15. какан̣т̣акавагго

[141] 1. годха̄джа̄такаван̣н̣ана̄

на па̄паджанасам̣севӣти идам̣ саттха̄ вел̣уване вихаранто екам̣ випаккхасевим̣ бхиккхум̣ а̄раббха катхеси. паччуппаннаваттху махил̣а̄мукхаджа̄таке катхитасадисамева.

атӣте ба̄ра̄н̣асийам̣ брахмадатте раджджам̣ ка̄ренте бодхисатто годха̄йонийам̣ пат̣исандхим̣ ган̣хи. со вайаппатто надӣтӣре маха̄биле анекагодха̄сатапарива̄ро ва̄сам̣ каппеси. тасса путто годха̄пиллако екена какан̣т̣акена саддхим̣ сантхавам̣ катва̄ тена саддхим̣ саммодама̄но вихаранто ‘‘какан̣т̣акам̣ париссаджисса̄мӣ’’ти аваттхарати. тасса тена саддхим̣ висса̄сам̣ годха̄ра̄джасса а̄рочесум̣. годха̄ра̄джа̄ путтам̣ паккоса̄петва̄ ‘‘та̄та, твам̣ ат̣т̣ха̄не висса̄сам̣ кароси, какан̣т̣ака̄ на̄ма нӣчаджа̄тика̄, техи саддхим̣ висса̄со на каттаббо. саче твам̣ тена саддхим̣ висса̄сам̣ кариссаси, там̣ какан̣т̣акам̣ нисса̄йа саббампетам̣ годха̄кулам̣ вина̄сам̣ па̄пун̣иссати, ито пат̣т̣ха̄йа етена саддхим̣ висса̄сам̣ ма̄ ака̄сӣ’’ти а̄ха. со каротийева. бодхисатто пунаппунам̣ катхентопи тасса тена саддхим̣ висса̄сам̣ ва̄ретум̣ асакконто ‘‘авассам̣ амха̄кам̣ етам̣ какан̣т̣акам̣ нисса̄йа бхайам̣ уппаджджиссати, тасмим̣ уппанне пала̄йанамаггам̣ сампа̄детум̣ ват̣т̣атӣ’’ти екена пассена ва̄табилам̣ ка̄ра̄песи.

путтописса ануккамена маха̄сарӣро ахоси, какан̣т̣ако пана пуримаппама̄н̣ойева. итаро ‘‘какан̣т̣акам̣ париссаджисса̄мӣ’’ти антарантара̄ аваттхаратийева, какан̣т̣акасса паббатакӯт̣ена аваттхаран̣ака̄ло вийа хоти. со киламанто чинтеси ‘‘саче айам̣ ан̃н̃а̄ни катипайа̄ни диваса̄ни мам̣ евам̣ париссаджиссати, джӣвитам̣ ме наттхи, екена луддакена саддхим̣ екато хутва̄ имам̣ годха̄кулам̣ вина̄сесса̄мӣ’’ти. атхекадивасам̣ нида̄гхасамайе мегхе вут̣т̣хе ваммикамаккхика̄ ут̣т̣хахим̣су, тато тато годха̄ никкхамитва̄ маккхика̄йо кха̄данти. еко годха̄луддако годха̄билам̣ бхинданаттха̄йа кудда̄лам̣ гахетва̄ сунакхехи саддхим̣ аран̃н̃ам̣ па̄виси. какан̣т̣ако там̣ дисва̄ ‘‘аджджа аттано маноратхам̣ пӯресса̄мӣ’’ти там̣ упасан̇камитва̄ авидӯре нипаджджитва̄ ‘‘бхо пуриса, касма̄ аран̃н̃е вичарасӣ’’ти пуччхи. со ‘‘годха̄нам̣ аттха̄йа̄’’ти а̄ха. ‘‘ахам̣ анекасата̄нам̣ годха̄нам̣ а̄сайам̣ джа̄на̄ми, аггин̃ча пала̄лан̃ча а̄да̄йа ехӣ’’ти там̣ таттха нетва̄ ‘‘имасмим̣ т̣ха̄не пала̄лам̣ паккхипитва̄ аггим̣ датва̄ дхӯмам̣ катва̄ саманта̄ сунакхе т̣хапетва̄ сайам̣ маха̄муггарам̣ гахетва̄ никкханта̄ никкханта̄ годха̄ пахаритва̄ ма̄ретва̄ ра̄сим̣ катва̄ йа̄хӣ’’ти еван̃ча пана ватва̄ ‘‘аджджа пачча̄миттасса пит̣т̣хим̣ пассисса̄мӣ’’ти екасмим̣ т̣ха̄не сӣсам̣ уккхипитва̄ нипаджджи. луддакопи пала̄ладхӯмам̣ ака̄си, дхӯмо билам̣ па̄виси, годха̄ дхӯмандха̄ маран̣абхайатаджджита̄ никкхамитва̄ пала̄йитум̣ а̄раддха̄. луддако никкхантам̣ никкхантам̣ пахаритва̄ ма̄реси, тасса хаттхато мутта̄ сунакха̄ ган̣хим̣су. годха̄нам̣ маха̄вина̄со уппаджджи.

бодхисатто ‘‘какан̣т̣акам̣ нисса̄йа бхайам̣ уппанна’’нти н̃атва̄ ‘‘па̄папурисасам̣сагго на̄ма на каттаббо, па̄пе нисса̄йа хитасукхам̣ на̄ма наттхи, екасса па̄пакакан̣т̣акасса васена еттака̄нам̣ годха̄нам̣ вина̄со джа̄то’’ти ва̄табилена пала̄йанто имам̣ га̄тхама̄ха –

141. ‘‘на па̄паджанасам̣севӣ, аччантасукхамедхати;

годха̄кулам̣ какан̣т̣а̄ва, калим̣ па̄пети атта̄на’’нти.

татра̄йам̣ сан̇кхепаттхо – па̄паджанасам̣севӣ пуггало аччантасукхам̣ екантасукхам̣ нирантарасукхам̣ на̄ма на едхати на виндати на пат̣илабхати. йатха̄ ким̣? годха̄кулам̣ какан̣т̣а̄ва. йатха̄ какан̣т̣акато годха̄кулам̣ сукхам̣ на лабхати, евам̣ па̄паджанасам̣севӣ пуггало сукхам̣ на лабхати. па̄паджанам̣ пана севанто екантенева калим̣ па̄пети атта̄нам̣, кали вуччати вина̄со, екантенева па̄пасевӣ атта̄нан̃ча ан̃н̃е ча аттана̄ саддхим̣ васанте вина̄сам̣ па̄пети. па̄л̣ийам̣ пана ‘‘пхалам̣ па̄пеййа̄’’ти ликханти. там̣ бйан̃джанам̣ ат̣т̣хакатха̄йам̣ наттхи, аттхописса на йуджджати. тасма̄ йатха̄вуттамева гахетаббам̣.

саттха̄ имам̣ дхаммадесанам̣ а̄харитва̄ джа̄такам̣ самодха̄неси – ‘‘тада̄ какан̣т̣ако девадатто ахоси, бодхисаттасса путто анова̄дако годха̄пиллако випаккхасевӣ бхиккху, годха̄ра̄джа̄ пана ахамева ахоси’’нти.

годха̄джа̄такаван̣н̣ана̄ пат̣хама̄.

[142] 2. син̇га̄ладжа̄такаван̣н̣ана̄

етан̃хи те дура̄джа̄нанти идам̣ саттха̄ вел̣уване вихаранто девадаттасса вадха̄йа парисакканам̣ а̄раббха катхеси. дхаммасабха̄йан̃хи бхиккхӯнам̣ катхам̣ сутва̄ саттха̄ ‘‘на, бхиккхаве, девадатто ида̄нева майхам̣ вадха̄йа парисаккати, пуббепи парисаккийева, на ча мам̣ ма̄ретум̣ асаккхи, сайамева пана киланто’’ти ватва̄ атӣтам̣ а̄хари.

атӣте ба̄ра̄н̣асийам̣ брахмадатте раджджам̣ ка̄ренте бодхисатто син̇га̄лайонийам̣ ниббаттитва̄ син̇га̄лара̄джа̄ хутва̄ син̇га̄лаган̣апаривуто суса̄наване виха̄си. тена самайена ра̄джагахе уссаво ахоси, йебхуййена манусса̄ сурам̣ пиванти, сура̄чхан̣ойева киресо. атхеттха самбахула̄ дхутта̄ бахум̣ суран̃ча мам̣сан̃ча а̄хара̄петва̄ ман̣д̣итапаса̄дхита̄ га̄йитва̄ га̄йитва̄ суран̃ча пиванти, мам̣сан̃ча кха̄данти. тесам̣ пат̣хамайа̄ма̄васа̄не мам̣сам̣ кхӣйи, сура̄ пана бахука̄ва. атхеко дхутто ‘‘мам̣сакхан̣д̣ам̣ дехӣ’’ти а̄ха. ‘‘мам̣сам̣ кхӣн̣а’’нти ча вутте ‘‘майи т̣хите мам̣саккхайо на̄ма наттхӣ’’ти ватва̄ ‘‘а̄макасуса̄не матамануссамам̣сам̣ кха̄данаттха̄йа а̄гате син̇га̄ле ма̄ретва̄ мам̣сам̣ а̄харисса̄мӣ’’ти муггарам̣ гахетва̄ ниддхаманамаггена нагара̄ никкхамитва̄ суса̄нам̣ гантва̄ муггарам̣ гахетва̄ матако вийа утта̄но нипаджджи. тасмим̣ кхан̣е бодхисатто син̇га̄лаган̣апаривуто таттха гато там̣ дисва̄ ‘‘на̄йам̣ матако’’ти н̃атва̄пи ‘‘сут̣т̣хутарам̣ упапариккхисса̄мӣ’’ти тасса адхова̄тена гантва̄ сарӣрагандхам̣ гха̄йитва̄ татхатовасса аматакабха̄вам̣ н̃атва̄ ‘‘ладжджа̄петва̄ нам̣ уййоджесса̄мӣ’’ти гантва̄ муггаракот̣ийам̣ д̣ам̣ситва̄ а̄кад̣д̣хи, дхутто муггарам̣ на виссаджи, упасан̇камантампи на олокенто нам̣ га̄л̣хатарам̣ аггахеси. бодхисатто пат̣иккамитва̄ ‘‘бхо пуриса, саче твам̣ матако бхавеййа̄си, на майи муггарам̣ а̄кад̣д̣ханте га̄л̣хатарам̣ ган̣хеййа̄си, имина̄ ка̄ран̣ена тава матакабха̄во ва̄ аматакабха̄во ва̄ дуджджа̄но’’ти ватва̄ имам̣ га̄тхама̄ха –

142. ‘‘етан̃хи те дура̄джа̄нам̣, йам̣ сеси матаса̄йикам̣;

йасса те кад̣д̣хама̄насса, хаттха̄ дан̣д̣о на муччатӣ’’ти.

таттха етан̃хи те дура̄джа̄нанти етам̣ ка̄ран̣ам̣ тава дувин̃н̃еййам̣. йам̣ сеси матаса̄йиканти йена ка̄ран̣ена твам̣ матаса̄йикам̣ сеси, матако вийа хутва̄ сайаси. йасса те кад̣д̣хама̄насса̄ти йасса тава дан̣д̣акот̣ийам̣ гахетва̄ кад̣д̣хийама̄насса хаттхато дан̣д̣о на муччати, со твам̣ татхато матако на̄ма на хосӣти.

