5. асан̃н̃атапариккха̄рабхиккхуваттху

ма̄ваман̃н̃етха па̄пасса̄ти имам̣ дхаммадесанам̣ саттха̄ джетаване вихаранто екам̣ асан̃н̃атапариккха̄рам̣ бхиккхум̣ а̄раббха катхеси.

со кира йам̣ кин̃чи ман̃чапӣт̣ха̄дибхедам̣ париккха̄рам̣ бахи парибхун̃джитва̄ таттхева чхад̣д̣ети. париккха̄ро вассенапи а̄тапенапи упачика̄дӣхипи винассати. со бхиккхӯхи ‘‘нану, а̄вусо, париккха̄ро на̄ма пат̣иса̄митаббо’’ти вутте ‘‘аппакам̣ майа̄ катам̣, а̄вусо, етам̣, на етасса читтам̣ аттхи, на питта’’нти ватва̄ татхева кароти. бхиккхӯ тасса кирийам̣ саттху а̄рочесум̣. саттха̄ там̣ паккоса̄петва̄ ‘‘саччам̣ кира твам̣ бхиккху евам̣ каросӣ’’ти пуччхи. со саттха̄ра̄ пуччхитопи ‘‘ким̣ етам̣ бхагава̄ аппакам̣ майа̄ катам̣, на тасса читтам̣ аттхи, на̄сса питта’’нти татхева аваман̃н̃анто а̄ха. атха нам̣ саттха̄ ‘‘бхиккхӯхи евам̣ ка̄тум̣ на ват̣т̣ати, па̄пакаммам̣ на̄ма ‘аппака’нти на аваман̃н̃итаббам̣. аджджхока̄се т̣хапитан̃хи виват̣амукхам̣ бха̄джанам̣ деве вассанте кин̃ча̄пи екабиндуна̄ на пӯрати, пунаппунам̣ вассанте пана пӯратева, евамевам̣ па̄пам̣ каронто пуггало анупуббена махантам̣ па̄пара̄сим̣ каротӣ’’ти ватва̄ анусандхим̣ гхат̣етва̄ дхаммам̣ десенто имам̣ га̄тхама̄ха –

121. ‘‘ма̄ваман̃н̃етха па̄пасса, на мандам̣ а̄гамиссати;

удабиндунипа̄тена, удакумбхопи пӯрати;

ба̄ло пӯрати па̄пасса, тхокам̣ тхокампи а̄чина’’нти.

таттха ма̄ваман̃н̃етха̄ти на аваджа̄неййа. па̄пасса̄ти па̄пам̣. на мандам̣ а̄гамиссатӣти ‘‘аппаматтакам̣ ме па̄пакам̣ катам̣, када̄ етам̣ випаччиссатӣ’’ти евам̣ па̄пам̣ на̄ваджа̄неййа̄ти аттхо. удакумбхопӣти деве вассанте мукхам̣ виваритва̄ т̣хапитам̣ йам̣ кин̃чи кула̄лабха̄джанам̣ йатха̄ там̣ екекасса̄пи удакабиндуно нипа̄тена анупуббена пӯрати, евам̣ ба̄лапуггало тхокам̣ тхокампи па̄пам̣ а̄чинанто каронто вад̣д̣хенто па̄пасса пӯратийева̄ти аттхо.

десана̄васа̄не бахӯ сота̄паттипхала̄дӣни па̄пун̣им̣су. саттха̄пи ‘‘аджджхока̄се сеййам̣ сантхаритва̄ пат̣ипа̄катикам̣ акаронто имам̣ на̄ма а̄паттима̄паджджатӣ’’ти (па̄чи. 108-110) сиккха̄падам̣ пан̃н̃а̄песӣти.

асан̃н̃атапариккха̄рабхиккхуваттху пан̃чамам̣.