(8) 3. йамакавагго

1-2. саддха̄суттадвайаван̣н̣ана̄

71-72. ат̣т̣хамасса пат̣хаме но ча сӣлава̄ти на сӣлесу парипӯрака̄рӣ. самантапа̄са̄дикоти самантато паса̄даджанако. сабба̄ка̄рапарипӯроти саббехи саман̣а̄ка̄рехи саман̣адхаммакот̣т̣ха̄сехи парипӯро. дутийе санта̄ти паччанӣкасантата̄йа санта̄. вимоккха̄ти паччанӣкадхаммехи вимуттатта̄ ча вимоккха̄.

3-9. маран̣ассатисуттадвайа̄диван̣н̣ана̄

73-79. татийе бха̄ветха ноти бха̄ветха ну. са̄сананти анусит̣т̣хи. а̄сава̄нам̣ кхайа̄йа̄ти арахаттапхалаттха̄йа. чатуттхе патихита̄йа̄ти пат̣ипанна̄йа. со мамасса антара̄йоти со мама джӣвитантара̄йопи, путхуджджанака̄лакирийам̣ каронтасса саггантара̄йопи маггантара̄йопи асса. саттхака̄ ва̄ ме ва̄та̄ти саттхам̣ вийа ан̇гаман̇га̄ни кантантӣти саттхака̄. пан̃чама̄дӣни вуттанайа̄нева. наваме сам̣сагга̄ра̄мата̄ти пан̃чавидхе сам̣сагге а̄ра̄мата̄.

10. кусӣта̄рамбхаваттхусуттаван̣н̣ана̄

80. дасаме кусӣтаваттхӯнӣти кусӣтасса аласасса ваттхӯни патит̣т̣ха̄, косаджджака̄ран̣а̄нӣти аттхо. каммам̣ каттаббам̣ хотӣти чӣваравича̄ран̣а̄дикаммам̣ каттаббам̣ хоти. на вӣрийам̣ а̄рабхатӣти дувидхампи вӣрийам̣ на̄рабхати. аппаттасса̄ти джха̄навипассана̄маггапхаладхаммасса аппаттасса паттийа̄. анадхигатасса̄ти тассева анадхигатасса адхигаматтха̄йа. асаччхикатасса̄ти тадева асаччхикатасса саччхикаран̣аттха̄йа. идам̣ пат̣хаманти идам̣ ‘‘ханда̄хам̣ нипаджджа̄мӣ’’ти евам̣ осӣданам̣ пат̣хамам̣ кусӣтаваттху. имина̄ найена саббаттха аттхо ведитаббо. ма̄са̄читакам̣ ман̃н̃ети еттха пана ма̄са̄читам̣ на̄ма тинтама̄со. йатха̄ тинтама̄со гаруко хоти, евам̣ гарукоти адхиппа̄йо. гила̄на̄ вут̣т̣хито хотӣти гила̄но хутва̄ паччха̄ вут̣т̣хито хоти. а̄рамбхаваттхӯнӣти вӣрийака̄ран̣а̄ни. тесампи имина̄ва найена аттхо ведитаббо. сесам̣ саббаттха утта̄намева̄ти.

йамакавагго ат̣т̣хамо.