10. маха̄кассапаттхерапин̣д̣апа̄тадиннаваттху

аппаматто айам̣ гандхоти имам̣ дхаммадесанам̣ саттха̄ вел̣уване вихаранто маха̄кассапаттхерасса пин̣д̣апа̄тада̄нам̣ а̄раббха катхеси.

екасмин̃хи дивасе тхеро сатта̄хаччайена ниродха̄ вут̣т̣ха̄йа ‘‘ра̄джагахе сапада̄нам̣ пин̣д̣а̄йа чарисса̄мӣ’’ти никкхами. тасмим̣ пана самайе саккасса деваран̃н̃о парича̄рика̄ какут̣апа̄динийо пан̃часата̄ аччхара̄йо ‘‘тхерасса пин̣д̣апа̄там̣ дасса̄ма̄’’ти усса̄хаджа̄та̄ пан̃ча пин̣д̣апа̄тасата̄ни саджджетва̄ а̄да̄йа антара̄магге т̣хатва̄, ‘‘бханте, имам̣ пин̣д̣апа̄там̣ ган̣хатха, сан̇гахам̣ но каротха̄’’ти вадим̣су. ‘‘гаччхатха тумхе, ахам̣ дуггата̄нам̣ сан̇гахам̣ карисса̄мӣ’’ти. ‘‘бханте, ма̄ но на̄сетха, сан̇гахам̣ но каротха̄’’ти. тхеро н̃атва̄ пуна пат̣иккхипитва̄ пунапи апагантум̣ аниччхама̄на̄ йа̄чантийо ‘‘аттано пама̄н̣ам̣ на джа̄на̄тха, апагаччхатха̄’’ти аччхарам̣ пахари. та̄ тхерасса аччхарасаддам̣ сутва̄ сантхамбхитва̄ саммукха̄ т̣ха̄тум̣ асакконтийо пала̄йитва̄ девалокамева гантва̄, саккена ‘‘кахам̣ гата̄ттха̄’’ти пут̣т̣ха̄, ‘‘‘сама̄паттито вут̣т̣хитасса тхерасса пин̣д̣апа̄там̣ дасса̄ма̄’ти гата̄мха̄, дева̄’’ти. ‘‘динно пана ва̄’’ти? ‘‘ган̣хитум̣ на иччхатӣ’’ти. ‘‘ким̣ катхесӣ’’ти? ‘‘‘дуггата̄нам̣ сан̇гахам̣ карисса̄мӣ’ти а̄ха, дева̄’’ти. ‘‘тумхе кена̄ка̄рена гата̄’’ти. ‘‘имина̄ва, дева̄’’ти. сакко ‘‘тумха̄дисийо тхерасса пин̣д̣апа̄там̣ ким̣ дассантӣ’’ти сайам̣ да̄тука̄мо хутва̄, джара̄джин̣н̣о махаллако кхан̣д̣аданто палитакесо отаггасарӣро махаллакатанта ва̄йо хутва̄ суджампи девадхӣтарам̣ татха̄рӯпамева махалликам̣ катва̄ екам̣ песака̄равӣтхим̣ ма̄петва̄ тантам̣ паса̄ренто аччхи.

тхеропи ‘‘дуггата̄нам̣ сан̇гахам̣ карисса̄мӣ’’ти нагара̄бхимукхо гаччханто бахинагаре ева там̣ вӣтхим̣ дисва̄ олокенто две джане аддаса. тасмим̣ кхан̣е сакко тантам̣ паса̄рети, суджа̄ тасарам̣ ват̣т̣ети. тхеро чинтеси – ‘‘име махаллакака̄лепи каммам̣ каронтийева имасмим̣ нагаре имехи дуггататара̄ наттхи ман̃н̃е, имехи диннам̣ ул̣ун̇каматтампи са̄каматтампи гахетва̄ имесам̣ сан̇гахам̣ карисса̄мӣ’’ти. со тесам̣ геха̄бхимукхо ахоси. сакко там̣ а̄гаччхантам̣ дисва̄ суджам̣ а̄ха – ‘‘бхадде, майхам̣ аййо ито а̄гаччхати, твам̣ апассантӣ вийа тун̣хӣ хутва̄ нисӣда, кхан̣ена тхерам̣ ван̃четва̄ пин̣д̣апа̄там̣ дасса̄ма̄’’ти. тхеро а̄гантва̄ гехадва̄ре ат̣т̣ха̄си. тепи апассанта̄ вийа аттано каммамева каронта̄ тхокам̣ а̄гамим̣су.

