1. а̄л̣авика̄суттаван̣н̣ана̄

162. бхиккхунӣсам̣йуттасса пат̣хаме а̄л̣авика̄ти а̄л̣авийам̣ джа̄та̄ а̄л̣авинагаратойева ча никкхамма паббаджита̄. андхавананти кассапасамма̄самбуддхасса четийе навакамматтха̄йа дханам̣ сама̄дапетва̄ а̄гаччхантасса йасодхарасса на̄ма дхаммабха̄н̣акасса арийапуггаласса аккхӣни уппа̄т̣етва̄ таттхева аккхибхедаппаттехи пан̃чахи чорасатехи нивуттхатта̄ тато пат̣т̣ха̄йа ‘‘андхавана’’нти сан̇кхам̣ гатам̣ ванам̣. там̣ кира са̄ваттхито даккхин̣апассе га̄вутаматте хоти ра̄джа̄раккха̄йа гуттам̣. таттха павивекака̄ма̄ бхиккхӯ ча бхиккхунийо ча гаччханти. тасма̄ айампи ка̄йавивекаттхинӣ йена там̣ ванам̣, тенупасан̇ками. ниссаран̣анти нибба̄нам̣. пан̃н̃а̄йа̄ти паччавеккхан̣ан̃а̄н̣ена. на твам̣ джа̄на̄си там̣ паданти твам̣ етам̣ нибба̄нападам̣ ва̄ нибба̄нага̄мимаггападам̣ ва̄ на джа̄на̄си. саттисӯлӯпама̄ти винивиджджханаттхена саттисӯласадиса̄. кхандха̄сам̣ адхикут̣т̣ана̄ти кхандха̄ тесам̣ адхикут̣т̣анабхан̣д̣ика̄. пат̣хамам̣.