10. чундасӯкарикаваттху

идха сочетӣти имам̣ дхаммадесанам̣ саттха̄ вел̣уване вихаранто чундасӯкарикам̣ на̄ма пурисам̣ а̄раббха катхеси.

со кира пан̃чапан̣н̣а̄са васса̄ни сӯкаре вадхитва̄ кха̄данто ча виккин̣анто ча джӣвикам̣ каппеси. чха̄така̄ле сакат̣ена вӣхим̣ а̄да̄йа джанападам̣ гантва̄ екана̄л̣идвена̄л̣иматтена га̄масӯкарапотаке кин̣итва̄ сакат̣ам̣ пӯретва̄ а̄гантва̄ паччха̄нивесане ваджам̣ вийа екам̣ т̣ха̄нам̣ париккхипитва̄ таттхева тесам̣ нива̄пам̣ ропетва̄, тесу на̄на̄гаччхе ча сарӣрамалан̃ча кха̄дитва̄ вад̣д̣хитесу йам̣ йам̣ ма̄ретука̄мо хоти, там̣ там̣ а̄л̣а̄не ниччалам̣ бандхитва̄ сарӣрамам̣сасса уддхума̄йитва̄ бахалабха̄ваттхам̣ чатурассамуггарена потхетва̄, ‘‘бахаламам̣со джа̄то’’ти н̃атва̄ мукхам̣ виваритва̄ антаре дан̣д̣акам̣ датва̄ лохатха̄лийа̄ паккутхитам̣ ун̣ходакам̣ мукхе а̄син̃чати. там̣ куччхим̣ пависитва̄ паккутхитам̣ карӣсам̣ а̄да̄йа адхобха̄гена никкхамати, йа̄ва тхокампи карӣсам̣ аттхи, та̄ва а̄вилам̣ хутва̄ никкхамати, суддхе ударе аччхам̣ ана̄вилам̣ хутва̄ никкхамати. атхасса авасесам̣ удакам̣ пит̣т̣хийам̣ а̄син̃чати. там̣ ка̄л̣ачаммам̣ уппа̄т̣етва̄ гаччхати. тато тин̣укка̄йа лома̄ни джха̄петва̄ тикхин̣ена асина̄ сӣсам̣ чхиндати. паггхаран̣атам̣ лохитам̣ бха̄джанена пат̣иггахетва̄ мам̣сам̣ лохитена маддитва̄ пачитва̄ путтада̄рамаджджхе нисинно кха̄дитва̄ сесам̣ виккин̣а̄ти. тасса имина̄ва нийа̄мена джӣвикам̣ каппентасса пан̃чапан̣н̣а̄са васса̄ни атикканта̄ни. татха̄гате дхуравиха̄ре васанте екадивасампи пуппхамут̣т̣химаттена пӯджа̄ ва̄ кат̣аччхуматтам̣ бхиккхада̄нам̣ ва̄ ан̃н̃ам̣ ва̄ кин̃чи пун̃н̃ам̣ на̄ма на̄хоси. атхасса сарӣре рого уппаджджи, джӣвантассева авӣчимаха̄нирайасанта̄по упат̣т̣хахи. авӣчисанта̄по на̄ма йоджанасате т̣хатва̄ олокентасса аккхӣнам̣ бхиджджанасаматтхо парил̣а̄хо хоти. вуттампи четам̣ –

‘‘тасса айомайа̄ бхӯми, джалита̄ теджаса̄йута̄;

саманта̄ йоджанасатам̣, пхаритва̄ тит̣т̣хати саббада̄’’ти. (ма. ни. 3.267; а. ни. 3.36);