атха сакко ‘‘гехадва̄ре еко тхеро вийа т̣хито, упадха̄рехи та̄ва̄’’ти а̄ха. ‘‘гантва̄ упадха̄ретха, са̄мӣ’’ти. со геха̄ никкхамитва̄ тхерам̣ пан̃чапатит̣т̣хитена вандитва̄ убхохи хаттхехи джан̣н̣ука̄ни оламбитва̄ ниттхунанто ут̣т̣ха̄йа ‘‘катаро тхеро ну кхо аййо’’ти тхокам̣ осаккитва̄ ‘‘аккхӣни ме дхӯма̄йантӣ’’ти ватва̄ нала̄т̣е хаттхам̣ т̣хапетва̄ уддхам̣ олокетва̄ ‘‘ахо дуккхам̣, аййо но маха̄кассапаттхеро чирассам̣ ме кут̣идва̄рам̣ а̄гато, аттхи ну кхо кин̃чи гехе’’ти а̄ха. суджа̄ тхокам̣ а̄кулам̣ вийа хутва̄ ‘‘аттхи, са̄мӣ’’ти пат̣ивачанам̣ ада̄си. сакко, ‘‘бханте, лӯкхам̣ ва̄ пан̣ӣтам̣ ва̄ти ачинтетва̄ сан̇гахам̣ но каротха̄’’ти паттам̣ ган̣хи. тхеро ‘‘етехи диннам̣ са̄кам̣ ва̄ хоту кун̣д̣акамут̣т̣хи ва̄, сан̇гахам̣ несам̣ карисса̄мӣ’’ти паттам̣ ада̄си. со антогхарам̣ пависитва̄ гхат̣иоданам̣ на̄ма гхат̣ийа̄ уддхаритва̄ паттам̣ пӯретва̄ тхерасса хаттхе т̣хапеси. со ахоси пин̣д̣апа̄то анекасӯпабйан̃джано, сакалам̣ ра̄джагаханагарам̣ гандхена аджджхоттхари.

тада̄ тхеро чинтеси – ‘‘айам̣ пурисо аппесаккхо, пин̣д̣апа̄то махесаккхо, саккасса бходжанасадисо, ко ну кхо есо’’ти. атха нам̣ ‘‘сакко’’ти н̃атва̄ а̄ха – ‘‘бха̄рийам̣ те каммам̣ катам̣ дуггата̄нам̣ сампаттим̣ вилумпантена, аджджа майхам̣ да̄нам̣ датва̄ кочидева дуггато сена̄патит̣т̣ха̄нам̣ ва̄ сет̣т̣хит̣т̣ха̄нам̣ ва̄ лабхеййа̄’’ти. ‘‘майа̄ дуггататаро наттхи, бханте’’ти. ‘‘ким̣ ка̄ран̣а̄ твам̣ дуггато девалоке раджджасирим̣ анубхаванто’’ти? ‘‘бханте, евам̣ на̄метам̣, майа̄ пана ануппанне буддхе калйа̄н̣акаммам̣ катам̣, буддхуппа̄де ваттама̄не калйа̄н̣акаммам̣ катва̄ чӯл̣аратхадевапутто маха̄ратхадевапутто анекаван̣н̣адевапуттоти име тайо сама̄надевапутта̄ мама а̄саннат̣т̣ха̄не ниббатта̄, майа̄ теджавантатара̄. ахан̃хи тесу девапуттесу ‘наккхаттам̣ кӣл̣исса̄ма̄’ти парича̄рика̄йо гахетва̄ антаравӣтхим̣ отин̣н̣есу пала̄йитва̄ гехам̣ пависа̄ми. тесан̃хи сарӣрато теджо мама сарӣрам̣ оттхарати, мама сарӣрато теджо тесам̣ сарӣрам̣ на оттхарати, ‘ко майа̄ дуггататаро, бханте’ти. ‘евам̣ сантепи ито пат̣т̣ха̄йа майхам̣ ма̄ евам̣ ван̃четва̄ да̄намада̄сӣ’’’ти. ‘‘ван̃четва̄ тумха̄кам̣ да̄не динне майхам̣ кусалам̣ аттхи, на аттхӣ’’ти? ‘‘аттха̄вусо’’ти. ‘‘евам̣ санте кусалакаммакаран̣ам̣ на̄ма майхам̣ бха̄ро, бханте’’ти. со евам̣ ватва̄ тхерам̣ вандитва̄ суджам̣ гахетва̄ тхерам̣ падаккхин̣ам̣ катва̄ веха̄сам̣ аббхуггантва̄ ‘‘ахо да̄нам̣ парамада̄нам̣ кассапе суппатит̣т̣хита’’нти уда̄нам̣ уда̄неси. тена вуттам̣ –

