10. ман̣ика̄ракулӯпакатиссаттхераваттху

габбхамекети имам̣ дхаммадесанам̣ саттха̄ джетаване вихаранто ман̣ика̄ракулӯпакам̣ тиссаттхерам̣ а̄раббха катхеси.

со кира тхеро екасса ман̣ика̄расса куле два̄даса васса̄ни бхун̃джи. тасмим̣ куле джайампатика̄ ма̄та̄питут̣т̣ха̄не т̣хатва̄ тхерам̣ пат̣иджаггим̣су. атхекадивасам̣ со ман̣ика̄ро тхерасса пурато мам̣сам̣ чхинданто нисинно хоти. тасмим̣ кхан̣е ра̄джа̄ пасенади косало екам̣ ман̣иратанам̣ ‘‘имам̣ дховитва̄ виджджхитва̄ пахин̣атӯ’’ти песеси. ман̣ика̄ро салохитенева хаттхена там̣ пат̣иггахетва̄ пел̣а̄йа упари т̣хапетва̄ хаттхадхованаттхам̣ анто па̄виси. тасмим̣ пана гехе поса̄ванийакон̃часакун̣о аттхи. со лохитагандхена мам̣сасан̃н̃а̄йа там̣ ман̣им̣ тхерасса пассантассева гили. ман̣ика̄ро а̄гантва̄ ман̣им̣ апассанто ‘‘ман̣и кена гахито’’ти бхарийан̃ча путтаке ча пат̣ипа̄т̣ийа̄ пуччхитва̄ техи ‘‘на ган̣ха̄ма̄’’ти вутте ‘‘тхерена гахито бхависсатӣ’’ти. чинтетва̄ бхарийа̄йа саддхим̣ мантеси – ‘‘тхерена ман̣и гахито бхависсатӣ’’ти. са̄, са̄ми, ма̄ евам̣ авача, еттакам̣ ка̄лам̣ майа̄ тхерасса на кин̃чи ваджджам̣ дит̣т̣хапуббам̣, на со ман̣им̣ ган̣ха̄тӣти. ман̣ика̄ро тхерам̣ пуччхи – ‘‘бханте, имасмим̣ т̣ха̄не ман̣иратанам̣ тумхехи гахита’’нти. на ган̣ха̄ми, упа̄сака̄ти. бханте, на идха ан̃н̃о аттхи, тумхехийева гахито бхависсати, детха ме ман̣иратананти. со тасмим̣ асампат̣иччханте пуна бхарийам̣ а̄ха – ‘‘тхеренева ман̣и гахито, пӣл̣етва̄ нам̣ пуччхисса̄мӣ’’ти. са̄, са̄ми, ма̄ но на̄сайи, варам̣ амхехи да̄сабйам̣ упагантум̣, на ча тхерам̣ еварӯпам̣ ваттунти. со ‘‘саббева майам̣ да̄саттам̣ упагаччханта̄ ман̣имӯлам̣ на аггха̄ма̄’’ти раджджум̣ гахетва̄ тхерасса сӣсам̣ вет̣хетва̄ дан̣д̣ена гхат̣т̣еси. тхерасса сӣсато ча кан̣н̣ана̄са̄хи ча лохитам̣ паггхари, аккхӣни никкхамана̄ка̄раппатта̄ни ахесум̣, со ведана̄паматто бхӯмийам̣ пати. кон̃чо лохитагандхена̄ гантва̄ лохитам̣ пиви. атха нам̣ ман̣ика̄ро тхере уппаннакодхавегена ‘‘твам̣ ким̣ каросӣ’’ти па̄дена пахаритва̄ кхипи. со екаппаха̄ренева маритва̄ утта̄но ахоси.

тхеро там̣ дисва̄, упа̄сака, сӣсе вет̣ханам̣ та̄ва ме ситхилам̣ катва̄ имам̣ кон̃чам̣ олокехи ‘‘мато ва̄, но ва̄’’ти. атха нам̣ со а̄ха – ‘‘есо вийа твампи мариссасӣ’’ти. упа̄сака, имина̄ со ман̣и гилито, саче айам̣ на амарисса̄, на те ахам̣ марантопи ман̣им̣ а̄чиккхиссанти. со тасса ударам̣ пха̄летва̄ ман̣им̣ дисва̄ паведхенто сам̣виггама̄насо тхерасса па̄дамӯле нипаджджитва̄ ‘‘кхаматха, ме, бханте, аджа̄нантена майа̄ ката’’нти а̄ха. упа̄сака, нева туйхам̣ досо аттхи, на майхам̣, ват̣т̣ассевеса досо, кхама̄ми тети. бханте, саче ме кхаматха, пакатинийа̄менева ме гехе нисӣдитва̄ бхиккхам̣ ган̣хатха̄ти. ‘‘упа̄сака, на да̄на̄хам̣ ито пат̣т̣ха̄йа паресам̣ гехасса анточхаданам̣ пависисса̄ми, антогехапавесанассева хи айам̣ досо, ито пат̣т̣ха̄йа па̄десу а̄вахантесу гехадва̄ре т̣хитова бхиккхам̣ ган̣хисса̄мӣ’’ти ватва̄ дхутан̇гам̣ сама̄да̄йа имам̣ га̄тхама̄ха –

‘‘паччати мунино бхаттам̣, тхокам̣ тхокам̣ куле куле;

пин̣д̣ика̄йа чарисса̄ми, аттхи джан̇гхабалам̣ мама̄’’ти. (тхерага̄. 248) –

идан̃ча пана ватва̄ тхеро тенева бйа̄дхина̄ на чирассева паринибба̄йи. кон̃чо ман̣ика̄расса бхарийа̄йа куччхисмим̣ пат̣исандхим̣ ган̣хи. ман̣ика̄ро ка̄лам̣ катва̄ нирайе ниббатти. ман̣ика̄расса бхарийа̄ тхере мудучиттата̄йа ка̄лам̣ катва̄ девалоке ниббатти. бхиккхӯ саттха̄рам̣ тесам̣ абхисампара̄йам̣ пуччхим̣су. саттха̄, ‘‘бхиккхаве, идхекачче габбхе ниббаттанти, екачче па̄пака̄рино нирайе ниббаттанти, екачче катакалйа̄н̣а̄ девалоке ниббаттанти, ана̄сава̄ пана паринибба̄йантӣ’’ти ватва̄ анусандхим̣ гхат̣етва̄ дхаммам̣ десенто имам̣ га̄тхама̄ха –

126. ‘‘габбхамеке уппаджджанти, нирайам̣ па̄пакаммино;

саггам̣ сугатино йанти, париниббанти ана̄сава̄’’ти.

таттха габбханти идха мануссагаббхова адхиппето. сесаметтха утта̄наттхамева.

десана̄васа̄не бахӯ сота̄паттипхала̄дӣни па̄пун̣им̣сӯти.

ман̣ика̄ракулӯпакатиссаттхераваттху дасамам̣.