евам̣ вутте со дхутто ‘‘айам̣ мама аматакабха̄вам̣ джа̄на̄тӣ’’ти ут̣т̣ха̄йа дан̣д̣ам̣ кхипи, дан̣д̣о вираджджхи. дхутто ‘‘гаччха, вираддхо да̄ниси майа̄’’ти а̄ха. бодхисатто ниваттитва̄ ‘‘бхо пуриса, мам̣ вираджджхантопи твам̣ ат̣т̣ха маха̄нирайе сол̣аса ча уссаданирайе авираддхойева̄’’ти ватва̄ пакка̄ми. дхутто кин̃чи алабхитва̄ суса̄на̄ никкхамитва̄ парикха̄йам̣ нха̄йитва̄ а̄гатамаггенева нагарам̣ па̄виси.

саттха̄ имам̣ дхаммадесанам̣ а̄харитва̄ джа̄такам̣ самодха̄неси – ‘‘тада̄ дхутто девадатто ахоси, син̇га̄лара̄джа̄ пана ахамева ахоси’’нти.

син̇га̄ладжа̄такаван̣н̣ана̄ дутийа̄.

[143] 3. вирочаджа̄такаван̣н̣ана̄

ласӣ ча те ниппхалита̄ти идам̣ саттха̄ вел̣уване вихаранто девадаттасса гайа̄сӣсе сугата̄лайасса дасситабха̄вам̣ а̄раббха катхеси. девадатто хи парихӣнаджджха̄но ла̄бхасакка̄рапарихӣно ‘‘аттхеко упа̄йо’’ти чинтетва̄ саттха̄рам̣ пан̃ча ваттхӯни йа̄читва̄ алабхама̄но двиннам̣ аггаса̄вака̄нам̣ саддхивиха̄рике адхуна̄ паббаджите дхаммавинайамхи аковиде пан̃часате бхиккхӯ гахетва̄ гайа̄сӣсам̣ гантва̄ сан̇гхам̣ бхиндитва̄ екасӣма̄йам̣ а̄вен̣икам̣ сан̇гхакаммам̣ ака̄си. саттха̄ тесам̣ бхиккхӯнам̣ н̃а̄н̣апарипа̄кака̄лам̣ н̃атва̄ две аггаса̄ваке песеси. те дисва̄ девадатто тут̣т̣хама̄насо раттим̣ дхаммам̣ десайама̄но ‘‘буддхалӣлам̣ карисса̄мӣ’’ти сугата̄лайам̣ дассенто ‘‘вигататхинамиддхо кхо, а̄вусо са̄рипутта, бхиккхусан̇гхо, пат̣ибха̄ту там̣ бхиккхӯнам̣ дхаммӣкатха̄, пит̣т̣хи ме а̄гила̄йати, тамахам̣ а̄йамисса̄мӣ’’ти ватва̄ ниддам̣ упагато. две аггаса̄вака̄ тесам̣ бхиккхӯнам̣ дхаммам̣ десетва̄ маггапхалехи пабодхетва̄ саббе а̄да̄йа вел̣уванамева пачча̄гамим̣су.

кока̄лико виха̄рам̣ туччхам̣ дисва̄ девадаттасса сантикам̣ гантва̄ ‘‘а̄вусо девадатта, парисам̣ те бхиндитва̄ две аггаса̄вака̄ виха̄рам̣ туччхам̣ катва̄ гата̄, твам̣ пана нидда̄йасийева̄’’ти ватва̄ уттара̄сан̇гамасса апанетва̄ бхиттийам̣ пит̣т̣хикан̣т̣акам̣ пхусанто вийа пан̣хийа̄ нам̣ хадайе пахари. та̄вадевасса мукхато лохитам̣ угган̃чхи. со тато пат̣т̣ха̄йа гила̄но ахоси. саттха̄ тхерам̣ пуччхи ‘‘са̄рипутта, тумха̄кам̣ гатака̄ле девадатто ким̣ ака̄сӣ’’ти? бханте, девадатто амхе дисва̄ ‘‘буддхалӣлам̣ карисса̄мӣ’’ти сугата̄лайам̣ дассетва̄ маха̄вина̄сам̣ паттоти. саттха̄ ‘‘на кхо са̄рипутта, девадатто ида̄нева мама анукаронто вина̄сам̣ патто, пуббепи паттойева̄’’ти ватва̄ тхерена йа̄чито атӣтам̣ а̄хари.

атӣте ба̄ра̄н̣асийам̣ брахмадатте раджджам̣ ка̄ренте бодхисатто кесарасӣхо хутва̄ химавантаппадесе кан̃чанагуха̄йам̣ ва̄сам̣ каппеси. со екадивасам̣ кан̃чанагуха̄йа никкхамитва̄ виджамбхитва̄ чатуддисам̣ олокетва̄ сӣхана̄дам̣ надитва̄ гочара̄йа пакканто маха̄махим̣сам̣ вадхитва̄ варамам̣сам̣ кха̄дитва̄ екам̣ сарам̣ отаритва̄ ман̣иван̣н̣асса удакасса куччхим̣ пӯретва̄ гухам̣ сандха̄йа па̄йа̄си. атхеко син̇га̄ло гочараппасуто сахаса̄ва сӣхам̣ дисва̄ пала̄йитум̣ асакконто сӣхасса пурато па̄десу патитва̄ нипаджджи. ‘‘ким̣, джамбука̄’’ти ча вутте ‘‘ахам̣ те, са̄ми, па̄де упат̣т̣ха̄тука̄мо’’ти а̄ха. сӣхо ‘‘са̄дху ехи, мам̣ упат̣т̣хаха, варамам̣са̄ни там̣ кха̄да̄песса̄мӣ’’ти ватва̄ син̇га̄лам̣ а̄да̄йа кан̃чанагухам̣ агама̄си. син̇га̄ло тато пат̣т̣ха̄йа сӣхавигха̄сам̣ кха̄дати. со катипа̄хаччайенева тхӯласарӣро ахоси.

атха нам̣ екадивасам̣ гуха̄йа нипаннакова сӣхо а̄ха ‘‘гаччха джамбука, паббатасикхаре т̣хатва̄ паббатапа̄де сан̃чарантесу хаттхиассамахим̣са̄дӣсу йасса мам̣сам̣ кха̄дитука̄моси, там̣ олокетва̄ а̄гантва̄ ‘асукамам̣сам̣ кха̄дитука̄момхӣ’ти ватва̄ мам̣ вандитва̄ ‘вироча, са̄мӣ’ти вада̄хи, ахам̣ там̣ вадхитва̄ мадхурамам̣сам̣ кха̄дитва̄ туйхампи дасса̄мӣ’’ти. син̇га̄ло паббатасикхарам̣ абхирухитва̄ на̄наппака̄ре миге олокетва̄ йассева мам̣сам̣ кха̄дитука̄мо хоти, кан̃чанагухам̣ пависитва̄ тамева сӣхасса а̄рочетва̄ па̄десу патитва̄ ‘‘вироча, са̄мӣ’’ти вадати. сӣхо вегена паккхандитва̄ сачепи маттаварава̄ран̣о хоти, таттхева нам̣ джӣвитаккхайам̣ па̄петва̄ сайампи варамам̣сам̣ кха̄дати, син̇га̄лассапи дети. син̇га̄ло куччхипӯрам̣ мам̣сам̣ кха̄дитва̄ гухам̣ пависитва̄ нидда̄йати. со гаччханте гаччханте ка̄ле ма̄нам̣ вад̣д̣хеси ‘‘ахампи чатуппадова, ким̣ка̄ран̣а̄ дивасе дивасе парехи посийама̄но вихара̄ми, ито пат̣т̣ха̄йа ахампи хаттхиа̄дайо ханитва̄ мам̣сам̣ кха̄дисса̄ми, сӣхопи мигара̄джа̄ ‘вироча, са̄мӣ’ти вуттамева падам̣ нисса̄йа варава̄ран̣е вадхети, ахампи сӣхена ‘вироча, джамбука̄’ти мам̣ вада̄петва̄ екам̣ варава̄ран̣ам̣ вадхитва̄ мам̣сам̣ кха̄дисса̄мӣ’’ти.

со сӣхам̣ упасан̇камитва̄ етадавоча ‘‘са̄ми, майа̄ дӣгхараттам̣ тумхехи вадхитаварава̄ран̣а̄нам̣ мам̣сам̣ кха̄дитам̣, ахампи екам̣ варава̄ран̣ам̣ ма̄ретва̄ мам̣сам̣ кха̄дитука̄мо, тасма̄ тумхехи нипаннат̣т̣ха̄не кан̃чанагуха̄йам̣ нипаджджисса̄ми, тумхе паббатапа̄де вичарантам̣ варава̄ран̣ам̣ олокетва̄ мама сантикам̣ а̄гантва̄ ‘вироча, джамбука̄’ти вадетха, еттакаматтасмим̣ маччхерам̣ ма̄ кариттха̄’’ти. атха нам̣ сӣхо а̄ха ‘‘на, твам̣ джамбука, ва̄ран̣е вадхитум̣ саматтхе сӣхакуле уппанно, ва̄ран̣ам̣ вадхитва̄ мам̣сам̣ кха̄данасаматтхо син̇га̄ло на̄ма локе наттхи, ма̄ те етам̣ руччи, майа̄ вадхитаварава̄ран̣а̄нан̃н̃ева мам̣сам̣ кха̄дитва̄ васа̄’’ти. со евам̣ вуттепи вирамитум̣ на иччхи, пунаппунам̣ йа̄чийева. сӣхо там̣ ва̄ретум̣ асакконто сампат̣иччхитва̄ ‘‘тена хи мама васанат̣т̣ха̄нам̣ пависитва̄ нипаджджа̄’’ти джамбукам̣ кан̃чанагуха̄йам̣ нипаджджа̄петва̄ сайам̣ паббатапа̄де маттаварава̄ран̣ам̣ олокетва̄ гуха̄два̄рам̣ гантва̄ ‘‘вироча, джамбука̄’’ти а̄ха. син̇га̄ло кан̃чанагуха̄йа никкхамитва̄ виджамбхитва̄ чатуддисам̣ олокетва̄ тиккхаттум̣ васситва̄ ‘‘маттаварава̄ран̣асса кумбхе патисса̄мӣ’’ти паккхандитва̄ вираджджхитва̄ па̄дамӯле пати. ва̄ран̣о даккхин̣апа̄дам̣ уккхипитва̄ тасса сӣсам̣ акками, сӣсат̣т̣хӣни чун̣н̣авичун̣н̣а̄ни ахесум̣. атхасса сарӣрам̣ ва̄ран̣о па̄дена сан̇гхаритва̄ ра̄сим̣ катва̄ упари лан̣д̣ам̣ па̄тетва̄ кон̃чана̄дам̣ наданто аран̃н̃ам̣ па̄виси.

бодхисатто имам̣ паваттим̣ дисва̄ ‘‘ида̄ни вироча, джамбука̄’’ти ватва̄ имам̣ га̄тхама̄ха –

143. ‘‘ласӣ ча те ниппхалита̄, маттхако ча пада̄лито;

сабба̄ те пха̄сука̄ бхагга̄, аджджа кхо твам̣ вирочасӣ’’ти.

таттха ласӣти маттхалун̇гам̣. ниппхалита̄ти никкханта̄. евам̣ бодхисатто имам̣ га̄тхам̣ ватва̄ йа̄вата̄йукам̣ т̣хатва̄ йатха̄каммам̣ гато.

саттха̄ имам̣ дхаммадесанам̣ а̄харитва̄ джа̄такам̣ самодха̄неси – ‘‘тада̄ син̇га̄ло девадатто ахоси, сӣхо пана ахамева ахоси’’нти.

вирочаджа̄такаван̣н̣ана̄ татийа̄.

