8. нагаравиндеййасуттаван̣н̣ана̄

435. евам̣ ме сутанти нагаравиндеййасуттам̣. таттха самависамам̣ чарантӣти ка̄лена самам̣ чаранти, ка̄лена висамам̣. самачарийампи хетанти самачарийампи хи етам̣.

437. ке а̄ка̄ра̄ти ка̄ни ка̄ран̣а̄ни? ке анвайа̄ти ка̄ анубуддхийо? наттхи кхо пана таттха̄ти касма̄ а̄ха, нану аран̃н̃е харитатин̣ачампакавана̄дивасена атиманун̃н̃а̄ рӯпа̄дайо пан̃ча ка̄магун̣а̄ аттхӣти? но наттхи. на панетам̣ ванасан̣д̣ена катхитам̣, иттхирӯпа̄дӣни пана сандха̄йетам̣ катхитам̣. та̄ни хи пурисасса читтам̣ парийа̄да̄йа тит̣т̣ханти. йатха̄ха – ‘‘на̄хам̣, бхиккхаве, ан̃н̃ам̣ екарӯпампи саманупасса̄ми, йам̣ евам̣ пурисасса читтам̣ парийа̄да̄йа тит̣т̣хати, йатхайидам̣, бхиккхаве, иттхирӯпам̣. иттхирӯпам̣, бхиккхаве, пурисасса читтам̣ парийа̄да̄йа тит̣т̣хатӣ’’ти (а. ни. 1.1) виттха̄ретаббам̣. сесам̣ саббаттха утта̄намева̄ти.

папан̃часӯданийа̄ маджджхиманика̄йат̣т̣хакатха̄йа

нагаравиндеййасуттаван̣н̣ана̄ нит̣т̣хита̄.