4. сӣхасена̄патисуттаван̣н̣ана̄

34. чатуттхе сандит̣т̣хиканти са̄мам̣ пасситаббакам̣. да̄йакоти да̄насӯро. на со саддха̄маттакенева тит̣т̣хати, париччаджитумпи саккотӣти аттхо. да̄напатӣти йам̣ да̄нам̣ дети, тасса пати хутва̄ дети, на да̄со, на саха̄йо. йо хи аттана̄ мадхурам̣ бхун̃джати, паресам̣ амадхурам̣ дети, со да̄насан̇кха̄тасса деййадхаммасса да̄со хутва̄ дети. йо йам̣ аттана̄ бхун̃джати, тадева дети, со саха̄йо хутва̄ дети. йо пана аттана̄ йена кеначи йа̄пети, паресам̣ мадхурам̣ дети, со пати джет̣т̣хако са̄мӣ хутва̄ дети. та̄дисам̣ сандха̄йа вуттам̣ – ‘‘да̄напатӣ’’ти.

аман̇кубхӯтоти на ниттеджабхӯто. виса̄радоти н̃а̄н̣асоманассаппатто. сахабйатам̣ гата̄ти сахабха̄вам̣ екӣбха̄вам̣ гата̄. ката̄вака̄са̄ти йена каммена таттха авака̄со хоти, тасса кататта̄ ката̄вака̄са̄. там̣ пана йасма̄ кусаламева хоти, тасма̄ катакусала̄ти вуттам̣. модарети моданти памоданти. аситасса̄ти анисситасса татха̄гатасса. та̄диноти та̄дилаккхан̣ам̣ паттасса.