(9) 4. тхеравагго

1. раджанӣйасуттаван̣н̣ана̄

81. чатуттхасса пат̣хаме раджанӣйесӯти ра̄гасса паччайесу а̄рамман̣есу. сесесупи есева найо.

2. вӣтара̄гасуттаван̣н̣ана̄

82. дутийе маккхӣти гун̣амаккхако. пал̣а̄сӣти йугагга̄халаккхан̣ена пал̣а̄сена саманна̄гато.

3. кухакасуттаван̣н̣ана̄

83. татийе кухакоти тӣхи куханаваттхӯхи саманна̄гато. лапакоти ла̄бхасанниссита̄йа лапана̄йа саманна̄гато. немиттикоти нимиттакирийака̄рако. ниппесикоти ниппесанаката̄йа саманна̄гато. ла̄бхена ча ла̄бхам̣ ниджигӣсита̄ти ла̄бхена ла̄бхагавесако. суккапаккхо вуттавипалла̄савасена ведитаббо. чатуттхам̣ утта̄намева.

5. аккхамасуттаван̣н̣ана̄

85. пан̃чаме аккхамо хоти рӯпа̄нанти рӯпа̄рамман̣а̄нам̣ анадхива̄сако хоти, тада̄рамман̣ехи ра̄га̄дӣхи абхибхуййати. есева найо саббаттха.

6. пат̣исамбхида̄ппаттасуттаван̣н̣ана̄

86. чхат̣т̣хе аттхапат̣исамбхида̄ппаттоти пан̃часу аттхесу пабхедагатам̣ н̃а̄н̣ам̣ патто. дхаммапат̣исамбхида̄ппаттоти чатуббидхе дхамме пабхедагатам̣ н̃а̄н̣ам̣ патто. нируттипат̣исамбхида̄ппаттоти дхамманируттӣсу пабхедагатам̣ н̃а̄н̣ам̣ патто. пат̣ибха̄напат̣исамбхида̄ппаттоти тесу тӣсу н̃а̄н̣есу пабхедагатам̣ н̃а̄н̣ам̣ патто. со пана та̄ни тӣн̣и н̃а̄н̣а̄нева джа̄на̄ти, на тесам̣ киччам̣ кароти. учча̄вача̄нӣти махантакхуддака̄ни. ким̣каран̣ӣйа̄нӣти ити каттабба̄ни.

7. сӣлавантасуттаван̣н̣ана̄

87. саттамам̣ утта̄наттхамева. сӣлам̣ панеттха кхӣн̣а̄савасӣламева, ба̄хусаччампи кхӣн̣а̄саваба̄хусаччамева, ва̄ча̄пи кхӣн̣а̄савасса калйа̄н̣ава̄ча̄ва, джха̄на̄нипи кирийаджджха̄на̄нева катхита̄нӣти ведитабба̄ни.

8. тхерасуттаван̣н̣ана̄

88. ат̣т̣хаме тхероти тхирабха̄ваппатто. раттан̃н̃ӯти паббаджитадивасато пат̣т̣ха̄йа атикканта̄нам̣ бахӯнам̣ раттӣнам̣ н̃а̄та̄. н̃а̄тоти пан̃н̃а̄то па̄кат̣о. йасассӣти йасаниссито. миччха̄дит̣т̣хикоти айа̄тха̄вадит̣т̣хико. саддхамма̄ вут̣т̣ха̄петва̄ти дасакусалакаммапатхадхаммато вут̣т̣ха̄петва̄. асаддхамме патит̣т̣ха̄петӣти акусалакаммапатхесу патит̣т̣ха̄пети.

9. пат̣хамасекхасуттаван̣н̣ана̄

89. наваме секхасса̄ти сиккхакасса сакаран̣ӣйасса. париха̄на̄йа̄ти упаригун̣ехи париха̄наттха̄йа. камма̄ра̄мата̄ти навакамме раманакабха̄во. бхасса̄ра̄мата̄ти а̄ла̄пасалла̄пе раманакабха̄во. нидда̄ра̄мата̄ти нидда̄йане раманакабха̄во. сан̇ган̣ика̄ра̄мата̄ти ган̣асан̇ган̣ика̄йа раманакабха̄во. йатха̄вимуттам̣ читтам̣ на паччавеккхатӣти йатха̄ йам̣ читтам̣ вимуттам̣, йе ча доса̄ пахӣна̄, гун̣а̄ ча пат̣иладдха̄, те паччавеккхитва̄ упаригун̣апат̣ила̄бха̄йа ва̄йа̄мам̣ на каротӣти аттхо. ити имасмим̣ сутте саттаннам̣ секха̄нам̣ упаригун̣ехи париха̄ника̄ран̣ан̃ча вуддхика̄ран̣ан̃ча катхитам̣. йан̃ча на̄ма секхасса париха̄нака̄ран̣ам̣, там̣ путхуджджанасса пат̣хамамева хотӣти.

10. дутийасекхасуттаван̣н̣ана̄

90. дасаме вийаттоти бйатто чхеко. ким̣каран̣ӣйесӯти ити каттаббесу. четосаматханти сама̄дхикаммат̣т̣ха̄нам̣. анануломикена̄ти са̄санасса анануччхавикена. атика̄лена̄ти атипа̄това. атидива̄ти дива̄ вуччати маджджханхико, там̣ атиккамитва̄. а̄бхисаллекхика̄ти ативийа килесасаллекхика̄. четовиваран̣асаппа̄йа̄ти читтавиваран̣асан̇кха̄та̄нам̣ саматхавипассана̄нам̣ саппа̄йа̄. аппиччхакатха̄ти аппиччха̄ хотха̄ти катханакатха̄. сантут̣т̣хикатха̄ти чатӯхи паччайехи сантут̣т̣ха̄ хотха̄ти катханакатха̄. павивекакатха̄ти тӣхи вивекехи вивитта̄ хотха̄ти катханакатха̄. асам̣саггакатха̄ти пан̃чавидхена сам̣саггена асам̣сат̣т̣ха̄ хотха̄ти катханакатха̄. вӣрийа̄рамбхакатха̄ти дувидхам̣ вӣрийам̣ а̄рабхатха̄ти катханакатха̄. сӣлакатха̄дӣсу сӣлам̣ а̄раббха катха̄ сӣлакатха̄. сама̄дхим̣ а̄раббха, пан̃н̃ам̣ а̄раббха, пан̃чавидхам̣ вимуттим̣ а̄раббха, екӯнавӣсатипаччавеккхан̣асан̇кха̄там̣ вимуттин̃а̄н̣адассанам̣ а̄раббха катха̄ вимуттин̃а̄н̣адассанакатха̄. на ника̄мала̄бхӣтиа̄дӣсу на иччхитиччхитала̄бхӣ, дуккхала̄бхӣ на випулала̄бхӣти аттхо. сесам̣ утта̄наттхамева̄ти.

тхеравагго чатуттхо.