5-6. ган̣д̣асутта̄диван̣н̣ана̄

15-16. пан̃чаме тӣн̣и чатта̄ри васса̄ни вассаган̣а̄, анеке вассаган̣а̄ уппанна̄ асса̄ти анекавассаган̣ико. тассассӯти тасса бхавеййум̣. абхеданамукха̄нӣти на кеначи бхиндитва̄ ката̄ни, кевалам̣ каммасамут̣т̣хита̄нева ван̣амукха̄ни. джегуччхийам̣йева̄ти джигуччхитаббамева пат̣икӯламева. ча̄тумаха̄бхӯтикасса̄ти чатумаха̄бхӯтамайасса. оданакумма̄сӯпачайасса̄ти оданена чева кумма̄сена ча упачитасса вад̣д̣хитасса. аниччуччха̄данапаримадданабхеданавиддхам̣санадхаммасса̄ти хутва̄ абха̄ват̣т̣хена аниччадхаммасса, дуггандхавигха̄таттха̄йа танувилепанена уччха̄данадхаммасса, ан̇гапаччан̇га̄ба̄дхавиноданаттха̄йа кхуддакасамба̄ханена паримадданадхаммасса, дахарака̄ле ва̄ ӯрӯсу сайа̄петва̄ габбхава̄сена дуссан̣т̣хита̄нам̣ тесам̣ тесам̣ ан̇гапаччан̇га̄нам̣ сан̣т̣ха̄насампа̄данаттхам̣ ан̃чханапӣл̣ана̄дивасена паримадданадхаммасса, евам̣ парихаритасса̄пи ча бхеданавиддхам̣санадхаммасса, бхиджджанавикиран̣асабха̄вассева̄ти аттхо. еттха ча аниччападена чева бхеданавиддхам̣санападехи часса аттхан̇гамо катхито, сесехи самудайо. ниббиндатха̄ти уккан̣т̣хатха паджахатха имам̣ ка̄йанти дассети. евамимасмим̣ сутте балававипассана̄ катхита̄. чхат̣т̣хам̣ вуттанайамева. сан̃н̃а̄сӣсена панеттха н̃а̄н̣амева катхитам̣.