6. чхачхаккасуттаван̣н̣ана̄

420. евам̣ ме сутанти чхачхаккасуттам̣. таттха а̄дикалйа̄н̣антиа̄димхи калйа̄н̣ам̣ бхаддакам̣ ниддосам̣ катва̄ десесса̄ми. маджджхапарийоса̄несупи есева найо. ити бхагава̄ арийавам̣сам̣ навахи, маха̄сатипат̣т̣ха̄нам̣ саттахи, маха̄ассапурам̣ саттахийева падехи тхомеси. идам̣ пана суттам̣ навахи падехи тхомеси.

ведитабба̄нӣти сахавипассанена маггена джа̄нитабба̄ни. мана̄йатанена тебхӯмакачиттамева катхитам̣, дхамма̄йатанена бахиддха̄ тебхӯмакадхамма̄ ча, мановин̃н̃а̄н̣ена т̣хапетва̄ две пан̃чавин̃н̃а̄н̣а̄ни сесам̣ ба̄вӣсативидхам̣ локийавипа̄качиттам̣. пхассаведана̄ йатха̄вуттавипа̄кавин̃н̃а̄н̣асампайутта̄ва. тан̣ха̄ти випа̄каведана̄паччайа̄ джаванаккхан̣е уппаннатан̣ха̄.

422. чаккху атта̄ти па̄т̣ийекко анусандхи. хет̣т̣ха̄ катхита̄нан̃хи двиннам̣ сачча̄нам̣ анаттабха̄вадассанаттхам̣ айам̣ десана̄ а̄раддха̄. таттха на упападжджатӣти на йуджджати. ветӣти вигаччхати нируджджхати.

424. айам̣ кхо пана, бхиккхавети айампи па̄т̣ийекко анусандхи. айан̃хи десана̄ тин̣н̣ам̣ га̄ха̄нам̣ васена ват̣т̣ам̣ дассетум̣ а̄раддха̄. дуккхам̣ самудайоти двиннам̣ сачча̄нам̣ васена ват̣т̣ам̣ дассетунтипи вадантийева. етам̣ мама̄тиа̄дӣсу тан̣ха̄ма̄надит̣т̣хига̄ха̄ва ведитабба̄. саманупассатӣти га̄хаттайавасена пассати.

евам̣ ват̣т̣ам̣ дассетва̄ ида̄ни тин̣н̣ам̣ га̄ха̄нам̣ пат̣ипаккхавасена, ниродхо магготи имесам̣ ва̄ двиннам̣ сачча̄нам̣ васена виват̣т̣ам̣ дассетум̣ айам̣ кхо пана̄тиа̄дима̄ха. нетам̣ мама̄тиа̄дӣни тан̣ха̄дӣнам̣ пат̣иседхавачана̄ни. саманупассатӣти аниччам̣ дуккхаманатта̄ти пассати.

425. евам̣ виват̣т̣ам̣ дассетва̄ ида̄ни тин̣н̣ам̣ анусайа̄нам̣ васена пуна ват̣т̣ам̣ дассетум̣ чаккхун̃ча, бхиккхаветиа̄дима̄ха. таттха абхинандатӣтиа̄дӣни тан̣ха̄дит̣т̣хивасенева вутта̄ни. анусетӣти аппахӣно хоти. дуккхасса̄ти ват̣т̣адуккхакилесадуккхасса.

426. евам̣ тин̣н̣ам̣ анусайа̄нам̣ васена ват̣т̣ам̣ катхетва̄ ида̄ни тесам̣ пат̣иккхепавасена виват̣т̣ам̣ дассенто пуна чаккхун̃ча̄тиа̄дима̄ха. авиджджам̣ паха̄йа̄ти ват̣т̣амӯликам̣ авиджджам̣ паджахитва̄. виджджанти арахаттамаггавиджджам̣ уппа̄детва̄.

427. т̣ха̄наметам̣ виджджатӣти еттакенева катха̄маггена ват̣т̣авиват̣т̣авасена десанам̣ маттхакам̣ па̄петва̄ пуна тадева сампин̣д̣етва̄ дассенто евам̣ пассам̣, бхиккхаветиа̄дима̄ха. сат̣т̣химатта̄нам̣ бхиккхӯнанти еттха аначчхарийаметам̣, йам̣ сайамева татха̄гате десенте сат̣т̣хи бхиккхӯ арахаттам̣ патта̄. иман̃хи суттам̣ дхаммасена̄патимхи катхентепи сат̣т̣хи бхиккхӯ арахаттам̣ патта̄, маха̄моггалла̄не катхентепи, асӣтимаха̄тхересу катхентесупи патта̄ ева. етампи аначчхарийам̣. маха̄бхин̃н̃аппатта̄ хи те са̄вака̄.