‘‘екам̣ самайам̣ бхагава̄ ра̄джагахе вихарати вел̣уване каландаканива̄пе. тена кхо пана самайена а̄йасма̄ маха̄кассапо пиппалигуха̄йам̣ вихарати, сатта̄хам̣ екапаллан̇кена нисинно хоти ан̃н̃атарам̣ сама̄дхим̣ сама̄паджджитва̄. атха кхо а̄йасма̄ маха̄кассапо тасса сатта̄хасса аччайена тамха̄ сама̄дхимха̄ вут̣т̣ха̄си. атха кхо а̄йасмато маха̄кассапасса тамха̄ сама̄дхимха̄ вут̣т̣хитасса етадахоси – ‘‘йам̣нӯна̄хам̣ ра̄джагахам̣ пин̣д̣а̄йа пависеййа’’нти.

‘‘тена кхо пана самайена пан̃чаматта̄ни девата̄сата̄ни уссуккам̣ а̄панна̄ни хонти а̄йасмато маха̄кассапасса пин̣д̣апа̄тапат̣ила̄бха̄йа. атха кхо а̄йасма̄ маха̄кассапо та̄ни пан̃чаматта̄ни девата̄сата̄ни пат̣иккхипитва̄ пуббан̣хасамайам̣ нива̄сетва̄ паттачӣварама̄да̄йа ра̄джагахам̣ пин̣д̣а̄йа па̄виси.

‘‘тена кхо пана самайена сакко дева̄наминдо а̄йасмато маха̄кассапасса пин̣д̣апа̄там̣ да̄тука̄мо хоти. песака̄раван̣н̣ам̣ абхинимминитва̄ тантам̣ вина̄ти, суджа̄ асуракан̃н̃а̄ тасарам̣ пӯрети. атха кхо а̄йасма̄ маха̄кассапо ра̄джагахе сапада̄нам̣ пин̣д̣а̄йа чарама̄но йена саккасса дева̄наминдасса нивесанам̣ тенупасан̇ками, аддаса̄ кхо сакко дева̄наминдо а̄йасмантам̣ маха̄кассапам̣ дӯратова а̄гаччхантам̣, дисва̄ гхара̄ никкхамитва̄ паччуггантва̄ хаттхато паттам̣ гахетва̄ гхарам̣ пависитва̄ гхат̣ийа̄ оданам̣ уддхаритва̄ паттам̣ пӯретва̄ а̄йасмато маха̄кассапасса ада̄си. со ахоси пин̣д̣апа̄то анекасӯпо анекабйан̃джано анекарасабйан̃джано. атха кхо а̄йасмато маха̄кассапасса етадахоси – ‘ко ну кхо айам̣ сатто, йасса̄йам̣ еварӯпо иддха̄нубха̄во’ти. атха кхо а̄йасмато маха̄кассапасса етадахоси – ‘сакко кхо айам̣ дева̄наминдо’ти видитва̄ саккам̣ дева̄наминдам̣ етадавоча – ‘катам̣ кхо те идам̣, косийа, ма̄ пунапи еварӯпамака̄сӣ’’’ти. ‘‘амха̄кампи, бханте кассапа, пун̃н̃ена аттхо, амха̄кампи пун̃н̃ена каран̣ӣйа’’нти.