[144] 4. нан̇гут̣т̣хаджа̄такаван̣н̣ана̄

бахумпетам̣ асаббхи джа̄таведа̄ти идам̣ саттха̄ джетаване вихаранто а̄джӣвака̄нам̣ миччха̄тапам̣ а̄раббха катхеси. тада̄ кира а̄джӣвака̄ джетаванапит̣т̣хийам̣ на̄наппака̄рам̣ миччха̄тапам̣ чаранти. самбахула̄ бхиккхӯ тесам̣ уккут̣икаппадха̄наваггуливатакан̣т̣ака̄пассайапан̃ча̄тапатапана̄дибхедам̣ миччха̄тапам̣ дисва̄ бхагавантам̣ пуччхим̣су ‘‘аттхи ну кхо, бханте, имам̣ миччха̄тапам̣ нисса̄йа кусалам̣ ва̄ вуд̣д̣хи ва̄’’ти. саттха̄ ‘‘на, бхиккхаве, еварӯпам̣ миччха̄тапам̣ нисса̄йа кусалам̣ ва̄ вуд̣д̣хи ва̄ аттхи, пуббе пан̣д̣ита̄ ‘еварӯпам̣ тапам̣ нисса̄йа кусалам̣ ва̄ вуд̣д̣хи ва̄ бхависсатӣ’ти сан̃н̃а̄йа джа̄таггим̣ гахетва̄ аран̃н̃ам̣ пависитва̄ аггиджухана̄дивасена кин̃чи вуд̣д̣хим̣ апассанта̄ аггим̣ удакена нибба̄петва̄ касин̣апарикаммам̣ катва̄ абхин̃н̃а̄ ча сама̄паттийо ча ниббаттетва̄ брахмалокапара̄йан̣а̄ ахесу’’нти ватва̄ атӣтам̣ а̄хари.

атӣте ба̄ра̄н̣асийам̣ брахмадатте раджджам̣ ка̄ренте бодхисатто удиччабра̄хман̣акуле ниббатти. тасса джа̄тадивасе ма̄та̄питаро джа̄таггим̣ гахетва̄ т̣хапесум̣. атха нам̣ сол̣асавассака̄ле етадавочум̣ ‘‘майам̣ те, путта, джа̄тадивасе аггим̣ ган̣химха. сачеси ага̄рам̣ аджджха̄васитука̄мо, тайо веде угган̣ха. атха брахмалокам̣ гантука̄мо, аггим̣ гахетва̄ аран̃н̃ам̣ пависитва̄ аггим̣ паричаранто маха̄брахма̄нам̣ а̄ра̄дхетва̄ брахмалокапара̄йан̣о хохӣ’’ти. со ‘‘на майхам̣ ага̄рена аттхо’’ти аггим̣ гахетва̄ аран̃н̃ам̣ пависитва̄ ассамападам̣ ма̄петва̄ аггим̣ паричаранто аран̃н̃е виха̄си. со екадивасам̣ паччантага̄маке годаккхин̣ам̣ лабхитва̄ там̣ гон̣ам̣ ассамападам̣ нетва̄ чинтеси ‘‘аггибхагавантам̣ гомам̣сам̣ кха̄да̄песса̄мӣ’’ти. атхасса етадахоси ‘‘идха лон̣ам̣ наттхи, аггибхагава̄ алон̣ам̣ кха̄дитум̣ на саккхиссати, га̄мато лон̣ам̣ а̄харитва̄ аггибхагавантам̣ салон̣акам̣ кха̄да̄песса̄мӣ’’ти. со там̣ таттхева бандхитва̄ лон̣аттха̄йа га̄макам̣ агама̄си. тасмим̣ гате самбахула̄ луддака̄ там̣ т̣ха̄нам̣ а̄гата̄. гон̣ам̣ дисва̄ вадхитва̄ мам̣сам̣ пачитва̄ кха̄дитва̄ нан̇гут̣т̣хан̃ча джан̇гхан̃ча чамман̃ча таттхева чхад̣д̣етва̄ авасесамам̣сам̣ а̄да̄йа агамам̣су.

бра̄хман̣о а̄гантва̄ нан̇гут̣т̣ха̄диматтамева дисва̄ чинтеси ‘‘айам̣ аггибхагава̄ аттано сантакампи раккхитум̣ на саккоти, мам̣ пана када̄ раккхиссати. имина̄ аггипаричаран̣ена нираттхакена бхавитаббам̣, наттхи итонида̄нам̣ кусалам̣ ва̄ вуд̣д̣хи ва̄’’ти. со аггипаричарийа̄йа вигатаччхандо ‘‘хамбхо аггибхагава̄, твам̣ аттанопи сантакам̣ раккхитум̣ асакконто мам̣ када̄ раккхиссаси, мам̣сам̣ наттхи, еттакенапи тусса̄хӣ’’ти нан̇гут̣т̣ха̄дӣни аггимхи паккхипанто имам̣ га̄тхама̄ха –

144. ‘‘бахумпетам̣ асаббхи джа̄таведа, йам̣ там̣ ва̄ладхина̄бхипӯджайа̄ма;

мам̣са̄рахасса наттхаджджа мам̣сам̣, нан̇гут̣т̣хампи бхавам̣ пат̣иггаха̄тӯ’’ти.

таттха бахумпетанти еттакампи бахум̣. асаббхӣти асаппуриса аса̄дхуджа̄тика. джа̄таведа̄ти аггим̣ а̄лапати. агги хи джа̄таматтова ведийати пан̃н̃а̄йати па̄кат̣о хоти, тасма̄ ‘‘джа̄таведо’’ти вуччати. йам̣ там̣ ва̄ладхина̄бхипӯджайа̄ма̄ти йам̣ аджджа майам̣ аттанопи сантакам̣ раккхитум̣ асаматтхам̣ бхагавантам̣ ва̄ладхина̄ абхипӯджайа̄ма, етампи тава бахумева̄ти дассети. мам̣са̄рахасса̄ти мам̣сам̣ арахасса туйхам̣ наттхи аджджа мам̣сам̣. нан̇гут̣т̣хампи бхавам̣ пат̣иггаха̄тӯти аттано сантакам̣ раккхитум̣ асакконто бхавам̣ имам̣ саджан̇гхачаммам̣ нан̇гут̣т̣хампи пат̣игган̣ха̄тӯти.

евам̣ ватва̄ маха̄сатто аггим̣ удакена нибба̄петва̄ исипаббаджджам̣ паббаджитва̄ абхин̃н̃а̄ ча сама̄паттийо ча ниббаттетва̄ брахмалокапара̄йан̣о ахоси.

саттха̄ имам̣ дхаммадесанам̣ а̄харитва̄ джа̄такам̣ самодха̄неси – ‘‘ниббутаггита̄пасо ахамева тена самайена̄’’ти.

нан̇гут̣т̣хаджа̄такаван̣н̣ана̄ чатуттха̄.

[145] 5. ра̄дхаджа̄такаван̣н̣ана̄

на твам̣ ра̄дха виджа̄на̄сӣти идам̣ саттха̄ джетаване вихаранто пура̄н̣адутийика̄палобханам̣ а̄раббха катхеси. паччуппаннаваттху индрийаджа̄таке а̄ви бхависсати. саттха̄ пана там̣ бхиккхум̣ а̄мантетва̄ ‘‘бхиккху ма̄туга̄мо на̄ма араккхийо, а̄раккхам̣ т̣хапетва̄ раккханта̄пи раккхитум̣ на сакконти. твампи пуббе етам̣ а̄раккхам̣ т̣хапетва̄ раккхантопи раккхитум̣ на̄саккхи, ида̄ни катхам̣ раккхиссасӣ’’ти ватва̄ атӣтам̣ а̄хари.

атӣте ба̄ра̄н̣асийам̣ брахмадатте раджджам̣ ка̄ренте бодхисатто сукайонийам̣ ниббатти. ка̄сират̣т̣хе еко бра̄хман̣о бодхисаттан̃ча канит̣т̣хабха̄таран̃часса путтат̣т̣ха̄не т̣хапетва̄ посеси. тесу бодхисаттасса ‘‘пот̣т̣хапа̄до’’ти на̄мам̣ ахоси, итарасса ‘‘ра̄дхо’’ти. тасса пана бра̄хман̣асса бхарийа̄ ана̄ча̄ра̄ хоти дуссӣла̄. со воха̄раттха̄йа гаччханто убхопи бха̄таро а̄ха – ‘‘та̄та̄, саче во ма̄та̄ бра̄хман̣ӣ ана̄ча̄рам̣ а̄чарати, ва̄реййа̄тха на’’нти. бодхисатто а̄ха ‘‘са̄дху, та̄та, ва̄ретум̣ сакконта̄ ва̄реййа̄ма, асакконта̄ тун̣хӣ бхависса̄ма̄’’ти. евам̣ бра̄хман̣о бра̄хман̣им̣ сука̄нам̣ ниййа̄детва̄ воха̄раттха̄йа гато.

тасса пана гатадивасато пат̣т̣ха̄йа бра̄хман̣ӣ атичаритум̣ а̄раддха̄, пависанта̄нан̃ча никкхаманта̄нан̃ча анто наттхи, тасса̄ кирийам̣ дисва̄ ра̄дхо бодхисаттам̣ а̄ха – ‘‘бха̄тика, амха̄кам̣ пита̄ ‘саче во ма̄та̄ ана̄ча̄рам̣ а̄чарати, ва̄реййа̄тха̄’ти ватва̄ гато, ида̄ни чеса̄ ана̄ча̄рам̣ а̄чарати, ва̄рема на’’нти. бодхисатто ‘‘та̄та, твам̣ аттано абйаттата̄йа ба̄лабха̄вена евам̣ вадеси, ма̄туга̄мам̣ на̄ма уккхипитва̄ чаранта̄пи раккхитум̣ на сакконти. йам̣ каммам̣ ка̄тум̣ на сакка̄, на там̣ ка̄тум̣ ват̣т̣атӣ’’ти ватва̄ имам̣ га̄тхама̄ха –

145. ‘‘на твам̣ ра̄дха виджа̄на̄си, ад̣д̣харатте ана̄гате;

абйайатам̣ вилапаси, виратта̄ косийа̄йане’’ти.

таттха на твам̣ ра̄дха виджа̄на̄си, ад̣д̣харатте ана̄гатети та̄та ра̄дха, твам̣ на джа̄на̄си, ад̣д̣харатте ана̄гате пат̣хамайа̄мейева еттака̄ джана̄ а̄гата̄, ида̄ни ко джа̄на̄ти, киттака̄пи а̄гамиссанти. абйайатам̣ вилапасӣти твам̣ абйаттавила̄пам̣ вилапаси. виратта̄ косийа̄йанети ма̄та̄ но косийа̄йанӣ бра̄хман̣ӣ виратта̄ амха̄кам̣ питари ниппема̄ джа̄та̄. сачасса̄ тасмим̣ синехо ва̄ пемам̣ ва̄ бхавеййа, на еварӯпам̣ ана̄ча̄рам̣ кареййа̄ти имаматтхам̣ етехи бйан̃джанехи пака̄сеси.

евам̣ пака̄сетва̄ ча пана бра̄хман̣ийа̄ саддхим̣ ра̄дхасса ваттум̣ на ада̄си. са̄пи йа̄ва бра̄хман̣асса ана̄гамана̄ йатха̄ручийа̄ вичари. бра̄хман̣о а̄гантва̄ пот̣т̣хапа̄дам̣ пуччхи – ‘‘та̄та, кӣдисӣ во ма̄та̄’’ти. бодхисатто бра̄хман̣асса саббам̣ йатха̄бхӯтам̣ катхетва̄ ‘‘ким̣ те, та̄та, еварӯпа̄йа дуссӣла̄йа̄’’ти ватва̄ ‘‘та̄та, амхехи ма̄туйа̄ досасса катхитака̄лато пат̣т̣ха̄йа на сакка̄ идха васиту’’нти бра̄хман̣асса па̄де вандитва̄ саддхим̣ ра̄дхена уппатитва̄ аран̃н̃ам̣ агама̄си.

саттха̄ имам̣ дхаммадесанам̣ а̄харитва̄ сачча̄ни пака̄сеси, саччапарийоса̄не уккан̣т̣хитабхиккху сота̄паттипхале патит̣т̣хахи. ‘‘тада̄ бра̄хман̣о ча бра̄хман̣ӣ ча етейева две джана̄ ахесум̣, ра̄дхо а̄нандо, пот̣т̣хапа̄до пана ахамева ахоси’’нти.

