2. а̄паттибхайасуттаван̣н̣ана̄

244. дутийе кхурамун̣д̣ам̣ каритва̄ти пан̃ча сикхан̣д̣аке т̣хапетва̄ кхурена мун̣д̣ам̣ каритва̄. кхарассарена̄ти каккхал̣асаддена. пан̣авена̄ти ваджджхабхерийа̄. тхалат̣т̣хасса̄ти екаманте т̣хитасса. сӣсаччхеджджанти сӣсаччхеда̄рахам̣. йатра хи на̄ма̄ти йам̣ на̄ма. со ватасса̄ханти со вата ахам̣ ассам̣, йам̣ еварӯпам̣ па̄пам̣ на кареййанти аттхо. йатха̄дхаммам̣ пат̣икариссатӣти дхамма̄нурӯпам̣ пат̣икариссати, са̄ман̣ерабхӯмийам̣ т̣хассатӣти аттхо. ка̄л̣аваттхам̣ паридха̄йа̄ти ка̄л̣апилотикам̣ нива̄сетва̄. мосалланти мусала̄бхипа̄та̄рахам̣. йатха̄дхамманти идха а̄паттито вут̣т̣ха̄йа суддханте патит̣т̣хаханто йатха̄дхаммам̣ кароти на̄ма. бхасмапут̣анти чха̄рика̄бхан̣д̣икам̣. га̄райхам̣ бхасмапут̣анти гарахитаббачха̄рика̄пут̣ена маттхаке абхигха̄та̄рахам̣. йатха̄дхамманти идха а̄паттим̣ десенто йатха̄дхаммам̣ пат̣икароти на̄ма. упаваджджанти упава̄да̄рахам̣. па̄т̣идесанӣйесӯти пат̣идесетаббесу. имина̄ сабба̄пи сеса̄паттийо сан̇гахита̄. има̄ни кхо, бхиккхаве, чатта̄ри а̄паттибхайа̄нӣти, бхиккхаве, има̄ни чатта̄ри а̄паттим̣ нисса̄йа уппаджджанакабхайа̄ни на̄ма̄ти.