1. бхаддекараттасуттаван̣н̣ана̄

272. евам̣ ме сутанти бхаддекараттасуттам̣. таттха бхаддекараттасса̄ти випассана̄нуйогасаманна̄гататта̄ бхаддакасса екараттасса. уддесанти ма̄тикам̣. вибхан̇ганти виттха̄рабха̄джанӣйам̣.

атӣтанти атӣте пан̃чаккхандхе. на̄нва̄гамеййа̄ти тан̣ха̄дит̣т̣хӣхи на̄нугаччхеййа. наппат̣икан̇кхети тан̣ха̄дит̣т̣хӣхи на паттхеййа. йадатӣтанти идаметтха ка̄ран̣авачанам̣. йасма̄ йам̣ атӣтам̣, там̣ пахӣнам̣ нируддхам̣ аттхан̇гатам̣, тасма̄ там̣ пуна на̄нугаччхеййа. йасма̄ ча йам̣ ана̄гатам̣, там̣ аппаттам̣ аджа̄там̣ аниббаттам̣, тасма̄ тампи на паттхеййа.

таттха таттха̄ти паччуппаннампи дхаммам̣ йаттха йаттхева уппанно, таттха таттхева ча нам̣ аничча̄нупассана̄дӣхи саттахи анупассана̄хи йо випассати аран̃н̃а̄дӣсу ва̄ таттха таттхева випассати. асам̣хӣрам̣ асам̣куппанти идам̣ випассана̄пат̣ивипассана̄дассанаттхам̣ вуттам̣. випассана̄ хи ра̄га̄дӣхи на сам̣хӣрати на сам̣куппатӣти асам̣хӣрам̣ асам̣куппам̣, там̣ анубрӯхайе вад̣д̣хеййа, пат̣ивипассеййа̄ти вуттам̣ хоти. атха ва̄ нибба̄нам̣ ра̄га̄дӣхи на сам̣хӣрати на сам̣куппатӣти асам̣хӣрам̣ асам̣куппам̣. там̣ видва̄ пан̣д̣ито бхиккху анубрӯхайе, пунаппунам̣ тада̄рамман̣ам̣ там̣ там̣ пхаласама̄паттим̣ аппенто вад̣д̣хеййа̄ти аттхо.

тасса пана анубрӯхантасса аттха̄йа – аджджева киччама̄таппанти килеса̄нам̣ а̄та̄панапарита̄панена а̄таппанти ладдхана̄мам̣ вӣрийам̣ аджджева ка̄таббам̣. ко джан̃н̃а̄ маран̣ам̣ сувети све джӣвитам̣ ва̄ маран̣ам̣ ва̄ ко джа̄на̄ти. аджджева да̄нам̣ ва̄ дасса̄ми, сӣлам̣ ва̄ раккхисса̄ми, ан̃н̃атарам̣ ва̄ пана кусалам̣ карисса̄мӣти хи ‘‘аджджа та̄ва папан̃чо аттхи, све ва̄ пунадивасе ва̄ карисса̄мӣ’’ти читтам̣ ануппа̄детва̄ аджджева карисса̄мӣти евам̣ вӣрийам̣ ка̄таббанти дассети. маха̄сенена̄ти аггивисасаттха̄дӣни анека̄ни маран̣ака̄ран̣а̄ни тасса сена̄, та̄йа махатийа̄ сена̄йа васена маха̄сенена еварӯпена маччуна̄ саддхим̣ ‘‘катипа̄хам̣ та̄ва а̄гамехи йа̄ва̄хам̣ буддхапӯджа̄дим̣ аттано авассайакаммам̣ каромӣ’’ти. евам̣ миттасантхава̄ка̄расан̇кха̄то ва̄, ‘‘идам̣ сатам̣ ва̄ сахассам̣ ва̄ гахетва̄ катипа̄хам̣ а̄гамехӣ’’ти евам̣ лан̃джа̄нуппада̄насан̇кха̄то ва̄, ‘‘имина̄хам̣ балара̄сина̄ пат̣иба̄хисса̄мӣ’’ти евам̣ балара̄сисан̇кха̄то ва̄ сан̇гаро наттхи. сан̇гароти хи миттасантхава̄ка̄ралан̃джа̄нуппада̄набалара̄сӣнам̣ на̄мам̣, тасма̄ айаматтхо вутто.

атандитанти аналасам̣ ут̣т̣ха̄хакам̣. евам̣ пат̣ипаннатта̄ бхаддо екаратто асса̄ти бхаддекаратто. ити там̣ евам̣ пат̣ипаннапуггалам̣ ‘‘бхаддекаратто айа’’нти. ра̄га̄дӣнам̣ сантата̄йа санто буддхамуни а̄чиккхати.

273. евам̣рӯпотиа̄дӣсу ка̄л̣опи сама̄но инданӣламан̣иван̣н̣о ахосинти евам̣ манун̃н̃арӯпавасенева евам̣рӯпо ахосим̣. кусаласукхасоманассаведана̄васенева евам̣ведано. там̣сампайутта̄нам̣йева сан̃н̃а̄дӣнам̣ васена евам̣сан̃н̃о евам̣сан̇кха̄ро евам̣вин̃н̃а̄н̣о ахосим̣ атӣтамаддха̄нанти.

таттха нандим̣ саманва̄нетӣти тесу рӯпа̄дӣсу тан̣хам̣ саманва̄нети анупаваттети. хӣнарӯпа̄дивасена пана евам̣рӯпо ахосим̣…пе… евам̣вин̃н̃а̄н̣о ахосинти на ман̃н̃ати.

нандим̣ на саманва̄нетӣти тан̣хам̣ ва̄ тан̣ха̄сампайуттадит̣т̣хим̣ ва̄ на̄нупаваттайати.

274. евам̣рӯпо сийантиа̄дӣсупи там̣манун̃н̃арӯпа̄дивасенева тан̣ха̄дит̣т̣хипаваттасан̇кха̄та̄ нандисаманва̄найана̄ва ведитабба̄.

275. катхан̃ча, бхиккхаве, паччуппаннесу дхаммесу сам̣хӣратӣти идам̣ ‘‘паччуппаннан̃ча йо дхаммам̣, таттха таттха випассати. асам̣хӣрам̣ асам̣куппа’’нти уддесасса ниддесаттхам̣ вуттам̣. ка̄ман̃четтха ‘‘катхан̃ча, бхиккхаве, паччуппаннам̣ дхаммам̣ на випассатӣ’’тиа̄ди ваттаббам̣ сийа̄, йасма̄ пана асам̣хӣра̄ти ча асам̣куппа̄ти ча випассана̄ вутта̄, тасма̄ тасса̄ ева абха̄ван̃ча бха̄ван̃ча дассетум̣ сам̣хӣратӣти ма̄тикам̣ уддхаритва̄ виттха̄ро вутто. таттха сам̣хӣратӣти випассана̄йа абха̄вато тан̣ха̄дит̣т̣хӣхи а̄кад̣д̣хийати. на сам̣хӣратӣти випассана̄йа бха̄вена тан̣ха̄дит̣т̣хӣхи на̄кад̣д̣хийати. сесам̣ саббаттха утта̄намева̄ти.

папан̃часӯданийа̄ маджджхиманика̄йат̣т̣хакатха̄йа

бхаддекараттасуттаван̣н̣ана̄ нит̣т̣хита̄.