ра̄дхаджа̄такаван̣н̣ана̄ пан̃чама̄.

[146] 6. самуддака̄каджа̄такаван̣н̣ана̄

апи ну ханука̄ санта̄ти идам̣ саттха̄ джетаване вихаранто самбахуле махаллаке бхиккхӯ а̄раббха катхеси. те кира гихика̄ле са̄ваттхийам̣ кут̣умбика̄ ад̣д̣ха̄ махаддхана̄ ан̃н̃аман̃н̃асаха̄йака̄ екато хутва̄ пун̃н̃а̄ни каронта̄ саттху дхаммадесанам̣ сутва̄ ‘‘майам̣ махаллака̄, ким̣ но гхара̄ва̄сена, саттху сантике раман̣ӣйе буддхаса̄сане паббаджитва̄ дуккхассантам̣ карисса̄ма̄’’ти саббам̣ са̄патеййам̣ путтадхӣта̄дӣнам̣ датва̄ ассумукхам̣ н̃а̄тисан̇гхам̣ паха̄йа саттха̄рам̣ паббаджджам̣ йа̄читва̄ паббаджим̣су. паббаджитва̄ пана паббаджджа̄нурӯпам̣ саман̣адхаммам̣ на карим̣су, махаллакабха̄вена дхаммампи на парийа̄пун̣им̣су, гихика̄ле вийа паббаджитака̄лепи виха̄рапарийанте пан̣н̣аса̄лам̣ ка̄ретва̄ екатова васим̣су. пин̣д̣а̄йа чаранта̄пи ан̃н̃аттха агантва̄ йебхуййена аттано путтада̄рассева гехам̣ гантва̄ бхун̃джим̣су. тесу екасса пура̄н̣адутийика̄ саббесампи махаллакаттхера̄нам̣ упака̄ра̄ ахоси, тасма̄ сеса̄пи аттана̄ ладдхам̣ а̄ха̄рам̣ гахетва̄ тасса̄йева гехе нисӣдитва̄ бхун̃джанти. са̄пи тесам̣ йатха̄саннихитам̣ сӯпабйан̃джанам̣ дети. са̄ ан̃н̃атарена рогена пхут̣т̣ха̄ ка̄ламака̄си. атха те махаллакаттхера̄ виха̄рам̣ гантва̄ ан̃н̃аман̃н̃ам̣ гӣва̄су гахетва̄ ‘‘мадхурахаттхараса̄ упа̄сика̄ ка̄лаката̄’’ти виха̄рапаччанте роданта̄ вичарим̣су. тесам̣ саддам̣ сутва̄ ито чито ча бхиккхӯ саннипатитва̄ ‘‘а̄вусо, касма̄ родатха̄’’ти пуччхим̣су. те ‘‘амха̄кам̣ саха̄йасса пура̄н̣адутийика̄ мадхурахаттхараса̄ ка̄лаката̄ амха̄кам̣ ативийа упака̄ра̄, ‘ида̄ни куто татха̄рӯпим̣ лабхисса̄ма̄’ти имина̄ ка̄ран̣ена родимха̄’’ти а̄хам̣су.

тесам̣ там̣ виппака̄рам̣ дисва̄ бхиккхӯ дхаммасабха̄йам̣ катхам̣ самут̣т̣ха̄песум̣ ‘‘а̄вусо, имина̄ на̄ма ка̄ран̣ена махаллакаттхера̄ ан̃н̃аман̃н̃ам̣ гӣва̄су гахетва̄ виха̄рапаччанте роданта̄ вичарантӣ’’ти. саттха̄ а̄гантва̄ ‘‘ка̄йа нуттха, бхиккхаве, етарахи катха̄йа саннисинна̄’’ти пуччхитва̄ ‘‘има̄йа на̄ма̄’’ти вутте ‘‘на, бхиккхаве, ида̄невете тасса̄ ка̄лакирийа̄йа роданта̄ вичаранти, пуббепете имам̣ ка̄кайонийам̣ ниббаттитва̄ самудде матам̣ нисса̄йа ‘самуддаудакам̣ уссин̃читва̄ етам̣ нӣхарисса̄ма̄’ти ва̄йаманта̄ пан̣д̣ите нисса̄йа джӣвитам̣ лабхим̣сӯ’’ти ватва̄ атӣтам̣ а̄хари.

атӣте ба̄ра̄н̣асийам̣ брахмадатте раджджам̣ ка̄ренте бодхисатто самуддадевата̄ хутва̄ ниббатти. атхеко ка̄ко аттано бхарийам̣ ка̄ким̣ а̄да̄йа гочарам̣ парийесама̄но самуддатӣрам̣ агама̄си. тасмим̣ ка̄ле манусса̄ самуддатӣре кхӣрапа̄йа̄самаччхамам̣сасура̄дӣхи на̄габаликаммам̣ катва̄ паккамим̣су. атха со ка̄ко баликаммат̣т̣ха̄нам̣ гантва̄ кхӣра̄дӣни дисва̄ саддхим̣ ка̄кийа̄ кхӣрапа̄йа̄самаччхамам̣са̄дӣни бхун̃джитва̄ бахум̣ сурам̣ пиви. те убхопи сура̄мадаматта̄ ‘‘самуддакӣл̣ам̣ кӣл̣исса̄ма̄’’ти веланте нисӣдитва̄ нха̄йитум̣ а̄рабхим̣су атхека̄ ӯми а̄гантва̄ ка̄ким̣ гахетва̄ самуддам̣ павесеси. тамеко маччхо мам̣сам̣ кха̄дитва̄ аджджхохари. ка̄ко ‘‘бхарийа̄ ме мата̄’’ти роди паридеви. атхасса паридеванасаддам̣ сутва̄ бахӯ ка̄ка̄ саннипатитва̄ ‘‘ким̣ка̄ран̣а̄ родасӣ’’ти пуччхим̣су. ‘‘саха̄йика̄ во веланте нха̄йама̄на̄ ӯмийа̄ хат̣а̄’’ти. те саббепи екаравам̣ раванта̄ родим̣су. атха несам̣ етадахоси ‘‘идам̣ самуддаудакам̣ на̄ма амха̄кам̣ ким̣ пахоси, удакам̣ уссин̃читва̄ самуддам̣ туччхам̣ катва̄ саха̄йикам̣ нӣхарисса̄ма̄’’ти. те мукхам̣ пӯретва̄ пӯретва̄ удакам̣ бахи чхад̣д̣енти, лон̣ӯдакена ча гале суссама̄не ут̣т̣ха̄йут̣т̣ха̄йа тхалам̣ гантва̄ виссаманти.

те ханӯсу килантесу мукхесу суккхантесу аккхӣсу раттесу дӣна̄ киланта̄ хутва̄ ан̃н̃аман̃н̃ам̣ а̄мантетва̄ ‘‘амбхо, майам̣ самуддаудакам̣ гахетва̄ бахи па̄тема, гахитагахитат̣т̣ха̄нам̣ пуна удакена пӯрати, самуддам̣ туччхам̣ ка̄тум̣ на саккхисса̄ма̄’’ти ватва̄ имам̣ га̄тхама̄хам̣су –

146. ‘‘апи ну ханука̄ санта̄, мукхан̃ча парисуссати;

орама̄ма на па̄рема, пӯратева маходадхӣ’’ти.

таттха апи ну ханука̄ санта̄ти апи но ханука̄ санта̄, апи амха̄кам̣ ханука̄ киланта̄. орама̄ма на па̄рема̄ти майам̣ аттано балена маха̄самуддаудакам̣ а̄кад̣д̣ха̄ма оса̄рема, туччхам̣ пана нам̣ ка̄тум̣ на саккома. айан̃хи пӯратева маходадхӣти.

еван̃ча пана ватва̄ саббепи те ка̄ка̄ ‘‘тасса̄ ка̄кийа̄ еварӯпам̣ на̄ма тун̣д̣ам̣ ахоси, еварӯпа̄ни ват̣т̣аккхӣни, еварӯпам̣ чхависан̣т̣ха̄нам̣, еварӯпо мадхурасаддо. са̄ но имам̣ чорасамуддам̣ нисса̄йа нат̣т̣ха̄’’ти бахум̣ виппалапим̣су. те евам̣ виппалапама̄не самуддадевата̄ бхераварӯпам̣ дассетва̄ пала̄песи, евам̣ тесам̣ соттхи ахоси.

саттха̄ имам̣ дхаммадесанам̣ а̄харитва̄ джа̄такам̣ самодха̄неси – ‘‘тада̄ ка̄кӣ айам̣ пура̄н̣адутийика̄ ахоси, ка̄ко махаллакаттхеро, сесака̄ка̄ сесамахаллакаттхера̄, самуддадевата̄ пана ахамева ахоси’’нти.

самуддака̄каджа̄такаван̣н̣ана̄ чхат̣т̣ха̄.

[147] 7. пуппхараттаджа̄такаван̣н̣ана̄

найидам̣ дуккхам̣ адум̣ дуккханти идам̣ саттха̄ джетаване вихаранто екам̣ уккан̣т̣хитабхиккхум̣ а̄раббха катхеси. со хи бхагавата̄ ‘‘саччам̣ кира твам̣ бхиккху уккан̣т̣хито’’ти вутте ‘‘сачча’’нти ватва̄ ‘‘кена уккан̣т̣ха̄питосӣ’’ти ча пут̣т̣хо ‘‘пура̄н̣адутийика̄йа̄’’ти ватва̄ ‘‘мадхурахаттхараса̄, бханте, са̄ иттхӣ, на саккоми там̣ вина̄ васиту’’нти а̄ха. атха нам̣ саттха̄ ‘‘еса̄ те бхиккху анаттхака̄рика̄, пуббепи твам̣ етам̣ нисса̄йа сӯле утта̄сито етан̃н̃ева паттхайама̄но ка̄лам̣ катва̄ нирайе ниббатто, ида̄ни нам̣ касма̄ пуна паттхесӣ’’ти ватва̄ атӣтам̣ а̄хари.

