7. джа̄лийасуттаван̣н̣ана̄

две паббаджитаваттхуван̣н̣ана̄

378. евам̣ ме сутам̣…пе… косамбийанти джа̄лийасуттам̣. татра̄йам̣ апуббападаван̣н̣ана̄. гхосита̄ра̄мети гхоситена сет̣т̣хина̄ кате а̄ра̄ме. пуббе кира аллакаппарат̣т̣хам̣ на̄ма ахоси. тато котӯхалико на̄ма далиддо чха̄такабхайена сапуттада̄ро авантират̣т̣хам̣ гаччханто путтам̣ вахитум̣ асакконто чхад̣д̣етва̄ агама̄си, ма̄та̄ ниваттитва̄ там̣ гахетва̄ гата̄, те екам̣ гопа̄лакага̄мам̣ пависим̣су. гопа̄лакена ча тада̄ бахупа̄йа̄со пат̣ийатто хоти, те тато па̄йа̄сам̣ лабхитва̄ бхун̃джим̣су. атха со пурисо балавапа̄йа̄сам̣ бхутто джӣра̄петум̣ асакконто раттибха̄ге ка̄лам̣ катва̄ таттхева сунакхийа̄ куччхисмим̣ пат̣исандхим̣ гахетва̄ куккуро джа̄то, со гопа̄лакасса пийо ахоси. гопа̄лако ча паччекабуддхам̣ упат̣т̣хахати. паччекабуддхопи бхаттакиччапарийоса̄не куккурасса екекам̣ пин̣д̣ам̣ дети, со паччекабуддхе синехам̣ уппа̄детва̄ гопа̄лакена саддхим̣ пан̣н̣аса̄лампи гаччхати. гопа̄лаке асаннихите бхаттавела̄йам̣ сайамева гантва̄ ка̄ла̄рочанаттхам̣ пан̣н̣аса̄ладва̄ре бхуссати, антара̄маггепи чан̣д̣амиге дисва̄ бхусситва̄ пала̄пети. со паччекабуддхе мудукена читтена ка̄лам̣катва̄ девалоке ниббатти. татрасса гхосакадевапутто твева на̄мам̣ ахоси. со девалокато чавитва̄ косамбийам̣ екасса куласса гхаре ниббатти. там̣ апуттако сет̣т̣хи тасса ма̄та̄питӯнам̣ дханам̣ датва̄ путтам̣ катва̄ аггахеси. атха аттано путте джа̄те саттаккхаттум̣ гха̄та̄петум̣ упакками. со пун̃н̃авантата̄йа саттасупи т̣ха̄несу маран̣ам̣ аппатва̄ аваса̄не ека̄йа сет̣т̣хидхӣта̄йа веййаттийена ладдхаджӣвито апарабха̄ге питуаччайена сет̣т̣хит̣т̣ха̄нам̣ патва̄ гхосакасет̣т̣хи на̄ма джа̄то. ан̃н̃епи косамбийам̣ куккут̣асет̣т̣хи, па̄ва̄рийасет̣т̣хӣти две сет̣т̣хино аттхи, имина̄ саддхим̣ тайо ахесум̣.

тена ча самайена химавантато пан̃часатата̄паса̄ сарӣрасантаппанаттхам̣ антарантара̄косамбим̣ а̄гаччханти, тесам̣ ете тайо сет̣т̣хӣ аттано аттано уййа̄несу пан̣н̣акут̣ийо катва̄ упат̣т̣ха̄нам̣ каронти. атхекадивасам̣ те та̄паса̄ химавантато а̄гаччханта̄ маха̄канта̄ре тасита̄ киланта̄ екам̣ махантам̣ ват̣аруккхам̣ патва̄ таттха адхиваттха̄йа девата̄йа сантика̄ сан̇гахам̣ пачча̄сисанта̄ нисӣдим̣су. девата̄ сабба̄лан̇ка̄равибхӯситам̣ хаттхам̣ паса̄ретва̄ тесам̣ па̄нӣйапа̄нака̄дӣни датва̄ киламатхам̣ пат̣ивинодеси, ете девата̄йа̄нубха̄вена вимхита̄ пуччхим̣су – ‘‘ким̣ ну кхо, девате, каммам̣ катва̄ тайа̄ айам̣ сампатти ладдха̄’’ти? девата̄ а̄ха – ‘‘локе буддхо на̄ма бхагава̄ уппанно, со етарахи са̄ваттхийам̣ вихарати, ана̄тхапин̣д̣ико гахапати там̣ упат̣т̣хахати. со упосатхадивасесу аттано бхатака̄нам̣ пакатибхаттаветанамева датва̄ упосатхам̣ ка̄ра̄песи. атха̄хам̣ екадивасам̣ маджджханхике па̄тара̄саттха̄йа а̄гато кан̃чи бхатакакаммам̣ акаронтам̣ дисва̄ – ‘аджджа манусса̄ касма̄ каммам̣ на каронтӣ’ти пуччхим̣. тасса ме таматтхам̣ а̄рочесум̣. атха̄хам̣ етадавочам̣ – ‘ида̄ни упад̣д̣хадивасо гато, сакка̄ ну кхо упад̣д̣хупосатхам̣ ка̄ту’нти. тато сет̣т̣хисса пат̣иведетва̄ ‘‘сакка̄ ка̄ту’’нти а̄ха. сва̄хам̣ упад̣д̣хадивасам̣ упад̣д̣хупосатхам̣ сама̄дийитва̄ тадахева ка̄лам̣ катва̄ имам̣ сампаттим̣ пат̣илабхи’’нти.

