1. патхавикатха̄пасутапан̃часатабхиккхуваттху

ко имам̣ патхавим̣ вичессатӣти имам̣ дхаммадесанам̣ саттха̄ са̄ваттхийам̣ вихаранто патхавикатха̄пасуте пан̃часате бхиккхӯ а̄раббха катхеси.

те кира бхагавата̄ саддхим̣ джанападача̄рикам̣ чаритва̄ джетаванам̣ а̄гантва̄ са̄йанхасамайе упат̣т̣ха̄наса̄ла̄йам̣ саннисинна̄ аттана̄ гатагатат̣т̣ха̄несу ‘‘асукага̄мато асукага̄магаманат̣т̣ха̄не самам̣ висамам̣ каддамабахулам̣ саккхарабахулам̣ ка̄л̣аматтикам̣ тамбаматтика’’нти патхавикатхам̣ катхесум̣. саттха̄ а̄гантва̄, ‘‘ка̄йа нуттха, бхиккхаве, етарахи катха̄йа саннисинна̄’’ти пуччхитва̄, ‘‘бханте, амхехи вичаритат̣т̣ха̄не патхавикатха̄йа̄’’ти вутте, ‘‘бхиккхаве, еса̄ ба̄хирапатхавӣ на̄ма, тумхехи аджджхуттикапатхавийам̣ парикаммам̣ ка̄тум̣ ват̣т̣атӣ’’ти ватва̄ има̄ две га̄тха̄ абха̄си –

44. ‘‘ко имам̣ патхавим̣ вичессати,

йамалокан̃ча имам̣ садевакам̣;

ко дхаммападам̣ судеситам̣,

кусало пуппхамива пачессати.

45. ‘‘секхо патхавим̣ вичессати,

йамалокан̃ча имам̣ садевакам̣;

секхо дхаммападам̣ судеситам̣,

кусало пуппхамива пачессатӣ’’ти.

таттха ко иманти ко имам̣ аттабха̄васан̇кха̄там̣ патхавим̣. вичессатӣти аттано н̃а̄н̣ена вичиниссати виджа̄ниссати, пат̣ивиджджхиссати, саччхикариссатӣти аттхо. йамалокан̃ча̄ти чатуббидхам̣ апа̄йалокан̃ча. имам̣ садеваканти имам̣ мануссалокан̃ча девалокена саддхим̣ ко вичессати вичиниссати виджа̄ниссати пат̣ивиджджхиссати саччхикариссатӣти пуччхи. кодхаммападам̣ судеситанти йатха̄сабха̄вато катхитатта̄ судеситам̣ саттатим̣сабодхипаккхийадхаммасан̇кха̄там̣ дхаммападам̣ кусало ма̄ла̄ка̄ро пуппхам̣ вичинанто вийа ко пачессати вичиниссати виджа̄ниссати упапариккхиссати пат̣ивиджджхиссати, саччхикариссатӣти аттхо. секхоти адхисӣласиккха̄, адхичиттасиккха̄, адхипан̃н̃а̄сиккха̄ти има̄ тиссо сиккха̄ сиккханато сота̄паттимаггат̣т̣хам̣ а̄дим̣ катва̄ йа̄ва арахаттамаггат̣т̣ха̄ саттавидхо секхо имам̣ аттабха̄васан̇кха̄там̣ патхавим̣ арахаттамаггена тато чхандара̄гам̣ апакад̣д̣ханто вичессати вичиниссати виджа̄ниссати пат̣ивиджджхиссати саччхикариссати. йамалокан̃ча̄ти там̣ йатха̄вуттапака̄рам̣ йамалокан̃ча имам̣ мануссалокан̃ча саха девехи садевакам̣ свева вичессати вичиниссати виджа̄ниссати пат̣ивиджджхиссати саччхикариссати. секхоти свева саттавидхо секхо, йатха̄ на̄ма кусало ма̄ла̄ка̄ро пуппха̄ра̄мам̣ пависитва̄ тарун̣амакул̣а̄ни ча па̄н̣акавиддха̄ни ча мила̄та̄ни ча ган̣т̣хикаджа̄та̄ни ча пуппха̄ни ваджджетва̄ собхана̄ни суджа̄тасуджа̄та̄нева пуппха̄ни вичина̄ти, евамева имам̣ сукатхитам̣ суниддит̣т̣хам̣ бодхипаккхийадхаммападампи пан̃н̃а̄йа пачессати вичиниссати упапариккхиссати пат̣ивиджджхиссати саччхикариссатӣти саттха̄ сайамева пан̃хам̣ виссаджджеси.

десана̄васа̄не пан̃часата̄пи бхиккхӯ саха пат̣исамбхида̄хи арахаттам̣ па̄пун̣им̣су. сампаттапариса̄йапи са̄ттхика̄ дхаммадесана̄ ахосӣти.

патхавикатха̄пасутапан̃часатабхиккхуваттху пат̣хамам̣.