атӣте ба̄ра̄н̣асийам̣ брахмадатте раджджам̣ ка̄ренте бодхисатто а̄ка̄сат̣т̣хадевата̄ ахоси. атха ба̄ра̄н̣асийам̣ каттикараттива̄рачхан̣о сампатто хоти, нагарам̣ деванагарам̣ вийа алан̇карим̣су. саббо джано кхан̣акӣл̣а̄ниссито ахоси. екасса пана дуггатамануссасса екамева гханаса̄т̣акайугам̣ ахоси. со там̣ судхотам̣ дхова̄петва̄ обхан̃джа̄петва̄ сатаваликам̣ сахассаваликам̣ ка̄ретва̄ т̣хапеси. атха нам̣ бхарийа̄ евама̄ха ‘‘иччха̄махам̣, са̄ми, екам̣ кусумбхараттам̣ нива̄сетва̄ екам̣ па̄рупитва̄ тава кан̣т̣хе лагга̄ каттикараттива̄рам̣ чариту’’нти. ‘‘бхадде, куто амха̄кам̣ далидда̄нам̣ кусумбхам̣, суддхаваттхам̣ нива̄сетва̄ кӣл̣а̄хӣ’’ти? ‘‘кусумбхараттам̣ алабхама̄на̄ чхан̣акӣл̣ам̣ на кӣл̣исса̄ми, твам̣ ан̃н̃ам̣ иттхим̣ гахетва̄ кӣл̣ассӯ’’ти. ‘‘бхадде, ким̣ мам̣ пӣл̣еси, куто амха̄кам̣ кусумбха’’нти? ‘‘са̄ми, пурисасса иччха̄йа сати ким̣ на̄ма наттхи, нану ран̃н̃о кусумбхаваттхусмим̣ баху кусумбха’’нти. ‘‘бхадде, там̣ т̣ха̄нам̣ раккхасапариггахитапоккхаран̣исадисам̣, балава̄раккха̄, на сакка̄ упасан̇камитум̣, ма̄ те етам̣ руччи, йатха̄ладдхенева туссассӯ’’ти. ‘‘са̄ми, раттибха̄ге андхака̄ре сати пурисасса агаманӣйат̣т̣ха̄нам̣ на̄ма наттхӣ’’ти. ити со та̄йа пунаппунам̣ катхентийа̄ килесавасена тасса̄ вачанам̣ гахетва̄ ‘‘хоту бхадде, ма̄ чинтайиттха̄’’ти там̣ самасса̄сетва̄ раттибха̄ге джӣвитам̣ париччаджитва̄ нагара̄ никкхамитва̄ ран̃н̃о кусумбхаваттхум̣ гантва̄ ватим̣ маддитва̄ антоваттхум̣ па̄виси. а̄раккхаманусса̄ ватисаддам̣ сутва̄ ‘‘чоро чоро’’ти парива̄ретва̄ гахетва̄ парибха̄ситва̄ кот̣т̣етва̄ бандхитва̄ пабха̄та̄йа раттийа̄ ран̃н̃о дассесум̣. ра̄джа̄ ‘‘гаччхатха, нам̣ сӯле утта̄сетха̄’’ти а̄ха. атха нам̣ паччха̄ба̄хам̣ бандхитва̄ ваджджхабхерийа̄ ваджджама̄на̄йа нагара̄ никкхама̄петва̄ сӯле утта̄сесум̣. балававедана̄ паваттанти, ка̄ка̄ сӣсе нилӣйитва̄ кан̣айаггасадисехи тун̣хехи аккхӣни виджджханти.

со татха̄рӯпампи дуккхам̣ аманасикаритва̄ тамева иттхим̣ ануссаритва̄ ‘‘та̄йа на̄мамхи гханапуппхараттаваттханиваттха̄йа кан̣т̣хе а̄саттаба̄хуйугал̣а̄йа саддхим̣ каттикараттива̄рато парихӣно’’ти чинтетва̄ имам̣ га̄тхама̄ха –

147. ‘‘найидам̣ дуккхам̣ адум̣ дуккхам̣, йам̣ мам̣ тудати ва̄йасо;

йам̣ са̄ма̄ пуппхараттена, каттикам̣ на̄нубхоссатӣ’’ти.

таттха найидам̣ дуккхам̣ адум̣ дуккхам̣, йам̣ мам̣ тудати ва̄йасоти йан̃ча идам̣ сӯле лагганапаччайам̣ ка̄йикачетасикадуккхам̣, йан̃ча лохамайехи вийа тун̣д̣ехи ва̄йасо тудати, идам̣ саббампи майхам̣ на дуккхам̣, адум̣ дуккхам̣ етам̣йева пана ме дуккханти аттхо. катарам̣? йам̣ са̄ма̄ пуппхараттена, каттикам̣ на̄нубхоссатӣти, йам̣ са̄ пийан̇гуса̄ма̄ мама бхарийа̄ екам̣ кусумбхараттам̣ нива̄сетва̄ екам̣ па̄рупитва̄ евам̣ гханапуппхараттена ваттхайугена аччханна̄ мама кан̣т̣хе гахетва̄ каттикараттива̄рам̣ на̄нубхависсати, идам̣ майхам̣ дуккхам̣, етадева хи мам̣ ба̄дхатӣти? со евам̣ ма̄туга̄мам̣ а̄раббха виппалапантойева ка̄лам̣ катва̄ нирайе ниббатти.

саттха̄ имам̣ дхаммадесанам̣ а̄харитва̄ джа̄такам̣ самодха̄неси – ‘‘тада̄ джайампатика̄ва ида̄ни джайампатика̄, там̣ ка̄ран̣ам̣ паччаккхам̣ катва̄ т̣хита̄ а̄ка̄сат̣т̣хадевата̄ пана ахамева ахоси’’нти.

пуппхараттаджа̄такаван̣н̣ана̄ саттама̄.

[148] 8. син̇га̄ладжа̄такаван̣н̣ана̄

на̄хам̣ пунам̣ на ча пунанти идам̣ саттха̄ джетаване вихаранто килесаниггахам̣ а̄раббха катхеси. са̄ваттхийам̣ кира пан̃часатаматта̄ саха̄йака̄ маха̄вибхава̄ сет̣т̣хипутта̄ саттху дхаммадесанам̣ сутва̄ са̄сане урам̣ датва̄ паббаджитва̄ джетаване антокот̣исантха̄ре вихарим̣су. атхекадивасам̣ тесам̣ ад̣д̣хараттасамайе килесаниссито сан̇каппо уппаджджи. те уккан̣т̣хитва̄ аттана̄ джахитакилесе пуна ган̣хитум̣ читтам̣ уппа̄дайим̣су. атха саттха̄ ад̣д̣хараттасаманантаре саббан̃н̃утан̃н̃а̄н̣адан̣д̣адӣпакам̣ уккхипитва̄ ‘‘катара̄йа ну кхо ратийа̄ джетаване бхиккхӯ вихарантӣ’’ти бхиккхӯнам̣ аджджха̄сайам̣ олокенто тесам̣ бхиккхӯнам̣ аббхантаре ка̄мара̄гасан̇каппасса уппаннабха̄вам̣ ан̃н̃а̄си. саттха̄ ча на̄ма екапуттика̄ иттхӣ аттано путтам̣ вийа, екачаккхуко пурисо чаккхум̣ вийа аттано са̄ваке раккхати. пуббан̣ха̄дӣсу йасмим̣ йасмим̣ самайе тесам̣ килеса̄ уппаджджанти, те тесам̣ килесе тато парам̣ вад̣д̣хитум̣ адатва̄ тасмим̣ тасмим̣йева самайе нигган̣ха̄ти. тенасса етадахоси ‘‘айам̣ чаккаваттиран̃н̃о антонагарейева чора̄нам̣ уппаннака̄ло вийа ваттати, ида̄нева тесам̣ дхаммадесанам̣ катва̄ те килесе нигган̣хитва̄ арахаттам̣ дасса̄мӣ’’ти. со сурабхигандхакут̣ито никкхамитва̄ мадхурассарена ‘‘а̄нанда̄’’ти а̄йасмантам̣ дхаммабхан̣д̣а̄га̄рикам̣ а̄нандаттхерам̣ а̄мантеси. тхеро ‘‘ким̣, бханте’’ти а̄гантва̄ вандитва̄ ат̣т̣ха̄си. ‘‘а̄нанда, йаттака̄ бхиккхӯ антокот̣исантха̄ре вихаранти, саббева гандхакут̣ипаривен̣е саннипа̄техӣ’’ти. евам̣ кирасса ахоси ‘‘сача̄хам̣ тейева пан̃часате бхиккхӯ паккоса̄песса̄ми. ‘саттха̄ра̄ но аббхантаре килеса̄нам̣ уппаннабха̄во н̃а̄то’ти сам̣виггама̄наса̄ дхаммадесанам̣ сампат̣иччхитум̣ на саккхиссантӣ’’ти. тасма̄ ‘‘саббе саннипа̄техӣ’’ти а̄ха. тхеро ‘‘са̄дху, бханте’’ти ава̄пуран̣ам̣ а̄да̄йа паривен̣ена паривен̣ам̣ а̄хин̣д̣итва̄ саббе бхиккхӯ гандхакут̣ипаривен̣е саннипа̄тетва̄ буддха̄санам̣ пан̃н̃апеси.

саттха̄ паллан̇кам̣ а̄бхуджитва̄ уджум̣ ка̄йам̣ пан̣идха̄йа сила̄патхавийам̣ патит̣т̣хахама̄но синеру вийа пан̃н̃атте буддха̄сане нисӣди а̄вел̣а̄вел̣а̄ йамакайамака̄ чхаббан̣н̣агханабуддхарасмийо виссадждженто. та̄пи расмийо па̄тиматта̄ чхаттаматта̄ кӯт̣а̄га̄ракуччхиматта̄ чхиджджитва̄ чхиджджитва̄ гаганатале виджджулата̄ вийа сан̃чарим̣су, ан̣н̣авакуччхим̣ кхобхетва̄ ба̄ласӯрийуггаманака̄ло вийа ахоси. бхиккхусан̇гхопи саттха̄рам̣ вандитва̄ гаручиттам̣ паччупат̣т̣хапетва̄ раттакамбаласа̄н̣ийа̄ париккхипанто вийа парива̄ретва̄ нисӣди. саттха̄ брахмассарам̣ ниччха̄ренто бхиккхӯ а̄мантетва̄ ‘‘на, бхиккхаве, бхиккхуна̄ на̄ма ка̄мавитаккам̣ бйа̄па̄давитаккам̣ вихим̣са̄витакканти име тайо акусалавитакке витаккетум̣ ват̣т̣ати. анто уппаннакилесо хи ‘париттако’ти аваман̃н̃итум̣ на ват̣т̣ати, килесо на̄ма пачча̄миттасадисо. пачча̄митто ча кхуддако на̄ма наттхи, ока̄сам̣ лабхитва̄ вина̄самева па̄пети, евамева аппаматтакопи килесо уппаджджитва̄ вад̣д̣хитум̣ лабханто маха̄вина̄сам̣ па̄пети. килесо на̄меса хала̄халависӯпамо уппа̄т̣итаччхавиган̣д̣асадисо а̄сӣвисапат̣ибха̄го асаниаггисадисо аллӣйитум̣ на йутто а̄сан̇китаббо. уппаннуппаннаккхан̣ейева пат̣исан̇кха̄набалена бха̄вана̄балена йатха̄ мухуттампи хадайе ат̣т̣хатва̄ падуминипатта̄ удакабинду вийа виват̣т̣ати, евам̣ паджахитаббо. пора̄н̣акапан̣д̣и та̄пи аппаматтакампи килесам̣ гарахитва̄ йатха̄ пуна аббхантаре нуппаджджати, евам̣ нигган̣хим̣сӯ’’ти ватва̄ атӣтам̣ а̄хари.

атӣте ба̄ра̄н̣асийам̣ брахмадатте раджджам̣ ка̄ренте бодхисатто син̇га̄лайонийам̣ пат̣исандхим̣ гахетва̄ аран̃н̃е надӣтӣре нива̄сам̣ каппеси. атхеко джарахаттхӣ ган̇га̄тӣре ка̄ламака̄си. син̇га̄ло гочараппасуто там̣ матахаттхисарӣрам̣ дисва̄ ‘‘маха̄ ме гочаро уппанно’’ти гантва̄ там̣ сон̣д̣е д̣ам̣си, нан̇галӣса̄йа дат̣т̣хака̄ло вийа ахоси. со ‘‘наттхеттха кха̄дитаббайуттака’’нти дантесу д̣ам̣си, тхамбхе дат̣т̣хака̄ло вийа ахоси. кан̣н̣е д̣ам̣си, суппакот̣ийам̣ дат̣т̣хака̄ло вийа ахоси. ударе д̣ам̣си, кусӯле дат̣т̣хака̄ло вийа ахоси. па̄де д̣ам̣си, удуккхале дат̣т̣хака̄ло вийа ахоси. нан̇гут̣т̣хе д̣ам̣си, мусале дат̣т̣хака̄ло вийа ахоси. со ‘‘еттха̄пи наттхи кха̄дитаббайуттака’’нти саббаттха асса̄дам̣ алабханто ваччамагге д̣ам̣си, мудупӯве дат̣т̣хака̄ло вийа ахоси. со ‘‘ладдхам̣ да̄ни ме имасмим̣ сарӣре муду кха̄дитаббайуттакат̣т̣ха̄на’’нти тато пат̣т̣ха̄йа кха̄данто антокуччхим̣ пависитва̄ ваккахадайа̄дӣни кха̄дитва̄ пипа̄ситака̄ле лохитам̣ пивитва̄ нипаджджитука̄мака̄ле ударам̣ паттхаритва̄ нипаджджати.

