13. пат̣хамасун̣иса̄вима̄наван̣н̣ана̄

абхиккантена ван̣н̣ена̄ти сун̣иса̄вима̄нам̣. тасса ка̄ уппатти? са̄ваттхийам̣ ан̃н̃атарасмим̣ гехе ека̄ куласун̣ха̄ гехам̣ пин̣д̣а̄йа павит̣т̣хам̣ кхӣн̣а̄саваттхерам̣ дисва̄ сан̃джа̄тапӣтисоманасса̄ ‘‘идам̣ майхам̣ уттамам̣ пун̃н̃аккхеттам̣ упат̣т̣хита’’нти аттана̄ ладдхам̣ пӯвабха̄гам̣ а̄да̄йа а̄дарена тхерасса упанеси, тхеро там̣ пат̣иггахетва̄ анумоданам̣ катва̄ гато. са̄ апарабха̄ге ка̄лам̣ катва̄ та̄ватим̣сабхаване уппаджджи. сесам̣ саббам̣ хет̣т̣ха̄ вуттасадисамева. тена вуттам̣ –

108. ‘‘абхиккантена ван̣н̣ена, йа̄ твам̣ тит̣т̣хаси девате;

обха̄сентӣ диса̄ сабба̄, осадхӣ вийа та̄рака̄.

109. ‘‘кена тета̄дисо ван̣н̣о, кена те идха миджджхати;

уппаджджанти ча те бхога̄, йе кечи манасо пийа̄.

110. ‘‘пуччха̄ми там̣ деви маха̄нубха̄ве, мануссабхӯта̄ кимака̄си пун̃н̃ам̣;

кена̄си евам̣ джалита̄нубха̄ва̄, ван̣н̣о ча те саббадиса̄ пабха̄сатӣ’’ти.

111. ‘‘са̄ девата̄ аттамана̄, моггалла̄нена пуччхита̄;

пан̃хам̣ пут̣т̣ха̄ вийа̄ка̄си, йасса каммассидам̣ пхалам̣’’.

112. ‘‘ахам̣ мануссесу мануссабхӯта̄, сун̣иса̄ ахосим̣ сасурасса гехе.

113. ‘‘аддасам̣ вираджам̣ бхиккхум̣, виппасаннамана̄вилам̣;

тасса ада̄сахам̣ пӯвам̣, пасанна̄ сехи па̄н̣ибхи;

бха̄гад̣д̣хабха̄гам̣ датва̄на, мода̄ми нандане ване.

114. ‘‘тена мета̄дисо ван̣н̣о, тена ме идха миджджхати;

уппаджджанти ча ме бхога̄, йе кечи манасо пийа̄.

115. ‘‘аккха̄ми те бхиккху маха̄нубха̄ва, мануссабхӯта̄ йамака̄си пун̃н̃ам̣;

тенамхи евам̣ джалита̄нубха̄ва̄, ван̣н̣о ча ме саббадиса̄ пабха̄сатӣ’’ти.

112. таттха сун̣иса̄ти путтасса бхарийа̄. иттхийа̄ хи са̄микасса пита̄ ‘‘сасуро’’ти вуччати, тасса ча са̄ ‘‘сун̣иса̄’’ти. там̣ сандха̄йа ‘‘сун̣иса̄ ахосим̣ сасурасса гехе’’ти.

113. бха̄гад̣д̣хабха̄ганти аттана̄ ладдхапат̣ивӣсато упад̣д̣хабха̄гам̣. мода̄ми нандане ванети тхерена нанданаване дит̣т̣хата̄йа а̄ха. сесам̣ вуттанайамева.

сун̣иса̄вима̄наван̣н̣ана̄ нит̣т̣хита̄.