гантха̄рамбхакатха̄

карун̣а̄сӣталахадайам̣, пан̃н̃а̄паджджотавихатамохатамам̣;

санара̄маралокагарум̣, ванде сугатам̣ гативимуттам̣.

буддхопи буддхабха̄вам̣, бха̄ветва̄ чева саччхикатва̄ ча;

йам̣ упагато гатамалам̣, ванде тамануттарам̣ дхаммам̣.

сугатасса ораса̄нам̣, путта̄нам̣ ма̄расенаматхана̄нам̣;

ат̣т̣ханнампи самӯхам̣, сираса̄ ванде арийасан̇гхам̣.

ити ме пасаннаматино, ратанаттайавандана̄майам̣ пун̃н̃ам̣;

йам̣ сувихатантара̄йо, хутва̄ тасса̄нубха̄вена.

сам̣йуттаваггапат̣иман̣д̣итасса, сам̣йуттаа̄гамаварасса;

буддха̄нубуддхасам̣ван̣н̣итасса, н̃а̄н̣аппабхедаджананасса.

аттхаппака̄санаттхам̣, ат̣т̣хакатха̄ а̄дито васисатехи;

пан̃чахи йа̄ сан̇гӣта̄, анусан̇гӣта̄ ча паччха̄пи.

сӣхал̣адӣпам̣ пана а̄бхата̄тха, васина̄ маха̄махиндена;

т̣хапита̄ сӣхал̣абха̄са̄йа, дӣпава̄сӣнаматтха̄йа.

апанетва̄на татохам̣, сӣхал̣абха̄сам̣ манорамам̣ бха̄сам̣;

тантинайа̄нуччхавикам̣, а̄ропенто вигатадосам̣.

самайам̣ авиломенто, тхера̄нам̣ тхеравам̣садӣпа̄нам̣;

сунипун̣авиниччхайа̄нам̣, маха̄виха̄ре нива̄сӣнам̣.

хитва̄ пунаппуна̄гата-маттхам̣, аттхам̣ пака̄сайисса̄ми;

суджанасса ча тут̣т̣хаттхам̣, чират̣т̣хитаттхан̃ча дхаммасса.

са̄ваттхипабхӯтӣнам̣, нагара̄нам̣ ван̣н̣ана̄ ката̄ хет̣т̣ха̄;

сан̇гӣтӣнам̣ двиннам̣, йа̄ ме аттхам̣ вадантена.

виттха̄равасена судам̣, ваттхӯни ча йа̄ни таттха вутта̄ни;

тесампи на идха бхиййо, виттха̄ракатхам̣ карисса̄ми.

сутта̄нам̣ пана аттха̄, на вина̄ ваттхӯхи йе пака̄санти;

тесам̣ пака̄санаттхам̣, ваттхӯнипи дассайисса̄ми.

сӣлакатха̄ дхутадхамма̄, каммат̣т̣ха̄на̄ни чева сабба̄ни;

чарийа̄видха̄насахито, джха̄насама̄паттивиттха̄ро.

сабба̄ ча абхин̃н̃а̄йо, пан̃н̃а̄сан̇калананиччхайо чева;

кхандха̄дха̄та̄йатаниндрийа̄ни, арийа̄ни чева чатта̄ри.

сачча̄ни паччайа̄ка̄радесана̄, супарисуддханипун̣анайа̄;

авимуттатантимагга̄, випассана̄бха̄вана̄ чева.

ити пана саббам̣ йасма̄, висуддхимагге майа̄ супарисуддхам̣;

вуттам̣ тасма̄ бхиййо, на там̣ идха вича̄райисса̄ми.

‘‘маджджхе висуддхимагго, еса чатуннампи а̄гама̄нан̃хи;

т̣хатва̄ пака̄сайиссати, таттха йатха̄бха̄ситаматтхам̣’’.

иччева като тасма̄, тампи гахетва̄на саддхимета̄йа;

ат̣т̣хакатха̄йа виджа̄натха, сам̣йуттавинисситам̣ аттханти.