атхасса етадахоси – ‘‘идам̣ хаттхисарӣрам̣ майхам̣ нива̄сасукхата̄йа гехасадисам̣, кха̄дитука̄мата̄йа сати пахӯтамам̣сам̣, ким̣ да̄ни ме ан̃н̃аттха камма’’нти со ан̃н̃аттха агантва̄ хаттхикуччхийам̣йева мам̣сам̣ кха̄дитва̄ васати. гаччханте гаччханте ка̄ле нида̄гхе ва̄тасампхассена чева сӯрийарасмисанта̄пена ча там̣ кун̣апам̣ сусситва̄ валийо ган̣хи, син̇га̄ласса павит̣т̣хадва̄рам̣ пихитам̣, антокуччхийам̣ андхака̄ро ахоси. син̇га̄ласса локантариканива̄со вийа джа̄то. кун̣апе суссанте мам̣сампи сусси, лохитампи паччхиджджи. со никкхаманадва̄рам̣ алабханто бхайаппатто хутва̄ сандха̄ванто ито чито ча пахаритва̄ никкхаманадва̄рам̣ парийесама̄но вичарати. евам̣ тасмим̣ уккхалийам̣ пит̣т̣хапин̣д̣и вийа антокуччхийам̣ паччама̄не катипа̄хаччайена маха̄мегхо па̄васси. атха нам̣ кун̣апам̣ теметва̄ ут̣т̣ха̄йа пакатисан̣т̣ха̄нена ат̣т̣ха̄си. ваччамагго виват̣о хутва̄ та̄рака̄ вийа пан̃н̃а̄йи. син̇га̄ло там̣ чхиддам̣ дисва̄ ‘‘ида̄ни ме джӣвитам̣ ладдха’’нти йа̄ва хаттхисӣса̄ пат̣иккамитва̄ вегена паккхандитва̄ ваччамаггам̣ сӣсена пахаритва̄ никкхами. тасса сан̃чханнасарӣратта̄ саббалома̄ни ваччамагге аллӣйим̣су. со та̄лаккхандхасадисена нилломена сарӣрена уббиггачитто мухуттам̣ дха̄витва̄ ниваттитва̄ нисинно сарӣрам̣ олокетва̄ ‘‘идам̣ дуккхам̣ майхам̣ на ан̃н̃ена катам̣, лобхахету пана лобхака̄ран̣а̄ лобхам̣ нисса̄йа майа̄ етам̣ катам̣, ито да̄ни пат̣т̣ха̄йа на лобхавасико бхависса̄ми, пуна хаттхисарӣрам̣ на̄ма на пависисса̄мӣ’’ти сам̣виггахадайо хутва̄ имам̣ га̄тхама̄ха –

148. ‘‘на̄хам̣ пунам̣ на ча пунам̣, на ча̄пи апунаппунам̣;

хаттхибондим̣ павеккха̄ми, татха̄ хи бхайатаджджито’’ти.

таттха на ча̄пи апунаппунанти а-ка̄ро нипа̄таматто. айам̣ панетисса̄ сакала̄йапи га̄тха̄йа аттхо – ахан̃хи ито пуна, тато ча пуна̄ти вуттава̄рато пуна татопи ча пунаппунам̣ ва̄ран̣асарӣрасан̇кха̄там̣ хаттхибондим̣ на павеккха̄ми. ким̣ка̄ран̣а̄? татха̄ хи бхайатаджджито, татха̄ хи ахам̣ имасмин̃н̃ева павесане бхайатаджджито маран̣абхайена санта̄сам̣ сам̣вегам̣ а̄па̄дитоти.

еван̃ча пана ватва̄ татова пала̄йитва̄ пуна там̣ ва̄ ан̃н̃ам̣ ва̄ хаттхисарӣрам̣ ниваттитва̄пи на олокеси. тато пат̣т̣ха̄йа на лобхавасико ахоси.

саттха̄ имам̣ дхаммадесанам̣ а̄харитва̄ ‘‘бхиккхаве, анто уппаннакилесасса на̄ма вад̣д̣хитум̣ адатва̄ таттха таттхева нам̣ нигган̣хитум̣ ват̣т̣атӣ’’ти ватва̄ сачча̄ни пака̄сетва̄ джа̄такам̣ самодха̄неси. саччапарийоса̄не пан̃часата̄пи те бхиккхӯ арахатте патит̣т̣хахим̣су, авасесесу кечи сота̄панна̄, кечи сакада̄га̄мино, кечи ана̄га̄мино ахесум̣. тада̄ син̇га̄ло ахамева ахосинти.

син̇га̄ладжа̄такаван̣н̣ана̄ ат̣т̣хама̄.

[149] 9. екапан̣н̣аджа̄такаван̣н̣ана̄

екапан̣н̣о айам̣ руккхоти идам̣ саттха̄ веса̄лим̣ упанисса̄йа маха̄ване кӯт̣а̄га̄раса̄ла̄йам̣ вихаранто веса̄ликам̣ дут̣т̣халиччхавикума̄рам̣ а̄раббха катхеси. тасмин̃хи ка̄ле веса̄линагарам̣ га̄вутага̄вутантаре тӣхи па̄ка̄рехи париккхиттам̣ тӣсу т̣ха̄несу гопурат̣т̣а̄лакайуттам̣ парамасобхаггаппаттам̣. таттха ниччака̄лам̣ раджджам̣ ка̄ретва̄ васанта̄нан̃н̃ева ра̄джӯнам̣ сатта сахасса̄ни сатта сата̄ни сатта ча ра̄джа̄но хонти, таттака̄йева упара̄джа̄но, таттака̄ сена̄патино, таттака̄ бхан̣д̣а̄га̄рика̄. тесам̣ ра̄джакума̄ра̄нам̣ антаре еко дут̣т̣халиччхавикума̄ро на̄ма ахоси кодхано чан̣д̣о пхарусо са̄хасико, дан̣д̣ена гхат̣т̣итаа̄сӣвисо вийа ниччам̣ паджджалито кодхена. тасса пурато две тӣн̣и вачана̄ни катхетум̣ саматтхо на̄ма наттхи. там̣ нева ма̄та̄питаро, на н̃а̄тайо, на миттасухаджджа̄ сиккха̄петум̣ саккхим̣су. атхасса ма̄та̄питӯнам̣ етадахоси ‘‘айам̣ кума̄ро атипхарусо са̄хасико, т̣хапетва̄ самма̄самбуддхам̣ ан̃н̃о имам̣ винетум̣ саматтхо на̄ма наттхи, буддхавенеййена бхавитабба’’нти. те там̣ а̄да̄йа саттху сантикам̣ гантва̄ вандитва̄ а̄хам̣су ‘‘бханте, айам̣ кума̄ро чан̣д̣о пхарусо кодхена паджджалати, имасса ова̄дам̣ детха̄’’ти.

саттха̄ там̣ кума̄рам̣ овади – ‘‘кума̄ра, имесу на̄ма саттесу чан̣д̣ена пхарусена са̄хасикена вихет̣хакаджа̄тикена на бхавитаббам̣, пхарусава̄чо ча на̄ма виджа̄тама̄туйа̄пи питунопи путтада̄рассапи бха̄тибхагинӣнампи паджа̄патийа̄пи миттабандхава̄нампи аппийо хоти амана̄по, д̣ам̣ситум̣ а̄гаччханто саппо вийа, ат̣авийам̣ ут̣т̣хитачоро вийа, кха̄дитум̣ а̄гаччханто йаккхо вийа ча уббеджанӣйо хутва̄ дутийачиттава̄ре нирайа̄дӣсу ниббаттати. дит̣т̣хейева ча дхамме кодхано пуггало ман̣д̣итапаса̄дхитопи дуббан̣н̣ова хоти, пун̣н̣ачандасассирикамписса мукхам̣ джа̄ла̄бхихатападумам̣ вийа малаггахитакан̃чана̄да̄саман̣д̣алам̣ вийа ча вирӯпам̣ хоти дуддасикам̣. кодхам̣ нисса̄йа хи сатта̄ саттхам̣ а̄да̄йа аттана̄ва атта̄нам̣ пахаранти, висам̣ кха̄данти, раджджуйа̄ уббандханти, папа̄та̄ папатанти. евам̣ кодхавасена ка̄лам̣ катва̄ нирайа̄дӣсу уппаджджанти, вихет̣хакаджа̄тика̄пи дит̣т̣хева дхамме гарахам̣ патва̄ ка̄йасса бхеда̄ нирайа̄дӣсу уппаджджанти, пуна мануссаттам̣ лабхитва̄ виджа̄така̄лато пат̣т̣ха̄йа рогабахула̄ва хонти. чаккхурого сотароготиа̄дӣсу ча рогесу екато ут̣т̣ха̄йа екасмим̣ патанти, рогена апаримутта̄ва хутва̄ ниччам̣ дуккхита̄ва хонти, тасма̄ саббесу саттесу меттачиттена хитачиттена мудучиттена бхавитаббам̣. еварӯпо хи пуггало нирайа̄дибхайехи на паримуччатӣ’’ти. со кума̄ро саттху ова̄дам̣ сутва̄ екова̄денева нихатама̄но данто ниббисевано меттачитто мудучитто ахоси. ан̃н̃ам̣ аккосантампи пахарантампи ниваттитва̄ на олокеси, уддхат̣ада̄т̣хо вийа саппо, ал̣аччхинно вийа каккат̣ако, чхиннависа̄н̣о вийа ча усабхо ахоси.

тасса там̣ паваттим̣ н̃атва̄ бхиккхӯ дхаммасабха̄йам̣ катхам̣ самут̣т̣ха̄песум̣ ‘‘а̄вусо, дут̣т̣халиччхавикума̄рам̣ сучирампи овадитва̄ нева ма̄та̄питаро, на н̃а̄тимитта̄дайо даметум̣ саккхим̣су, самма̄самбуддхо пана там̣ екова̄денева даметва̄ ниббисеванам̣ катва̄ маттаварава̄ран̣ам̣ вийа самуггахита̄нен̃джака̄ран̣ам̣ ака̄си. йа̄ва субха̄ситам̣ чидам̣ – ‘хаттхидамакена, бхиккхаве, хаттхидаммо са̄рито екам̣йева дисам̣ дха̄вати пураттхимам̣ ва̄ паччхимам̣ ва̄ уттарам̣ ва̄ даккхин̣ам̣ ва̄. ассадамакена…пе… годамакена…пе… даккхин̣ам̣ ва̄. татха̄гатена хи, бхиккхаве, арахата̄ самма̄самбуддхена пурисадаммо са̄рито ат̣т̣ха диса̄ видха̄вати, рӯпӣ рӯпа̄ни пассати. айамека̄ диса̄…пе… со вуччати ‘йогга̄чарийа̄нам̣ ануттаро пурисадаммаса̄ратхӣ’ти (ма. ни. 3.312). на хи, а̄вусо, самма̄самбуддхена садисо пурисадаммаса̄ратхӣ на̄ма аттхӣ’’ти. саттха̄ а̄гантва̄ ‘‘ка̄йа нуттха, бхиккхаве, етарахи катха̄йа саннисинна̄’’ти пуччхитва̄ ‘‘има̄йа на̄ма̄’’ти вутте ‘‘на, бхиккхаве, ида̄невеса майа̄ екова̄денева дамито, пуббепа̄хам̣ имам̣ екова̄денева дамеси’’нти ватва̄ атӣтам̣ а̄хари.

