1. читталата̄вима̄наван̣н̣ана̄

йатха̄ ванам̣ читталатам̣ пабха̄сатӣти читталата̄вима̄нам̣. тасса ка̄ уппатти? бхагава̄ са̄ваттхийам̣ вихарати джетаване. тена самайена са̄ваттхийам̣ ан̃н̃атаро упа̄сако далиддо аппабхого паресам̣ каммам̣ катва̄ джӣвати. со саддхо пасанно джин̣н̣е вуд̣д̣хе ма̄та̄питаро посенто ‘‘иттхийо на̄ма патикуле т̣хита̄ иссарийам̣ каронти, сассусасура̄нам̣ мана̄пача̄ринийо дуллабха̄’’ти ма̄та̄питӯнам̣ читтадуккхам̣ парихаранто да̄рапариггахам̣ акатва̄ сайамева не упат̣т̣хахати, сӣла̄ни раккхати, упосатхам̣ упавасати, йатха̄вибхавам̣ да̄на̄ни дети. со апарабха̄ге ка̄лам̣ катва̄ та̄ватим̣сесу два̄дасайоджанике вима̄не ниббатти. там̣ а̄йасма̄ маха̄моггалла̄но хет̣т̣ха̄ вуттанайена гантва̄ катакаммам̣ има̄хи га̄тха̄хи пат̣ипуччхи –

1114. ‘‘йатха̄ ванам̣ читталатам̣ пабха̄сати, уййа̄насет̣т̣хам̣ тидаса̄намуттамам̣;

татхӯпамам̣ туйхамидам̣ вима̄нам̣, обха̄сайам̣ тит̣т̣хати анталиккхе.

1115. ‘‘девиддхипаттоси маха̄нубха̄во…пе…

ван̣н̣о ча те саббадиса̄ пабха̄сатӣ’’ти.

1116. ‘‘со девапутто аттамано…пе… йасса каммассидам̣ пхалам̣’’.

1117. ‘‘ахам̣ мануссесу мануссабхӯто, далиддо ата̄н̣о капан̣о каммакаро ахосим̣;

джин̣н̣е ча ма̄та̄питаро абха̄рим̣, пийа̄ ча ме сӣлаванто ахесум̣;

аннан̃ча па̄нан̃ча пасанначитто, саккачча да̄нам̣ випулам̣ ада̄сим̣.

1118. ‘‘тена мета̄дисо ван̣н̣о…пе…ван̣н̣о ча ме саббадиса̄ пабха̄сатӣ’’ти. –

сопи тасса бйа̄ка̄си. сесам̣ вуттанайамева.

читталата̄вима̄наван̣н̣ана̄ нит̣т̣хита̄.