‘‘атха кхо сакко дева̄наминдо а̄йасмантам̣ маха̄кассапам̣ абхива̄детва̄ падаккхин̣ам̣ катва̄ веха̄сам̣ аббхуггантва̄ а̄ка̄се анталиккхе тиккхаттум̣ уда̄нам̣ уда̄неси – ‘ахо да̄нам̣ парамада̄нам̣ кассапе суппатит̣т̣хитам̣, ахо да̄нам̣ парамада̄нам̣ кассапе суппатит̣т̣хитам̣, ахо да̄нам̣ парамада̄нам̣ кассапе суппатит̣т̣хита’’’нти (уда̄. 27).

атха кхо бхагава̄ виха̄ре т̣хито ева тасса там̣ саддам̣ сутва̄ бхиккхӯ а̄мантетва̄ – ‘‘пассатха, бхиккхаве, саккам̣ дева̄наминдам̣ уда̄нам̣ уда̄нетва̄ а̄ка̄сена гаччханта’’нти а̄ха. ‘‘ким̣ пана тена катам̣, бханте’’ти? ‘‘ван̃четва̄ тена майхам̣ путтасса кассапасса пин̣д̣апа̄то динно, там̣ датва̄ тут̣т̣хама̄насо уда̄нам̣ уда̄ненто гаччхатӣ’’ти. ‘‘тхерасса пин̣д̣апа̄там̣ да̄тум̣ ват̣т̣атӣ’’ти катхам̣, бханте, тена н̃а̄танти. ‘‘бхиккхаве, мама путтена садисам̣ на̄ма пин̣д̣апа̄тикам̣ дева̄пи манусса̄пи пихайантӣти ватва̄ сайампи уда̄нам̣ уда̄не’’си. сутте пана еттхакамева а̄гатам̣ –

‘‘ассоси кхо бхагава̄ дибба̄йа сотадха̄туйа̄ висуддха̄йа атиккантама̄нусика̄йа саккасса дева̄наминдасса веха̄сам̣ аббхуггантва̄ а̄ка̄се анталиккхе тиккхаттум̣ уда̄нам̣ уда̄нентасса ‘‘ахо да̄нам̣ парамада̄нам̣ кассапе суппатит̣т̣хитам̣, ахо да̄нам̣ парамада̄нам̣ кассапе суппатит̣т̣хитам̣, ахо да̄нам̣ парамада̄нам̣ кассапе суппатит̣т̣хита’’нти (уда̄. 27).

атха кхо бхагава̄ етаматтхам̣ видитва̄ та̄йам̣ вела̄йам̣ имам̣ уда̄нам̣ уда̄неси –

‘‘пин̣д̣апа̄тикасса бхиккхуно,

аттабхарасса анан̃н̃апосино;

дева̄ пихайанти та̄дино,

упасантасса сада̄ сатӣмато’’ти. (уда̄. 27);

иман̃ча пана уда̄нам̣ уда̄нетва̄, ‘‘бхиккхаве, сакко дева̄наминдо мама путтасса сӣлагандхена а̄гантва̄ пин̣д̣апа̄там̣ ада̄сӣ’’ти ватва̄ имам̣ га̄тхама̄ха –

56. ‘‘аппаматто айам̣ гандхо, йва̄йам̣ тагарачанданам̣;

йо ча сӣлаватам̣ гандхо, ва̄ти девесу уттамо’’ти.

таттха аппаматтоти париттаппама̄н̣о. йо ча сӣлаватанти йо пана сӣлаванта̄нам̣ сӣлагандхо, со тагарам̣ вийа лохитачанданам̣ вийа ча париттако на хоти, ативийа ул̣а̄ро виппха̄рито. тенева ка̄ран̣ена ва̄ти девесу уттамоти паваро сет̣т̣хо хутва̄ девесу ча мануссесу ча саббаттхамева ва̄йати, оттхаранто гаччхатӣти.

десана̄васа̄не бахӯ сота̄паттипхала̄дӣни патта̄. десана̄ маха̄джанасса са̄ттхика̄ джа̄та̄ти.

маха̄кассапаттхерапин̣д̣апа̄тадиннаваттху дасамам̣.