атӣте ба̄ра̄н̣асийам̣ брахмадатте раджджам̣ ка̄ренте бодхисатто удиччабра̄хман̣акуле ниббаттитва̄ вайаппатто таккасила̄йам̣ тайо веде саббасиппа̄ни ча уггахетва̄ кин̃чи ка̄лам̣ гхара̄ва̄сам̣ васитва̄ ма̄та̄питӯнам̣ аччайена исипаббаджджам̣ паббаджитва̄ абхин̃н̃а̄ ча сама̄паттийо ча ниббаттетва̄ химаванте ва̄сам̣ каппеси. таттха чирам̣ васитва̄ лон̣амбиласеванаттха̄йа джанападам̣ гантва̄ ба̄ра̄н̣асим̣ патва̄ ра̄джуййа̄не васитва̄ пунадивасе суниваттхо супа̄руто та̄паса̄каппасампанно бхиккха̄йа нагарам̣ пависитва̄ ра̄джан̇ган̣ам̣ па̄пун̣и. ра̄джа̄ сӣхапан̃джарена олокенто там̣ дисва̄ ирийа̄патхе пасӣдитва̄ ‘‘айам̣ та̄пасо сантиндрийо сантама̄насо йугаматтадасо, падава̄ре падава̄ре сахассаттхавикам̣ т̣хапенто вийа сӣхавиджамбхитена а̄гаччхати. саче сантадхаммо на̄меко аттхи, имасса тенаббхантаре бхавитабба’’нти чинтетва̄ екам̣ амаччам̣ олокеси. со ‘‘ким̣ кароми, дева̄’’ти а̄ха. етам̣ ‘‘та̄пасам̣ а̄нехӣ’’ти. со ‘‘са̄дху, дева̄’’ти бодхисаттам̣ упасан̇камитва̄ вандитва̄ хаттхато бхиккха̄бха̄джанам̣ гахетва̄ ‘‘ким̣, маха̄пун̃н̃а̄’’ти вутте ‘‘бханте, ра̄джа̄ там̣ паккосатӣ’’ти а̄ха. бодхисатто ‘‘на майам̣ ра̄джакулӯпака̄, хемавантика̄ на̄мамха̄’’ти а̄ха. амаччо гантва̄ таматтхам̣ ран̃н̃о а̄рочеси. ра̄джа̄ ‘‘ан̃н̃о амха̄кам̣ кулӯпако наттхи, а̄нехи на’’нти а̄ха. амаччо гантва̄ бодхисаттам̣ вандитва̄ йа̄читва̄ ра̄джанивесанам̣ павесеси.

ра̄джа̄ бодхисаттам̣ вандитва̄ самусситасетаччхатте кан̃чанапаллан̇ке нисӣда̄петва̄ аттано пат̣ийаттам̣ на̄наггарасабходжанам̣ бходжетва̄ ‘‘кахам̣, бханте, васатха̄’’ти пуччхи. ‘‘хемавантика̄ майам̣, маха̄ра̄джа̄’’ти. ‘‘ида̄ни кахам̣ гаччхатха̄’’ти? ‘‘васса̄ратта̄нурӯпам̣ сена̄санам̣ упадха̄рема, маха̄ра̄джа̄’’ти. ‘‘тена хи, бханте, амха̄кан̃н̃ева уййа̄не васатха̄’’ти пат̣ин̃н̃ам̣ гахетва̄ сайампи бхун̃джитва̄ бодхисаттам̣ а̄да̄йа уййа̄нам̣ гантва̄ пан̣н̣аса̄лам̣ ма̄петва̄ раттит̣т̣ха̄надива̄т̣т̣ха̄на̄пи ка̄ретва̄ паббаджитапариккха̄ре датва̄ уййа̄напа̄лам̣ пат̣иччха̄петва̄ нагарам̣ па̄виси. тато пат̣т̣ха̄йа бодхисатто уййа̄не васати. ра̄джа̄писса дивасе дивасе дваттиккхаттум̣ упат̣т̣ха̄нам̣ гаччхати.

тасса пана ран̃н̃о дут̣т̣хакума̄ро на̄ма путто ахоси чан̣д̣о пхарусо, нева нам̣ ра̄джа̄ даметум̣ асаккхи, на сесан̃а̄така̄. амачча̄пи бра̄хман̣агахапатика̄пи екато хутва̄ ‘‘са̄ми, ма̄ евам̣ кари, евам̣ ка̄тум̣ на лаббха̄’’ти куджджхитва̄ катхента̄пи катхам̣ га̄ха̄петум̣ на̄саккхим̣су. ра̄джа̄ чинтеси ‘‘т̣хапетва̄ мама аййам̣ химавантата̄пасам̣ ан̃н̃о имам̣ кума̄рам̣ даметум̣ саматтхо на̄ма наттхи, сойева нам̣ дамессатӣ’’ти. со кума̄рам̣ а̄да̄йа бодхисаттасса сантикам̣ гантва̄ ‘‘бханте, айам̣ кума̄ро чан̣д̣о пхарусо, майам̣ имам̣ даметум̣ на саккома, тумхе нам̣ екена упа̄йена сиккха̄петха̄’’ти кума̄рам̣ бодхисаттасса ниййа̄детва̄ пакка̄ми. бодхисатто кума̄рам̣ гахетва̄ уййа̄не вичаранто екато екена, екато екена̄ти двӣхийева паттехи екам̣ нимбапотакам̣ дисва̄ кума̄рам̣ а̄ха – ‘‘кума̄ра, етасса та̄ва руккхапотакасса пан̣н̣ам̣ кха̄дитва̄ расам̣ джа̄на̄хӣ’’ти? со тасса екам̣ паттам̣ кха̄дитва̄ расам̣ н̃атва̄ ‘‘дхӣ’’ти саха кхел̣ена бхӯмийам̣ нут̣т̣ха̄бхи. ‘‘ким̣ етам̣, кума̄ра̄’’ти вутте ‘‘бханте, ида̄невеса руккхо хала̄халависӯпамо, вад̣д̣ханто пана бахӯ мануссе ма̄рессатӣ’’ти там̣ нимбапотакам̣ уппа̄т̣етва̄ хаттхехи паримаддитва̄ имам̣ га̄тхама̄ха –

149. ‘‘екапан̣н̣о айам̣ руккхо, на бхӯмйа̄ чатуран̇гуло;

пхалена висакаппена, маха̄йам̣ ким̣ бхависсатӣ’’ти.

таттха екапан̣н̣оти убхосу пассесу екекапан̣н̣о. на бхӯмйа̄ чатуран̇гулоти бхӯмито чатуран̇гуламаттампи на вад̣д̣хито. пхалена̄ти пхаларасена. висакаппена̄ти хала̄халависасадисена. евам̣ кхуддакопи сама̄но еварӯпена титтакена пан̣н̣ена саманна̄гатоти аттхо. маха̄йам̣ ким̣ бхависсатӣти йада̄ пана̄йам̣ вуддхиппатто маха̄ бхависсати, тада̄ ким̣ на̄ма бхависсати, аддха̄ мануссама̄рако бхависсатӣти етам̣ уппа̄т̣етва̄ маддитва̄ чхад̣д̣есинти а̄ха.

атха нам̣ бодхисатто етадавоча ‘‘кума̄ра, твам̣ имам̣ нимбапотакам̣ ‘ида̄нева евам̣титтако, махаллакака̄ле ким̣ бхависсати, куто имам̣ нисса̄йа вуд̣д̣хӣ’ти уппа̄т̣етва̄ маддитва̄ чхад̣д̣еси? йатха̄ твам̣ етасмим̣ пат̣ипаджджи, евамева тава рат̣т̣хава̄синопи ‘айам̣ кума̄ро дахарака̄лейева евам̣ чан̣д̣о пхарусо, махаллакака̄ле раджджам̣ патва̄ ким̣ на̄ма кариссати, куто амха̄кам̣ етам̣ нисса̄йа вуд̣д̣хӣ’ти тава куласантакам̣ раджджам̣ адатва̄ нимбапотакам̣ вийа там̣ уппа̄т̣етва̄ рат̣т̣ха̄ пабба̄джанӣйакаммам̣ кариссанти, тасма̄ нимбаруккхапат̣ибха̄гатам̣ хитва̄ ито пат̣т̣ха̄йа кхантиметта̄нуддайасампанно хохӣ’’ти. со тато пат̣т̣ха̄йа нихатама̄но ниббисевано кхантиметта̄нуддайасампанно хутва̄ бодхисаттасса ова̄де т̣хатва̄ питу аччайена раджджам̣ патва̄ да̄на̄дӣни пун̃н̃а̄ни катва̄ йатха̄каммам̣ агама̄си.

саттха̄ имам̣ дхаммадесанам̣ а̄харитва̄ ‘‘на, бхиккхаве, ида̄невеса дут̣т̣халиччхавикума̄ро майа̄ дамито, пуббепа̄хам̣ етам̣ дамесим̣йева̄’’ти ватва̄ джа̄такам̣ самодха̄неси – ‘‘тада̄ дут̣т̣хакума̄ро айам̣ личчхавикума̄ро ахоси, ра̄джа̄ а̄нандо, ова̄дада̄йаката̄пасо пана ахамева ахоси’’нти.

екапан̣н̣аджа̄такаван̣н̣ана̄ навама̄.

[150] 10. сан̃джӣваджа̄такаван̣н̣ана̄

асантам̣ йо пагган̣ха̄тӣти идам̣ саттха̄ вел̣уване вихаранто аджа̄тасаттусса ран̃н̃о асантапаггахам̣ а̄раббха катхеси. со хи буддха̄нам̣ пат̣икан̣т̣акабхӯте дуссӣле па̄падхамме девадатте пасӣдитва̄ там̣ асантам̣ асаппурисам̣ паггайха ‘‘тасса сакка̄рам̣ карисса̄мӣ’’ти бахум̣ дханам̣ париччаджитва̄ гайа̄сӣсе виха̄рам̣ ка̄ретва̄ тассева вачанам̣ гахетва̄ питарам̣ дхаммара̄джа̄нам̣ сота̄паннам̣ арийаса̄вакам̣ гха̄тетва̄ аттано сота̄паттимаггасса упаниссайам̣ бхиндитва̄ маха̄вина̄сам̣ патто. со хи ‘‘девадатто патхавийам̣ павит̣т̣хо’’ти сутва̄ ‘‘каччи ну кхо мампи патхавӣ гилеййа̄’’ти бхӣтатасито раджджасукхам̣ на лабхати, сайане асса̄дасукхам̣ на виндати, тиббака̄ран̣а̄бхитунно хаттхипото вийа кампама̄но вичарати. со патхавим̣ пхалама̄нам̣ вийа, авӣчиджа̄лам̣ никкхамантим̣ вийа, патхавийа̄ атта̄нам̣ гилийама̄нам̣ вийа, а̄дитта̄йа лохапатхавийа̄ утта̄накам̣ нипаджджа̄петва̄ айасӯлехи кот̣ийама̄нам̣ вийа ча саманупасси. тенасса пахат̣акуккут̣ассева мухуттампи кампама̄насса аваттха̄нам̣ на̄ма на̄хоси. со самма̄самбуддхам̣ пасситука̄мо кхама̄петука̄мо пан̃хам̣ пуччхитука̄мо ахоси, аттано пана апара̄дхамахантата̄йа упасан̇камитум̣ на саккоти.

