4. суджа̄та̄тхерӣга̄тха̄ван̣н̣ана̄

алан̇ката̄ сувасана̄тиа̄дика̄ суджа̄та̄йа тхерийа̄ га̄тха̄. айампи пуримабуддхесу ката̄дхика̄ра̄ таттха таттха бхаве виват̣т̣ӯпаниссайам̣ кусалам̣ упачинантӣ ануккамена самбхатавимоккхасамбха̄ра̄ хутва̄ имасмим̣ буддхуппа̄де са̄кетанагаре сет̣т̣хикуле ниббаттитва̄ вайаппатта̄ ма̄та̄питӯхи сама̄наджа̄тикасса сет̣т̣хипуттасса динна̄ хутва̄ патикулам̣ гата̄. таттха тена саддхим̣ сукхасам̣ва̄сам̣ васантӣ екадивасам̣ уййа̄нам̣ гантва̄ наккхаттакӣл̣ам̣ кӣл̣итва̄ париджанена саддхим̣ нагарам̣ а̄гаччхантӣ ан̃джанаване саттха̄рам̣ дисва̄ пасаннама̄наса̄ упасан̇камитва̄ вандитва̄ екамантам̣ нисӣди. саттха̄ тасса̄ анупуббим̣ катхам̣ катхетва̄ каллачиттатам̣ н̃атва̄ упари са̄муккам̣сикам̣ дхаммадесанам̣ пака̄сеси. са̄ десана̄васа̄не аттано ката̄дхика̄рата̄йа н̃а̄н̣асса парипа̄кам̣ гататта̄ ча, саттху ча десана̄вила̄сена йатха̄нисинна̄ва саха пат̣исамбхида̄хи арахаттам̣ патва̄ саттха̄рам̣ вандитва̄ гехам̣ гантва̄ са̄микан̃ча ма̄та̄питаро ча ануджа̄на̄петва̄ саттхуа̄н̣а̄йа бхиккхунупассайам̣ гантва̄ бхиккхунӣнам̣ сантике паббаджи. паббаджитва̄ ча аттано пат̣ипаттим̣ паччавеккхитва̄ уда̄навасена –

145. ‘‘алан̇ката̄ сувасана̄, ма̄линӣ чанданоккхита̄;

сабба̄бхаран̣асан̃чханна̄, да̄сӣган̣апураккхата̄.

146. ‘‘аннам̣ па̄нан̃ча а̄да̄йа, кхаджджам̣ бходжджам̣ анаппакам̣;

гехато никкхамитва̄на, уййа̄намабхиха̄райим̣.

147. ‘‘таттха рамитва̄ кӣл̣итва̄, а̄гаччхантӣ сакам̣ гхарам̣;

виха̄рам̣ дат̣т̣хум̣ па̄висим̣, са̄кете ан̃джанам̣ ванам̣.

148. ‘‘дисва̄на локападжджотам̣, вандитва̄на упа̄висим̣;

со ме дхаммамадесеси, анукампа̄йа чаккхума̄.

149. ‘‘сутва̄ ча кхо махесисса, саччам̣ сампат̣ивиджджхахам̣;

таттхева вираджам̣ дхаммам̣, пхусайим̣ аматам̣ падам̣.

150. ‘‘тато вин̃н̃а̄тасаддхамма̄, паббаджим̣ анага̄рийам̣;

тиссо виджджа̄ ануппатта̄, амогхам̣ буддхаса̄сана’’нти. –

има̄ га̄тха̄ абха̄си.

таттха алан̇ката̄ти вибхӯсита̄. там̣ пана алан̇ката̄ка̄рам̣ дассетум̣ ‘‘сувасана̄ ма̄линӣ чанданоккхита̄’’ти вуттам̣. таттха ма̄линӣти ма̄ла̄дха̄ринӣ. чанданоккхита̄ти чандана̄нулитта̄. сабба̄бхаран̣асан̃чханна̄ти хаттхӯпага̄дӣхи саббехи а̄бхаран̣ехи алан̇ка̄равасена сан̃чха̄дитасарӣра̄.

аннам̣ па̄нан̃ча а̄да̄йа, кхаджджам̣ бходжджам̣ анаппаканти са̄лиодана̄дианнам̣, амбапа̄на̄дипа̄нам̣, пит̣т̣хакха̄данӣйа̄дикхаджджам̣, авасит̣т̣хам̣ а̄ха̄расан̇кха̄там̣ бходжджан̃ча пахӯтам̣ гахетва̄. уййа̄намабхиха̄райинти наккхаттакӣл̣а̄васена уййа̄нам̣ упанесим̣. аннапа̄на̄дим̣ таттха а̄нетва̄ саха париджанена кӣл̣антӣ рамантӣ парича̄ресинти адхиппа̄йо.

са̄кете ан̃джанам̣ вананти са̄кетасамӣпе ан̃джанаване виха̄рам̣ па̄висим̣.

локападжджотанти н̃а̄н̣ападжджотена локасса паджджотабхӯтам̣.

пхусайинти пхусим̣, адхигаччхинти аттхо. сесам̣ вуттанайамева.

суджа̄та̄тхерӣга̄тха̄ван̣н̣ана̄ нит̣т̣хита̄.