атха те та̄паса̄ ‘‘буддхо кира уппанно’’ти сан̃джа̄тапӣтипа̄моджджа̄ татова са̄ваттхим̣ гантука̄ма̄ хутва̄пи – ‘‘бахука̄ра̄ но упат̣т̣ха̄касет̣т̣хино тесампи имаматтхама̄рочесса̄ма̄’’ти косамбим̣ гантва̄ сет̣т̣хӣхи катасакка̄рабахума̄на̄ ‘‘тадахева майам̣ гаччха̄ма̄’’ти а̄хам̣су. ‘‘ким̣, бханте, турита̄ттха, нану тумхе пуббе чатта̄ро пан̃ча ма̄се васитва̄ гаччхатха̄’’ти ча вутте там̣ паваттим̣ а̄рочесум̣. ‘‘тена хи, бханте, сахева гаччха̄ма̄’’ти ча вутте ‘‘гаччха̄ма майам̣, тумхе сан̣икам̣ а̄гаччхатха̄’’ти са̄ваттхим̣ гантва̄ бхагавато сантике паббаджитва̄ арахаттам̣ па̄пун̣им̣су. тепи сет̣т̣хино пан̃часатапан̃часатасакат̣апарива̄ра̄ са̄ваттхим̣ гантва̄ да̄на̄дӣни датва̄ косамбим̣ а̄гаманаттха̄йа бхагавантам̣ йа̄читва̄ пачча̄гамма тайо виха̄ре ка̄ресум̣. тесу куккут̣асет̣т̣хина̄ като куккут̣а̄ра̄мо на̄ма, па̄ва̄рийасет̣т̣хина̄ като па̄ва̄рикамбаванам̣ на̄ма, гхоситасет̣т̣хина̄ като гхосита̄ра̄мо на̄ма ахоси. там̣ сандха̄йа вуттам̣ – ‘‘косамбийам̣ вихарати гхосита̄ра̄ме’’ти.

мун̣д̣ийоти идам̣ тасса на̄мам̣. джа̄лийоти идампи итарасса на̄мамева. йасма̄ панасса упаджджха̄йо да̄румайена паттена пин̣д̣а̄йа чарати, тасма̄ да̄рупаттикантева̄сӣти вуччати. етадавочунти упа̄рамбха̄дхиппа̄йена ва̄дам̣ а̄ропетука̄ма̄ хутва̄ етадавочум̣. ити кира несам̣ ахоси, саче саман̣о готамо ‘‘там̣ джӣвам̣ там̣ сарӣра’’нти ваккхати, атхасса майам̣ етам̣ ва̄дам̣ а̄ропесса̄ма – ‘‘бхо готама, тумха̄кам̣ ладдхийа̄ идхева сатто бхиджджати, тена во ва̄до уччхедава̄до хотӣ’’ти. саче пана ‘‘ан̃н̃ам̣ джӣвам̣ ан̃н̃ам̣ сарӣра’’нти ваккхати, атхассетам̣ ва̄дам̣ а̄ропесса̄ма ‘‘тумха̄кам̣ ва̄де рӯпам̣ бхиджджати, на сатто бхиджджати. тена во ва̄де сатто сассато а̄паджджатӣ’’ти. атха бхагава̄ ‘‘име ва̄да̄ропанаттха̄йа пан̃хам̣ пуччханти, мама са̄сане име две анте анупагамма маджджхима̄ пат̣ипада̄ аттхӣти на джа̄нанти, ханда несам̣ пан̃хам̣ ависсаджджетва̄ тасса̄йева пат̣ипада̄йа а̄вибха̄ваттхам̣ дхаммам̣ десемӣ’’ти чинтетва̄ ‘‘тена ха̄вусо’’тиа̄дима̄ха.

379-380. таттха каллам̣ ну кхо тассетам̣ вачана̄йа̄ти тассетам̣ саддха̄паббаджитасса тивидхам̣ сӣлам̣ парипӯретва̄ пат̣хамаджджха̄нам̣ паттасса йуттам̣ ну кхо етам̣ ваттунти аттхо. там̣ сутва̄ парибба̄джака̄ путхуджджано на̄ма йасма̄ ниббичикиччхо на хоти, тасма̄ када̄чи евам̣ вадеййа̄ти ман̃н̃ама̄на̄ – ‘‘каллам̣ тассетам̣ вачана̄йа̄’’ти а̄хам̣су. атха ча пана̄хам̣ на вада̄мӣти ахам̣ етамевам̣ джа̄на̄ми, но ча евам̣ вада̄ми, атха кхо касин̣апарикаммам̣ катва̄ бха̄вентасса пан̃н̃а̄балена уппаннам̣ махаггатачиттаметанти сан̃н̃ам̣ т̣хапесим̣. на каллам̣ тассетанти идам̣ те парибба̄джака̄ – ‘‘йасма̄ кхӣн̣а̄саво вигатасаммохо тин̣н̣авичикиччхо, тасма̄ на йуттам̣ тассетам̣ ватту’’нти ман̃н̃ама̄на̄ ваданти. сесаметтха утта̄наттхамева̄ти.

ити суман̇галавила̄синийа̄ дӣгханика̄йат̣т̣хакатха̄йам̣

джа̄лийасуттаван̣н̣ана̄ нит̣т̣хита̄.