9. путтасуттаван̣н̣ана̄

39. наваме бхато ва̄ но бхариссатӣти амхехи тхан̃н̃апа̄йанахаттхапа̄давад̣д̣хана̄дӣхи бхато пат̣иджаггито амхе махаллакака̄ле хаттхапа̄дадхована-нха̄панайа̄губхаттада̄на̄дӣхи бхариссати. киччам̣ ва̄ но кариссатӣти аттано каммам̣ т̣хапетва̄ амха̄кам̣ ра̄джакула̄дӣсу уппаннам̣ киччам̣ гантва̄ кариссати. кулавам̣со чирам̣ т̣хассатӣти амха̄кам̣ сантакам̣ кхеттаваттхухиран̃н̃асуван̣н̣а̄дим̣ авина̄сетва̄ раккханте путте кулавам̣со чирам̣ т̣хассати, амхехи ва̄ паваттита̄ни сала̄кабхатта̄дӣни анупаччхиндитва̄ паваттессати, евампи но кулавам̣со чирам̣ т̣хассати. да̄йаджджам̣ пат̣ипаджджиссатӣти кулавам̣са̄нурӯпа̄йа пат̣ипаттийа̄ атта̄нам̣ да̄йаджджа̄рахам̣ каронто амха̄кам̣ сантакам̣ да̄йаджджам̣ пат̣ипаджджиссати. даккхин̣ам̣ ануппадассатӣти паттида̄нам̣ катва̄ татийадивасато пат̣т̣ха̄йа да̄нам̣ ануппадассати.

санто саппуриса̄ти имасмим̣ т̣ха̄не ма̄та̄питӯсу самма̄ пат̣ипаттийа̄ санто саппуриса̄ти ведитабба̄. пуббе катамануссаранти ма̄та̄питӯхи пат̣хаматарам̣ катагун̣ам̣ ануссаранта̄. ова̄дака̄рӣти ма̄та̄питӯхи диннасса ова̄дасса катта̄. бхатапосӣти йехи бхато, тесам̣ посако. пасам̣сийоти дит̣т̣хева дхамме маха̄джанена пасам̣ситаббо хоти.