нисса̄йа два̄рапа̄ла̄ вийа ат̣т̣хам̣су. иддхоти джха̄насукхена самиддхо. пхӣтоти абхин̃н̃а̄пуппхехи супуппхито. анадхива̄сентоти асаханто. етадавоча̄ти етесам̣ ниммитабрахма̄нам̣ маджджхе нисинно етам̣ ‘‘пассаси ме’’тиа̄дивачанам̣ авоча.

тайо супан̣н̣а̄ти га̄тха̄йа пан̃часата̄ти сатападам̣ рӯпавасена ва̄ пантивасена ва̄ йоджетаббам̣. рӯпавасена та̄ва тайо супан̣н̣а̄ти тӣн̣и супан̣н̣арӯпасата̄ни. чатуро ча хам̣са̄ти чатта̄рихам̣сарӯпасата̄ни. буггхӣниса̄ пан̃часата̄ти бйаггхасадиса̄ екачче мига̄ бйаггхӣниса̄ на̄ма, тесам̣ бйаггхӣниса̄рӯпака̄нам̣ пан̃часата̄ни, пантивасена тайо супан̣н̣а̄ти тӣн̣и супан̣н̣апантисата̄ни, чатуро хам̣са̄ти чатта̄ри хам̣сапантисата̄ни. бйаггхӣниса̄ пан̃часата̄ти пан̃ча бйаггхӣниса̄ пантисата̄ни. джха̄йиноти джха̄йисса майхам̣ вима̄не айам̣ вибхӯтӣти дассети. обха̄сайанти обха̄сайама̄нам̣. уттарассам̣ диса̄йанти там̣ кира канакавима̄нам̣ тесам̣ маха̄брахма̄нам̣ т̣хитат̣т̣ха̄нато уттарадиса̄йам̣ хоти. тасма̄ евама̄ха. айам̣ панасса адхиппа̄йо – еварӯпе канакавима̄не васанто ахам̣ касса ан̃н̃асса упат̣т̣ха̄нам̣ гамисса̄мӣти. рӯпе ран̣ам̣ дисва̄ти рӯпамхи джа̄тиджара̄бхан̇гасан̇кха̄там̣ досам̣ дисва̄. сада̄ паведхитанти сӣта̄дӣхи ча ниччам̣ паведхитам̣ чалитам̣ гхат̣т̣итам̣ рӯпам̣ дисва̄. тасма̄ на рӯпе рамати сумедхоти йасма̄ рӯпе ран̣ам̣ пассати, сада̄ паведхитан̃ча рӯпам̣ пассати, тасма̄ сумедхо сундарапан̃н̃о со саттха̄ рӯпе на раматӣти. чхат̣т̣хам̣.