6. маха̄супинасуттаван̣н̣ана̄

196. чхат̣т̣хе маха̄супина̄ти махантехи пурисехи пасситаббато маханта̄нан̃ча аттха̄нам̣ нимиттабха̄вато маха̄супина̄. па̄турахесунти па̄кат̣а̄ ахесум̣. таттха супинам̣ пассанто чатӯхи ка̄ран̣ехи пассати дха̄туккхобхато ва̄ анубхӯтапуббато ва̄ деватопасам̣ха̄рато ва̄ пуббанимиттато ва̄ти.

таттха питта̄дӣнам̣ кхобхакаран̣апаччайаппайогена кхубхитадха̄туко дха̄туккхобхато супинам̣ пассати. пассанто ча на̄на̄видхам̣ супинам̣ пассати паббата̄ патанто вийа, а̄ка̄сена гаччханто вийа, ва̄л̣амигахаттхичора̄дӣхи анубаддхо вийа ча. анубхӯтапуббато пассанто пуббе анубхӯтапуббам̣ а̄рамман̣ам̣ пассати. деватопасам̣ха̄рато пассантасса девата̄ аттхака̄мата̄йа ва̄ анаттхака̄мата̄йа ва̄ аттха̄йа ва̄ анаттха̄йа ва̄ на̄на̄видха̄ни а̄рамман̣а̄ни упасам̣харанти. со та̄сам̣ девата̄нам̣ а̄нубха̄вена та̄ни а̄рамман̣а̄ни пассати. пуббанимиттато пассанто пун̃н̃а̄пун̃н̃авасена уппаджджитука̄масса аттхасса ва̄ анаттхасса ва̄ пуббанимиттабхӯтам̣ супинам̣ пассати бодхисаттама̄та̄ вийа путтапат̣ила̄бханимиттам̣, косалара̄джа̄ вийа сол̣аса супине, айамева бхагава̄ бодхисаттабхӯто име пан̃ча маха̄супине вийа ча̄ти.

таттха йам̣ дха̄туккхобхато анубхӯтапуббато ча супине пассати, на там̣ саччам̣ хоти. йам̣ деватопасам̣ха̄рато пассати, там̣ саччам̣ ва̄ хоти аликам̣ ва̄. куддха̄ хи девата̄ упа̄йена вина̄сетука̄ма̄ випарӣтампи катва̄ дассенти. йам̣ пана пуббанимиттато пассати, там̣ екантам̣ саччамева хоти. етесам̣ чатуннам̣ мӯлака̄ран̣а̄нам̣ сам̣саггабхедатопи супинабхедо хотийева.

там̣ панетам̣ чатуббидхампи супинам̣ секхапутхуджджана̄ва пассанти аппахӣнавипалла̄сатта̄, асекха̄ на пассанти пахӣнавипалла̄сатта̄. ким̣ панетам̣ пассанто сутто пассати пат̣ибуддхо, уда̄ху нева сутто на пат̣ибуддхоти? кин̃четтха йади та̄ва сутто пассати, абхидхаммавиродхо а̄паджджати. бхаван̇гачиттена хи супати, там̣ рӯпанимитта̄диа̄рамман̣ам̣ ра̄га̄дисампайуттам̣ ва̄ на хоти. супинам̣ пассантасса ча ӣдиса̄ни читта̄ни уппаджджанти. атха пат̣ибуддхо пассати, винайавиродхо а̄паджджати. йан̃хи пат̣ибуддхо пассати, там̣ саббоха̄рикачиттена пассати. саббоха̄рикачиттена ча кате вӣтиккаме ана̄патти на̄ма наттхи. супинам̣ пассантена пана катепи вӣтиккаме екантам̣ ана̄патти ева. атха нева сутто на пат̣ибуддхо пассати, на на̄ма пассати. еван̃ча сати супинасса абха̄во ча а̄паджджати? на абха̄во. касма̄? йасма̄ капимиддхапарето пассати. вуттан̃хетам̣ – ‘‘капимиддхапарето кхо, маха̄ра̄джа, супинам̣ пассатӣ’’ти.

капимиддхапаретоти маккат̣анидда̄йа йутто. йатха̄ хи маккат̣асса нидда̄ лахупариватта̄ хоти, евам̣ йа̄ нидда̄ пунаппунам̣ кусала̄дичиттавокин̣н̣атта̄ лахупариватта̄, йасса̄ паваттийам̣ пунаппунам̣ бхаван̇гато уттаран̣ам̣ хоти, та̄йа йутто супинам̣ пассати. тена̄йам̣ супино кусалопи хоти акусалопи абйа̄катопи. таттха супинанте четийаванданадхаммассаванадхаммадесана̄дӣни каронтасса кусало, па̄н̣а̄типа̄та̄дӣни каронтасса акусало, двӣхи антехи мутто а̄ваджджанатада̄рамман̣аккхан̣е абйа̄катоти ведитаббо. сва̄йам̣ дуббалаваттхукатта̄ четана̄йа пат̣исандхим̣ а̄кад̣д̣хитум̣ асаматтхо. паватте пана ан̃н̃ехи кусала̄кусалехи упаттхамбхито випа̄кам̣ дети. кин̃ча̄пи випа̄кам̣ дети, атха кхо ависайе уппаннатта̄ аббоха̄рика̄ва супинантачетана̄. со панеса супино ка̄лавасенапи дива̄ та̄ва дит̣т̣хо на самети, татха̄ пат̣хамайа̄ме маджджхимайа̄ме паччхимайа̄ме ча. балавапаччӯсе пана аситапӣтакха̄йите самма̄ парин̣а̄мам̣ гате ка̄йасмим̣ оджа̄йа патит̣т̣хита̄йа арун̣е уггаччхама̄нева дит̣т̣хо супино самети. ит̣т̣ханимиттам̣ супинам̣ пассанто ит̣т̣хам̣ пат̣илабхати, анит̣т̣ханимиттам̣ пассанто анит̣т̣хам̣.

