3. маха̄качча̄набхаддекараттасуттаван̣н̣ана̄

279. евам̣ ме сутанти маха̄качча̄набхаддекараттасуттам̣. таттха тапода̄ра̄мети таттодакасса рахадасса васена евам̣ладдхана̄ме а̄ра̄ме. вебха̄рапаббатасса кира хет̣т̣ха̄ бхӯмат̣т̣хакана̄га̄нам̣ пан̃чайоджанасатикам̣ на̄габхаванам̣ девалокасадисам̣ ман̣имайена талена а̄ра̄мауййа̄нехи ча саманна̄гатам̣, таттха на̄га̄нам̣ кӣл̣анат̣т̣ха̄не маха̄удакарахадо, тато тапода̄ на̄ма надӣ сандати кутхита̄ ун̣ходака̄. касма̄ панеса̄ едиса̄ джа̄та̄? ра̄джагахам̣ кира парива̄ретва̄ маха̄ петалоко, таттха двиннам̣ маха̄лохакумбхинирайа̄нам̣ антарена айам̣ тапода̄ а̄гаччхати, тасма̄ са̄ кутхита̄ сандати. вуттампи четам̣ – ‘‘йата̄йам̣, бхиккхаве, тапода̄ сандати, со дахо аччходако сӣтодако са̄тодако сетодако суппатиттхо раман̣ӣйо пахӯтамаччхакаччхапо, чаккаматта̄ни ча падума̄ни пуппханти. апича̄йам̣, бхиккхаве, тапода̄ двиннам̣ маха̄нирайа̄нам̣ антарика̄йа а̄гаччхати, тена̄йам̣ тапода̄ кутхита̄ сандатӣ’’ти (па̄ра̄. 231). имасса пана а̄ра̄масса абхисаммукхат̣т̣ха̄не тато маха̄удакарахадо джа̄то, тасса на̄мавасена̄йам̣ виха̄ро тапода̄ра̄моти вуччати.

280. самиддхӣти тасса кира тхерасса аттабха̄во самиддхо абхирӯпо па̄са̄дико, тасма̄ самиддхитвева сан̇кхам̣ гато. а̄дибрахмачарийакоти маггабрахмачарийасса а̄ди пуббабха̄гаппат̣ипаттибхӯто. идам̣ ватва̄на сугато ут̣т̣ха̄йа̄сана̄ти мадхупин̣д̣икасутте (ма. ни. 1.199 а̄дайо) вуттанайенева виттха̄ретаббам̣.

282. ити ме чаккхунти имасмим̣ кира сутте бхагава̄ два̄даса̄йатанавасенева ма̄тикам̣ т̣хапеси. тхеропи ‘‘бхагавата̄ хет̣т̣ха̄ двӣсу, упари чатуттхе ча̄ти имесу тӣсу суттесу пан̃чаккхандхавасена ма̄тика̄ ча вибхан̇го ча като, идха пана два̄даса̄йатанавасенева вибхаджанаттхам̣ ма̄тика̄ т̣хапита̄’’ти найам̣ пат̣илабхитва̄ евама̄ха. имам̣ пана найам̣ лабхантена тхерена бха̄рийам̣ катам̣, ападе падам̣ дасситам̣, а̄ка̄се падам̣ катам̣, тена нам̣ бхагава̄ имамева суттам̣ сандха̄йа – ‘‘етадаггам̣, бхиккхаве, мама са̄вака̄нам̣ бхиккхӯнам̣ сам̣кхиттена бха̄ситасса виттха̄рена аттхам̣ вибхаджанта̄нам̣ йадидам̣ маха̄качча̄но’’ти (а. ни. 1.197) етадагге т̣хапеси. еттха пана чаккхӯти чаккхупаса̄до. рӯпа̄ти чатусамут̣т̣ха̄никарӯпа̄. имина̄ найена сеса̄йатана̄нипи ведитабба̄ни. вин̃н̃а̄н̣анти никантивин̃н̃а̄н̣ам̣. тадабхинандатӣти там̣ чаккхун̃чева рӯпан̃ча тан̣ха̄дит̣т̣хивасена абхинандати. анва̄гаметӣти тан̣ха̄дит̣т̣хӣхи анугаччхати.

ити ме мано ахоси атӣтамаддха̄нам̣ ити дхамма̄ти еттха пана маноти бхаван̇гачиттам̣. дхамма̄ти тебхӯмакадхамма̄рамман̣ам̣.

283. пан̣идахатӣти паттхана̄васена т̣хапеси. пан̣идха̄напаччайа̄ти паттхана̄т̣т̣хапанака̄ран̣а̄. сесам̣ саббаттха утта̄намева̄ти.

папан̃часӯданийа̄ маджджхиманика̄йат̣т̣хакатха̄йа

маха̄качча̄набхаддекараттасуттаван̣н̣ана̄ нит̣т̣хита̄.