3. падха̄нийан̇гасуттаван̣н̣ана̄

53. татийе падха̄нийан̇га̄нӣти падха̄нам̣ вуччати падаханабха̄во, падха̄намасса аттхӣти падха̄нийо, падха̄нийасса бхиккхуно ан̇га̄нӣти падха̄нийан̇га̄ни. саддхоти саддха̄йа саманна̄гато. саддха̄ панеса̄ а̄гамасаддха̄ адхигамасаддха̄ окаппанасаддха̄ паса̄дасаддха̄ти чатуббидха̄. таттха саббан̃н̃убодхисатта̄нам̣ саддха̄, абхинӣха̄рато пат̣т̣ха̄йа а̄гататта̄ а̄гамасаддха̄ на̄ма. арийаса̄вака̄нам̣ пат̣иведхена адхигататта̄ адхигамасаддха̄ на̄ма. буддхо дхаммо сан̇гхоти вутте ачалабха̄вена окаппанам̣ окаппанасаддха̄ на̄ма. паса̄дуппатти паса̄дасаддха̄ на̄ма. идха окаппанасаддха̄ адхиппета̄. бодхинти чатумагган̃а̄н̣ам̣. там̣ суппат̣ивиддхам̣ татха̄гатена̄ти саддахати. десана̄сӣсамева четам̣, имина̄ пана ан̇гена тӣсупи ратанесу саддха̄ адхиппета̄. йасса хи буддха̄дӣсу паса̄до балава̄, тасса падха̄навӣрийам̣ иджджхати.

аппа̄ба̄дхоти арого. аппа̄тан̇коти ниддуккхо. самавепа̄кинийа̄ти самавипа̄кинийа̄. гахан̣ийа̄ти каммаджатеджодха̄туйа̄. на̄тисӣта̄йа на̄ччун̣ха̄йа̄ти атисӣталаггахан̣ико хи сӣтабхӣруко хоти, аччун̣хаггахан̣ико ун̣хабхӣруко, тесам̣ падха̄нам̣ на иджджхати, маджджхимаггахан̣икасса иджджхати. тена̄ха – маджджхима̄йа падха̄наккхама̄йа̄ти. йатха̄бхӯтам̣ атта̄нам̣ а̄викатта̄ти йатха̄бхӯтам̣ аттано агун̣ам̣ пака̄сета̄. удайаттхага̄минийа̄ти удайан̃ча аттхан̃ча гантум̣ париччхиндитум̣ саматтха̄йа. етена пан̃н̃а̄салаккхан̣апаригга̄хакам̣ удайаббайан̃а̄н̣ам̣ вуттам̣. арийа̄йа̄ти парисуддха̄йа. ниббедхика̄йа̄ти аниббиддхапуббе лобхаккхандха̄дайо ниббиджджхитум̣ саматтха̄йа. самма̄ дуккхаккхайага̄минийа̄ти тадан̇гавасена килеса̄нам̣ пахӣнатта̄ йам̣ дуккхам̣ кхӣйати, тасса дуккхасса кхайага̄минийа̄. ити саббехипи имехи падехи випассана̄пан̃н̃а̄ва катхита̄. дуппан̃н̃асса хи падха̄нам̣ на иджджхати.