9. сӣтивагго

1. сӣтибха̄васуттаван̣н̣ана̄

85. навамасса пат̣хаме сӣтибха̄ванти сӣталабха̄вам̣. йасмим̣ самайе читтам̣ нигган̣хитаббантиа̄дӣсу уддхаччасамайе читтам̣ сама̄дхина̄ ниггахетаббам̣ на̄ма, косаджджа̄нупатитака̄ле вӣрийена паггахетаббам̣ на̄ма, нирасса̄дагатака̄ле сама̄дхина̄ сампахам̣ситаббам̣ на̄ма, самаппаваттака̄ле боджджхан̇гупеккха̄йа аджджхупеккхитаббам̣ на̄ма.

2. а̄варан̣асуттаван̣н̣ана̄

86. дутийе камма̄варан̣ата̄йа̄ти пан̃ча̄нантарийакаммехи. килеса̄варан̣ата̄йа̄ти нийатамиччха̄дит̣т̣хийа̄. випа̄ка̄варан̣ата̄йа̄ти акусалавипа̄капат̣исандхийа̄ ва̄ кусалавипа̄кехи ахетукапат̣исандхийа̄ ва̄ти.

4-5. суссӯсатисутта̄диван̣н̣ана̄

88-89. чатуттхе анаттханти авад̣д̣хим̣. аттхам̣ рин̃чатӣти вад̣д̣хиаттхам̣ чхад̣д̣ети. анануломика̄йа̄ти са̄санасса анануломика̄йа. пан̃чаме дит̣т̣хисампаданти сота̄паттимаггам̣.

8-11. абхаббат̣т̣ха̄насуттачатуккаван̣н̣ана̄

92-95. ат̣т̣хаме ана̄гаманӣйам̣ ваттхунти анупагантаббам̣ ка̄ран̣ам̣, пан̃чаннам̣ вера̄нам̣ два̄сат̣т̣хийа̄ ча дит̣т̣хигата̄наметам̣ адхивачанам̣. ат̣т̣хамам̣ бхаванти ка̄ма̄вачаре ат̣т̣хамам̣ пат̣исандхим̣. наваме котӯхаламан̇галена̄ти дит̣т̣хасутамутаман̇галена. дасаме сайам̣катантиа̄дӣни аттадит̣т̣хивасена вутта̄ни. адхиччасамуппаннанти ахетуниббаттам̣. сесам̣ саббаттха утта̄намева̄ти.

сӣтивагго навамо.