име пана пан̃ча маха̄супине нева локийамаха̄джано пассати, на маха̄ра̄джа̄но, на чаккаваттира̄джа̄но, на аггаса̄вака̄, на паччекабуддха̄, на самма̄самбуддха̄, еко саббан̃н̃убодхисаттойева пассати. амха̄кам̣ пана бодхисатто када̄ име супине пассӣти? ‘‘све буддхо бхависса̄мӣ’’ти ча̄туддасийам̣ паккхасса раттивибха̄йанака̄ле пасси. терасийантипи вадантийева. со име супине дисва̄ ут̣т̣ха̄йа паллан̇кам̣ а̄бхун̃джитва̄ нисинно чинтеси – ‘‘саче майа̄ капилаваттхунагаре име супина̄ дит̣т̣ха̄ ассу, питу маха̄ра̄джасса катхеййам̣. саче пана ме ма̄та̄ джӣвеййа, тасса̄ катхеййам̣. имасмим̣ кхо пана т̣ха̄не имесам̣ пат̣игга̄хако на̄ма наттхи, ахамева пат̣иган̣хисса̄мӣ’’ти. тато ‘‘идам̣ имасса пуббанимиттам̣ идам̣ имасса̄’’ти сайамева супине пат̣игган̣хитва̄ урувелага̄ме суджа̄та̄йа диннам̣ па̄йа̄сам̣ парибхун̃джитва̄ бодхиман̣д̣ам̣ а̄руйха бодхим̣ патва̄ ануккамена джетаване вихаранто аттано макулабуддхака̄ле дит̣т̣хе пан̃ча маха̄супине виттха̄ретум̣ бхиккхӯ а̄мантетва̄ имам̣ десанам̣ а̄рабхи.

таттха маха̄патхавӣти чаккава̄л̣агаббхам̣ пӯретва̄ т̣хита̄ маха̄патхавӣ. маха̄сайанам̣ ахосӣти сирисайанам̣ ахоси. охитоти т̣хапито. со пана на удакасмим̣йева т̣хапито ахоси, атха кхо па̄чӣнасамуддасса упарӯпарибха̄гена гантва̄ па̄чӣначаккава̄л̣аматтхаке т̣хапито ахосӣти ведитаббо. паччхиме самудде даккхин̣е самуддети етесупи есева найо. тирийа̄ на̄ма тин̣аджа̄тӣти даббатин̣ам̣ вуччати. на̄бхийа̄ уггантва̄ набхам̣ а̄хачча т̣хита̄ ахосӣти нан̇галаматтена раттадан̣д̣ена на̄бхито уггантва̄ пассантасса пассантассева видаттхиматтам̣ ратанаматтам̣ бйа̄маматтам̣ йат̣т̣химаттам̣ га̄вутаматтам̣ ад̣д̣хайоджанаматтам̣ йоджанаматтанти евам̣ уггантва̄ уггантва̄ анекайоджанасахассам̣ набхам̣ а̄хачча т̣хита̄ ахоси. па̄дехи уссаккитва̄ти агганакхато пат̣т̣ха̄йа па̄дехи абхирухитва̄. на̄на̄ван̣н̣а̄ти еко нӣлаван̣н̣о, еко пӣтаван̣н̣о, еко лохитаван̣н̣о, еко пан̣д̣упала̄саван̣н̣оти евам̣ на̄на̄ван̣н̣а̄. сета̄ти пан̣д̣ара̄ парисуддха̄. махато мӣл̣хапаббатасса̄ти тийоджануббедхасса гӯтхапаббатасса. упарӯпари чан̇каматӣти маттхакаматтхаке чан̇камати. дӣгха̄йукабуддха̄ пана тийоджанике мӣл̣хапаббате анупависитва̄ нисинна̄ вийа хонти.

евам̣ еттакена т̣ха̄нена пуббанимитта̄ни дассетва̄ ида̄ни саха пуббанимиттехи пат̣ила̄бхам̣ дассетум̣ йампи, бхиккхаветиа̄дима̄ха. таттха саббагун̣ада̄йакатта̄ буддха̄нам̣ арахаттамагго ануттара̄ самма̄самбодхи на̄ма. тасма̄ йам̣ со чаккава̄л̣амаха̄патхавим̣ сирисайанабхӯтам̣ аддаса, там̣ буддхабха̄васса пуббанимиттам̣. йам̣ химавантапаббатара̄джа̄нам̣ бимбоханам̣ аддаса, там̣ саббан̃н̃утан̃н̃а̄н̣абимбоханасса пуббанимиттам̣. йам̣ чатта̄ро хаттхапа̄де чаккава̄л̣аматтхаке т̣хите аддаса, там̣ дхаммачаккасса аппат̣иваттийабха̄ве пуббанимиттам̣. йам̣ атта̄нам̣ утта̄накам̣ нипаннам̣ аддаса, там̣ тӣсу бхавесу авакуджджа̄нам̣ сатта̄нам̣ утта̄намукхабха̄васса пуббанимиттам̣. йам̣ аккхӣни уммӣлетва̄ пассанто вийа ахоси, там̣ диббачаккхупат̣ила̄бхасса пуббанимиттам̣. йам̣ йа̄ва бхавагга̄ ека̄локам̣ ахоси, там̣ ана̄варан̣ан̃а̄н̣асса пуббанимиттам̣. сесам̣ па̄л̣ивасенева ведитаббанти.