10. пат̣хамабхиккха̄да̄йика̄вима̄наван̣н̣ана̄

абхиккантена ван̣н̣ена̄ти бхиккха̄да̄йика̄вима̄нам̣. тасса ка̄ уппатти? бхагава̄ са̄ваттхийам̣ вихарати джетаване. тена ча самайена уттарамадхура̄йам̣ ан̃н̃атара̄ иттхӣ кхӣн̣а̄йука̄ хоти апа̄йе уппаджджана̄раха̄. бхагава̄ паччӯсавела̄йам̣ маха̄карун̣а̄сама̄паттито вут̣т̣ха̄йа локам̣ волокенто там̣ иттхим̣ апа̄йе уппаджджана̄рахам̣ дисва̄ маха̄карун̣а̄йа сан̃чодитама̄насо там̣ сугатийам̣ патит̣т̣ха̄петука̄мо еко адутийо мадхурам̣ агама̄си. гантва̄ пуббан̣хасамайам̣ нива̄сетва̄ паттачӣварам̣ а̄да̄йа бахинагарам̣ пин̣д̣а̄йа па̄виси. тена самайена са̄ иттхӣ гехе а̄ха̄рам̣ сампа̄детва̄ екаманте пат̣иса̄метва̄ гхат̣ам̣ гахетва̄ удакатиттхам̣ гантва̄ нха̄йитва̄ гхат̣ена удакам̣ гахетва̄ аттано гехам̣ гаччхантӣ антара̄магге бхагавантам̣ пасситва̄ ‘‘апи, бханте, пин̣д̣о ладдхо’’ти ватва̄ ‘‘лабхисса̄мӣ’’ти ча бхагавата̄ вутте аладдхабха̄вам̣ н̃атва̄ гхат̣ам̣ т̣хапетва̄ бхагавантам̣ упасан̇камитва̄ вандитва̄ ‘‘ахам̣, бханте, пин̣д̣апа̄там̣ дасса̄ми, адхива̄сетха̄’’ти а̄ха. адхива̄сеси бхагава̄ тун̣хӣбха̄вена. са̄ бхагавато адхива̄санам̣ видитва̄ пат̣хаматарам̣ гантва̄ ситтасаммат̣т̣хе падесе а̄санам̣ пан̃н̃а̄петва̄ бхагавато павесанам̣ удиккхама̄на̄ ат̣т̣ха̄си. бхагава̄ гехам̣ пависитва̄ пан̃н̃атте а̄сане нисӣди. атха са̄ бхагавантам̣ бходжеси. бхагава̄ катабхаттакиччо онӣтапаттапа̄н̣ӣ тасса̄ анумоданам̣ катва̄ пакка̄ми. са̄ анумоданам̣ сутва̄ анаппакам̣ пӣтисоманассам̣ пат̣исам̣ведентӣ йа̄ва чаккхупатхасаматиккама̄ буддха̄рамман̣ам̣ пӣтим̣ авиджахантӣ намассама̄на̄ ат̣т̣ха̄си. са̄ катипайадиваса̄тиккаменева ка̄лам̣ катва̄ та̄ватим̣сабхаване ниббатти, аччхара̄сахассан̃часса̄ парива̄ро ахоси. там̣ а̄йасма̄ маха̄моггалла̄но –

270. ‘‘абхиккантена ван̣н̣ена…пе… осадхӣ вийа та̄рака̄.

271. ‘‘кена тета̄дисо ван̣н̣о…пе…

ван̣н̣о ча те саббадиса̄ пабха̄сатӣ’’ти. – га̄тха̄хи пуччхи;

273. ‘‘са̄ девата̄ аттамана̄…пе… йасса каммассидам̣ пхалам̣’’.

274. ‘‘ахам̣ мануссесу мануссабхӯта̄,

пурима̄йа джа̄тийа̄ мануссалоке.

275. ‘‘аддасам̣ вираджам̣ буддхам̣, виппасаннамана̄вилам̣;

тасса ада̄сахам̣ бхиккхам̣, пасанна̄ сехи па̄н̣ибхи.

276. ‘‘тена мета̄дисо ван̣н̣о…пе…

ван̣н̣о ча ме саббадиса̄ пабха̄сатӣ’’ти. –

девата̄ бйа̄ка̄си. сесам̣ саббам̣ хет̣т̣ха̄ вуттанайатта̄ утта̄наттхамева.

пат̣хамабхиккха̄да̄йика̄вима̄наван̣н̣ана̄ нит̣т̣хита̄.