1. саббасан̇га̄хикава̄раван̣н̣ана̄

978. ида̄ни таданантаре дхаммахадайавибхан̇ге па̄л̣ипариччхедо та̄ва евам̣ ведитаббо – еттха хи а̄дитова кхандха̄дӣнам̣ два̄дасаннам̣ кот̣т̣ха̄са̄нам̣ васена саббасан̇га̄хикава̄ро на̄ма вутто. дутийо тесам̣йева дхамма̄нам̣ ка̄мадха̄туа̄дӣсу уппатта̄нуппаттидассанава̄ро на̄ма. татийо таттхева парийа̄панна̄парийа̄паннадассанава̄ро на̄ма. чатуттхо тӣсу бхӯмӣсу уппаттиккхан̣е виджджама̄на̄виджджама̄надхаммадассанава̄ро на̄ма. пан̃чамо тесам̣ дхамма̄нам̣ бхӯмантаравасена дассанава̄ро на̄ма. чхат̣т̣хо гатӣсу уппа̄дакакаммаа̄йуппама̄н̣адассанава̄ро на̄ма. саттамо абхин̃н̃еййа̄дива̄ро на̄ма. ат̣т̣хамо са̄рамман̣а̄на̄рамман̣ава̄ро на̄ма. навамо тесам̣ кхандха̄дидхамма̄нам̣ дит̣т̣хасута̄дивасена сан̇гахетва̄ дассанава̄ро на̄ма. дасамо кусалаттика̄дивасена сан̇гахетва̄ дассанава̄ро на̄ма.

979. евам̣ дасахи ва̄рехи париччхинна̄йа па̄л̣ийа̄ пат̣хаме та̄ва саббасан̇га̄хикава̄ре ‘‘авӣчито йа̄ва бхаваггам̣ еттхантаре кати кхандха̄’’ти пуччхите ‘‘екоти ва̄…пе… чатта̄роти ва̄ чха̄ти ва̄ аватва̄ пан̃ча̄ти ваттум̣ саматтхо ан̃н̃о наттхӣ’’ти аттано н̃а̄н̣абалам̣ дӣпенто пан̃чаккхандха̄ти пуччха̄нурӯпам̣ виссаджджанам̣ а̄ха. йатха̄пуччхам̣ виссаджджанан̃хи саббан̃н̃убйа̄каран̣ам̣ на̄ма̄ти вуччати. два̄даса̄йатана̄нӣтиа̄дӣсупи есева найо. рӯпаккхандха̄дӣнам̣ пабхедо кхандхавибхан̇га̄дӣсу вуттанайенева ведитаббо.