апарабха̄ге пана тамбапан̣н̣идӣпе ма̄леййадеваттхеро на̄ма хет̣т̣ха̄ лохапа̄са̄де идам̣ суттам̣ катхеси. тада̄пи сат̣т̣хи бхиккхӯ арахаттам̣ патта̄. йатха̄ ча лохапа̄са̄де, евам̣ тхеро маха̄ман̣д̣апепи идам̣ суттам̣ катхеси. маха̄виха̄ра̄ никкхамитва̄ четийапаббатам̣ гато, таттха̄пи катхеси. тато са̄кийавам̣савиха̄ре, кӯт̣а̄ливиха̄ре, антарасоббхе, муттан̇ган̣е, ва̄такапаббате, па̄чинагхараке, дӣгхава̄пийам̣, локандаре, номан̣д̣алатале катхеси. тесупи т̣ха̄несу сат̣т̣хи сат̣т̣хи бхиккхӯ арахаттам̣ патта̄. тато никкхамитва̄ пана тхеро читталапаббатам̣ гато. тада̄ ча читталапаббатавиха̄ре атирекасат̣т̣хивассо маха̄тхеро, поккхаран̣ийам̣ курувакатиттхам̣ на̄ма пат̣иччханнат̣т̣ха̄нам̣ аттхи, таттха тхеро нха̄йисса̄мӣти отин̣н̣о. деваттхеро тасса сантикам̣ гантва̄ нха̄пеми, бхантети а̄ха. тхеро пат̣исантха̄ренева – ‘‘ма̄леййадево на̄ма аттхӣти ваданти, со айам̣ бхависсатӣ’’ти н̃атва̄ твам̣ девоти а̄ха. а̄ма, бхантети. сат̣т̣хивассаддха̄нам̣ ме, а̄вусо, кочи сарӣрам̣ хаттхена пхуситум̣ на̄ма на лабхи, твам̣ пана нха̄пехӣти уттаритва̄ тӣре нисӣди.

тхеро саббампи хаттхапа̄да̄дипарикаммам̣ катва̄ маха̄тхерам̣ нха̄песи. там̣ дивасан̃ча дхаммассаванадивасо хоти. атха маха̄тхеро – ‘‘дева амха̄кам̣ дхаммада̄нам̣ да̄тум̣ ват̣т̣атӣ’’ти а̄ха. тхеро са̄дху, бхантети сампат̣иччхи. аттхан̇гате сӯрийе дхаммассаванам̣ гхосесум̣. атиккантасат̣т̣хивасса̄ва сат̣т̣хи маха̄тхера̄ дхаммассаванаттхам̣ агамам̣су. деваттхеро сарабха̄н̣а̄васа̄не имам̣ суттам̣ а̄рабхи, суттантапарийоса̄не ча сат̣т̣хи маха̄тхера̄ арахаттам̣ па̄пун̣им̣су. тато тиссамаха̄виха̄рам̣ гантва̄ катхеси, тасмимпи сат̣т̣хи тхера̄. тато на̄гамаха̄виха̄ре ка̄л̣акаччхага̄ме катхеси, тасмимпи сат̣т̣хи тхера̄. тато калйа̄н̣им̣ гантва̄ таттха ча̄туддасе хет̣т̣ха̄па̄са̄де катхеси, тасмимпи сат̣т̣хи тхера̄. упосатхадивасе упарипа̄са̄де катхеси, тасмимпи сат̣т̣хи тхера̄ти евам̣ деваттхерейева идам̣ суттам̣ катхенте сат̣т̣хит̣т̣ха̄несу сат̣т̣хи сат̣т̣хи джана̄ арахаттам̣ патта̄.

амбилака̄л̣акавиха̄ре пана типит̣акачӯл̣ана̄гаттхере имам̣ суттам̣ катхенте мануссапариса̄ га̄вутам̣ ахоси, девапариса̄ йоджаника̄. суттапарийоса̄не сахассабхиккхӯ арахаттам̣ патта̄, девесу пана тато тато екекова путхуджджано ахосӣти.

папан̃часӯданийа̄ маджджхиманика̄йат̣т̣хакатха̄йа

чхачхаккасуттаван̣н̣ана̄ нит̣т̣хита̄.