атхасса ра̄джагаханагаре каттикараттива̄ре сампатте деванагарам̣ вийа нагаре алан̇кате маха̄тале амаччаган̣апаривутасса кан̃чана̄сане нисиннасса джӣвакам̣ кома̄рабхаччам̣ авидӯре нисиннам̣ дисва̄ етадахоси ‘‘джӣвакам̣ гахетва̄ самма̄самбуддхасса сантикам̣ гамисса̄ми, на кхо пана сакка̄ майа̄ уджукамева ваттум̣ ‘ахам̣, самма джӣвака, сайам̣ гантум̣ на саккоми, ехи мам̣ саттху сантикам̣ нехӣ’ти, парийа̄йена пана раттисампадам̣ ван̣н̣етва̄ ‘кам̣ ну кхваджджа майам̣ саман̣ам̣ ва̄ бра̄хман̣ам̣ ва̄ пайирупа̄сеййа̄ма, йам̣ но пайирупа̄сатам̣ читтам̣ пасӣдеййа̄’ти ваккха̄ми, там̣ сутва̄ амачча̄ аттано аттано саттха̄ра̄нам̣ ван̣н̣ам̣ катхессанти, джӣвакопи самма̄самбуддхасса ван̣н̣ам̣ катхессати. атха нам̣ гахетва̄ саттху сантикам̣ гамисса̄мӣ’’ти. со пан̃чахи падехи раттим̣ ван̣н̣еси ‘‘лаккхан̃н̃а̄ вата бхо досина̄ ратти, абхирӯпа̄ вата бхо досина̄ ратти, дассанӣйа̄ вата бхо досина̄ ратти, па̄са̄дика̄ вата бхо досина̄ ратти, раман̣ӣйа̄ вата бхо досина̄ ратти, кам̣ ну кхваджджа майам̣ саман̣ам̣ ва̄ бра̄хман̣ам̣ ва̄ пайирупа̄сеййа̄ма, йам̣ но пайирупа̄сатам̣ читтам̣ пасӣдеййа̄’’ти (дӣ. ни. 1.150).

атхеко амаччо пӯран̣акассапасса ван̣н̣ам̣ катхеси, еко маккхалигоса̄ласса, еко аджитакесакамбаласса, еко пакудхакачча̄йанасса, еко сан̃чайасса белат̣т̣хапуттасса, еко на̄т̣апуттаниган̣т̣хасса̄ти. ра̄джа̄ тесам̣ катхам̣ сутва̄ тун̣хӣ ахоси. со хи джӣвакассева маха̄амаччасса катхам̣ пачча̄сӣсати. джӣвакопи ‘‘ран̃н̃а̄ мам̣ а̄раббха катхитейева джа̄нисса̄мӣ’’ти авидӯре тун̣хӣ нисӣди. атха нам̣ ра̄джа̄ а̄ха ‘‘твам̣ пана, самма джӣвака, ким̣ тун̣хӣ’’ти? тасмим̣ кхан̣е джӣвако ут̣т̣ха̄йа̄сана̄ йена бхагава̄ тенан̃джалим̣ пан̣а̄метва̄ ‘‘есо, дева, бхагава̄ арахам̣ самма̄самбуддхо амха̄кам̣ амбаване вихарати саддхим̣ ад̣д̣хател̣асехи бхиккхусатехи. там̣ кхо пана бхагавантам̣ евам̣ калйа̄н̣о киттисаддо аббхуггато’’ти нава араха̄дигун̣е ватва̄ джа̄тито пат̣т̣ха̄йа пуббанимитта̄дибхедам̣ бхагавато а̄нубха̄вам̣ пака̄сетва̄ ‘‘там̣ бхагавантам̣ дево пайирупа̄сату, дхаммам̣ сун̣а̄ту, пан̃хам̣ пуччхатӯ’’ти а̄ха.

ра̄джа̄ сампун̣н̣аманоратхо хутва̄ ‘‘тена хи, самма джӣвака, хаттхийа̄на̄ни каппа̄пехӣ’’ти йа̄на̄ни каппа̄петва̄ махантена ра̄джа̄нубха̄вена джӣвакамбаванам̣ гантва̄ таттха ман̣д̣алама̄л̣е бхиккхусан̇гхапаривутам̣ татха̄гатам̣ дисва̄ сантавӣчимаджджхе маха̄на̄вам̣ вийа ниччалам̣ бхиккхусан̇гхам̣ ито чито ча анувилокетва̄ ‘‘еварӯпа̄ на̄ма ме париса̄ на дит̣т̣хапубба̄’’ти ирийа̄патхейева пасӣдитва̄ сан̇гхасса ан̃джалим̣ пагган̣хитва̄ тхутим̣ катва̄ бхагавантам̣ вандитва̄ екамантам̣ нисинно са̄ман̃н̃апхалапан̃хам̣ пуччхи. атхасса бхагава̄ двӣхи бха̄н̣ава̄рехи пат̣иман̣д̣итам̣ са̄ман̃н̃апхаласуттам̣ (дӣ. ни. 1.150 а̄дайо) катхеси. со суттапарийоса̄не аттамано бхагавантам̣ кхама̄петва̄ ут̣т̣ха̄йа̄сана̄ падаккхин̣ам̣ катва̄ пакка̄ми. саттха̄ ачирапаккантасса ран̃н̃о бхиккхӯ а̄мантетва̄ ‘‘кхата̄йам̣, бхиккхаве, ра̄джа̄, упахата̄йам̣, бхиккхаве, ра̄джа̄. сача̄йам̣, бхиккхаве, ра̄джа̄ иссарийасса ка̄ран̣а̄ питарам̣ дхаммикам̣ дхаммара̄джа̄нам̣ джӣвита̄ на воропессатха, имасмим̣йева а̄сане вираджам̣ вӣтамалам̣ дхаммачаккхум̣ уппаджджиссатха. девадаттам̣ нисса̄йа асантапаггахам̣ катва̄ сота̄паттипхала̄ парихӣно’’ти а̄ха.

пунадивасе бхиккхӯ дхаммасабха̄йам̣ катхам̣ самут̣т̣ха̄песум̣ ‘‘а̄вусо, аджа̄тасатту кира асантапаггахам̣ катва̄ дуссӣлам̣ па̄падхаммам̣ девадаттам̣ нисса̄йа питугха̄такакаммасса кататта̄ сота̄паттипхала̄ парихӣно, девадаттена на̄сито ра̄джа̄’’ти. саттха̄ а̄гантва̄ ‘‘ка̄йа нуттха, бхиккхаве, етарахи катха̄йа саннисинна̄’’ти пуччхитва̄ ‘‘има̄йа на̄ма̄’’ти вутте ‘‘на, бхиккхаве, аджа̄тасатту ида̄нева асантапаггахам̣ катва̄ маха̄вина̄сам̣ патто, пуббепеса асантапаггахенева атта̄нам̣ на̄сесӣ’’ти ватва̄ атӣтам̣ а̄хари.

атӣте ба̄ра̄н̣асийам̣ брахмадатте раджджам̣ ка̄ренте бодхисатто маха̄вибхаве бра̄хман̣акуле ниббаттитва̄ вайаппатто таккасилам̣ гантва̄ саббасиппа̄ни угган̣хитва̄ ба̄ра̄н̣асийам̣ диса̄па̄моккхо а̄чарийо хутва̄ пан̃ча ма̄н̣авакасата̄ни сиппам̣ ва̄чеси. тесу ма̄н̣авесу еко сан̃джӣво на̄ма ма̄н̣аво аттхи, бодхисатто тасса матакут̣т̣ха̄панакамантам̣ ада̄си. со ут̣т̣ха̄панакамантамева гахетва̄ пат̣иба̄ханамантам̣ пана аггахетва̄ва екадивасам̣ ма̄н̣авехи саддхим̣ да̄руаттха̄йа аран̃н̃ам̣ гантва̄ екам̣ матабйаггхам̣ дисва̄ ма̄н̣аве а̄ха ‘‘бхо, имам̣ матабйаггхам̣ ут̣т̣ха̄песса̄мӣ’’ти. ма̄н̣ава̄ ‘‘на саккхиссасӣ’’ти а̄хам̣су. ‘‘пассанта̄нан̃н̃ева во там̣ ут̣т̣ха̄песса̄мӣ’’ти. ‘‘саче, ма̄н̣ава, саккоси, ут̣т̣ха̄пехӣ’’ти. еван̃ча пана ватва̄ те ма̄н̣ава̄ руккхам̣ абхирухим̣су. сан̃джӣво мантам̣ париваттетва̄ матабйаггхам̣ саккхара̄хи пахари, бйаггхо ут̣т̣ха̄йа вегена̄гантва̄ сан̃джӣвам̣ галана̄л̣ийам̣ д̣ам̣ситва̄ джӣвитаккхайам̣ па̄петва̄ таттхева пати, сан̃джӣвопи таттхева пати. убхопи екат̣т̣ха̄нейева мата̄ нипаджджим̣су.

ма̄н̣ава̄ да̄рӯни а̄да̄йа а̄гантва̄ там̣ паваттим̣ а̄чарийасса а̄рочесум̣. а̄чарийо ма̄н̣аве а̄мантетва̄ ‘‘та̄та̄, асантапаггахака̄ра̄ на̄ма айуттат̣т̣ха̄не сакка̄расамма̄нам̣ каронта̄ еварӯпам̣ дуккхам̣ пат̣илабхантийева̄’’ти ватва̄ имам̣ га̄тхама̄ха –

150. ‘‘асантам̣ йо пагган̣ха̄ти, асантам̣ чӯпасевати;

тамева гха̄сам̣ куруте, бйаггхо сан̃джӣвико йатха̄’’ти.

таттха асантанти тӣхи дуччаритехи саманна̄гатам̣ дуссӣлам̣ па̄падхаммам̣. йо пагган̣ха̄тӣти кхаттийа̄дӣсу йо кочи еварӯпам̣ дуссӣлам̣ паббаджитам̣ ва̄ чӣвара̄дисампада̄нена, гахат̣т̣хам̣ ва̄ упараджджасена̄патит̣т̣ха̄на̄дисампада̄нена пагган̣ха̄ти, сакка̄расамма̄нам̣ каротӣти аттхо. асантам̣ чӯпасеватӣти йо ча еварӯпам̣ асантам̣ дуссӣлам̣ упасевати бхаджати пайирупа̄сати. тамева гха̄сам̣ курутети тамева асантапагган̣хакам̣ со дуссӣло па̄папуггало гхасати сам̣кха̄дати вина̄сам̣ па̄пети. катхам̣? бйаггхо сан̃джӣвико йатха̄ти, йатха̄ сан̃джӣвена ма̄н̣авена мантам̣ париваттетва̄ матабйаггхо сан̃джӣвико джӣвитасампада̄нена сампаггахито аттано джӣвитада̄йакам̣ сан̃джӣвамева джӣвита̄ воропетва̄ таттхева па̄теси, евам̣ ан̃н̃опи йо асантапаггахам̣ кароти, со дуссӣло там̣ аттано сампагга̄хакамева вина̄сети. евам̣ асантасампагга̄хака̄ вина̄сам̣ па̄пун̣антӣти.

бодхисатто има̄йа га̄тха̄йа ма̄н̣ава̄нам̣ дхаммам̣ десетва̄ да̄на̄дӣни пун̃н̃а̄ни катва̄ йатха̄каммам̣ гато.

саттха̄ имам̣ дхаммадесанам̣ а̄харитва̄ джа̄такам̣ самодха̄неси – ‘‘тада̄ матабйаггхут̣т̣ха̄панако ма̄н̣аво аджа̄тасатту ахоси, диса̄па̄моккхо а̄чарийо пана ахамева ахоси’’нти.

сан̃джӣваджа̄такаван̣н̣ана̄ дасама̄.

какан̣т̣акавагго паннарасамо.

тассудда̄нам̣ –

годхасин̇га̄лавирочам̣, нан̇гут̣т̣хара̄дхака̄кан̃ча;

пуппхараттан̃ча син̇га̄лам̣, екапан̣н̣ан̃ча сан̃джӣвам̣.

атха ваггудда̄нам̣ –

апан̣н̣ако сӣлавагго, курун̇го ча кула̄вако;

аттхака̄мо ча а̄сӣсо, иттхӣварун̣апа̄йимха̄.

литто паросатам̣ хам̣чи, кусана̄л̣а̄ сампада̄но;

какан̣т̣ако паннараса, сатапан̣н̣а̄са джа̄така̄ти.

екаканипа̄таван̣н̣ана̄ нит̣т̣хита̄.

(пат̣хамо бха̄го нит̣т̣хито).