на̄гасенаттхерена панасса па̄катикаггисанта̄пато адхиматтата̄йа айам̣ упама̄ вутта̄ – ‘‘йатха̄, маха̄ра̄джа, кӯт̣а̄га̄раматто па̄са̄н̣опи нерайикаггимхи паккхитто кхан̣ена вилайам̣ гаччхати, ниббаттасатта̄ панеттха каммабалена ма̄тукуччхигата̄ вийа на вилӣйантӣ’’ти (ми. па. 2.4.6). тасса тасмим̣ санта̄пе упат̣т̣хите каммасариккхако а̄ка̄ро уппаджджи. гехамаджджхейева сӯкараравам̣ равитва̄ джан̣н̣укехи вичаранто пураттхимаваттхумпи паччхимаваттхумпи гаччхати. атхасса гехама̄нусака̄ там̣ дал̣хам̣ гахетва̄ мукхам̣ пидаханти. каммавипа̄ко на̄ма на сакка̄ кеначи пат̣иба̄хитум̣. со виравантова ито чито ча вичарати. саманта̄ саттасу гхаресу манусса̄ ниддам̣ на лабханти. маран̣абхайена таджджитасса пана бахиниккхаманам̣ нива̄ретум̣ асакконто саббо гехаджано йатха̄ антот̣хито бахи вичаритум̣ на саккоти, татха̄ гехадва̄ра̄ни тхакетва̄ бахигехам̣ парива̄ретва̄ раккханто аччхати. итаро антогехейева нирайасанта̄пена вираванто ито чито ча вичарати. евам̣ саттадиваса̄ни вичаритва̄ ат̣т̣хаме дивасе ка̄лам̣ катва̄ авӣчимаха̄нирайе ниббатти. авӣчимаха̄нирайо девадӯтасуттена (ма. ни. 3.261 а̄дайо; а. ни. 3.36) ван̣н̣етабботи.

бхиккхӯ тасса гхарадва̄рена гаччханта̄ там̣ саддам̣ сутва̄, ‘‘сӯкарасаддо’’ти сан̃н̃ино хутва̄ виха̄рам̣ гантва̄ саттху сантике нисинна̄ евама̄хам̣су – ‘‘бханте, чундасӯкаритасса гехадва̄рам̣ пидахитва̄ сӯкара̄нам̣ ма̄рийама̄на̄нам̣ аджджа саттамо дивасо, гехе ка̄чи ман̇галакирийа̄ бхависсати ман̃н̃е. еттаке на̄ма, бханте, сӯкаре ма̄рентасса екампи меттачиттам̣ ва̄ ка̄рун̃н̃ам̣ ва̄ наттхи, на вата но еварӯпо каккхал̣о пхарусо сатто дит̣т̣хапуббо’’ти. саттха̄ – ‘‘на, бхиккхаве, со име саттадивасе сӯкаре ма̄рети, каммасариккхакам̣ панасса випа̄кам̣ удапа̄ди, джӣвантассева авӣчимаха̄нирайасанта̄по упат̣т̣ха̄си. со тена санта̄пена сатта диваса̄ни сӯкараравам̣ раванто антонивесане вичаритва̄ аджджа ка̄лам̣ катва̄ авӣчимхи ниббатто’’ти ватва̄, ‘‘бханте, идха локе евам̣ сочитва̄ пуна гантва̄ сочанат̣т̣ха̄нейева ниббатто’’ти вутте, ‘‘а̄ма, бхиккхаве, паматта̄ на̄ма гахат̣т̣ха̄ ва̄ хонту паббаджита̄ ва̄, убхайаттха сочантийева̄’’ти ватва̄ имам̣ га̄тхама̄ха –

15. ‘‘идха сочати печча сочати,

па̄пака̄рӣ убхайаттха сочати;

со сочати со вихан̃н̃ати;

дисва̄ каммакилит̣т̣хаматтано’’ти.

таттха па̄пака̄рӣти на̄наппака̄расса па̄пакаммасса ка̄рако пуггало ‘‘акатам̣ вата ме калйа̄н̣ам̣, катам̣ па̄па’’нти екам̣сенева маран̣асамайе идха сочати, идамасса каммасочанам̣. випа̄кам̣ анубхаванто пана печча сочати. идамасса паралоке випа̄касочанам̣. евам̣ со убхайаттха сочатийева. тенева ка̄ран̣ена джӣвама̄нойева со чундасӯкарикопи сочати. дисва̄ каммакилит̣т̣ханти аттано килит̣т̣хакаммам̣ пасситва̄ на̄наппака̄ракам̣ вилапанто вихан̃н̃атӣти.

га̄тха̄парийоса̄не бахӯ сота̄панна̄дайо ахесум̣. маха̄джанасса са̄ттхика̄ дхаммадесана̄ джа̄та̄ти.

чундасӯкарикаваттху дасамам̣.