8. ан̃н̃атарабхиккхуваттху

аппама̄дарато бхиккхӯти имам̣ дхаммадесанам̣ саттха̄ джетаване вихаранто ан̃н̃атарам̣ бхиккхум̣ а̄раббха катхеси.

со кира саттху сантике йа̄ва арахатта̄ каммат̣т̣ха̄нам̣ катха̄петва̄ аран̃н̃ам̣ пависитва̄ гхат̣енто ва̄йаманто арахаттам̣ паттум̣ на̄саккхи. со ‘‘висесетва̄ каммат̣т̣ха̄нам̣ катха̄песса̄мӣ’’ти тато никкхамитва̄ саттху сантикам̣ а̄гаччханто антара̄магге махантам̣ да̄ваггим̣ ут̣т̣хитам̣ дисва̄ вегена екам̣ мун̣д̣апаббатаматтхакам̣ абхируйха нисинно аран̃н̃ам̣ д̣айхама̄нам̣ аггим̣ дисва̄ а̄рамман̣ам̣ ган̣хи – ‘‘йатха̄ айам̣ агги маханта̄ни ча кхуддака̄ни ча упа̄да̄на̄ни д̣аханто гаччхати, евам̣ арийамагган̃а̄н̣аггина̄пи маханта̄ни ча кхуддака̄ни ча сам̣йоджана̄ни д̣ахантена гантаббам̣ бхависсатӣ’’ти. саттха̄ гандхакут̣ийам̣ нисиннова тасса читта̄ча̄рам̣ н̃атва̄, ‘‘евамева, бхиккху, маханта̄нипи кхуддака̄нипи упа̄да̄на̄ни вийа имесам̣ сатта̄нам̣ аббхантаре уппаджджама̄на̄ни ан̣ум̣тхӯла̄ни сам̣йоджана̄ни, та̄ни н̃а̄н̣аггина̄ джха̄петва̄ абхаббуппаттика̄ни ка̄тум̣ ват̣т̣атӣ’’ти ватва̄ обха̄сам̣ виссаджджетва̄ тасса бхиккхуно абхимукхе нисинно вийа пан̃н̃а̄йама̄но имам̣ обха̄сага̄тхама̄ха –

31. ‘‘аппама̄дарато бхиккху, пама̄де бхайадасси ва̄;

сам̣йоджанам̣ ан̣ум̣ тхӯлам̣, д̣ахам̣ аггӣва гаччхатӣ’’ти.

таттха аппама̄даратоти аппама̄де рато абхирато, аппама̄дена вӣтина̄ментоти аттхо. пама̄де бхайадасси ва̄ти нирайуппаттиа̄дикам̣ пама̄де бхайам̣ бхайато пассанто, та̄сам̣ ва̄ уппаттӣнам̣ мӯлатта̄ пама̄дам̣ бхайато пассанто. сам̣йоджананти ват̣т̣адуккхена саддхим̣ йоджанам̣ бандханам̣ паджа̄нам̣ ват̣т̣е осӣда̄панасаматтхам̣ дасавидхам̣ сам̣йоджанам̣. ан̣ум̣ тхӯланти махантан̃ча кхуддакан̃ча. д̣ахам̣ аггӣва гаччхатӣти йатха̄ айам̣ аггӣ етам̣ махантан̃ча кхуддакан̃ча упа̄да̄нам̣ д̣ахантова гаччхати. евамесо аппама̄дарато бхиккху аппама̄да̄дхигатена н̃а̄н̣аггина̄ етам̣ сам̣йоджанам̣ д̣аханто абхаббуппаттикам̣ каронто гаччхатӣти аттхо.

га̄тха̄парийоса̄не со бхиккху йатха̄нисиннова саббасам̣йоджана̄ни джха̄петва̄ саха пат̣исамбхида̄хи арахаттам̣ патва̄ а̄ка̄сена̄гантва̄ татха̄гатасса суван̣н̣аван̣н̣ам̣ сарӣрам̣ тхометва̄ ван̣н̣етва̄ вандама̄нова пакка̄мӣти.

ан̃н̃атарабхиккхуваттху ат̣т̣хамам̣.