4. а̄нен̃джасуттаван̣н̣ана̄

117. чатуттхе тадасса̄детӣти там̣ джха̄нам̣ асса̄дети. там̣ ника̄метӣти тадева паттхети. тена ча виттим̣ а̄паджджатӣти тена джха̄нена тут̣т̣хим̣ а̄паджджати. татра т̣хитоти тасмим̣ джха̄не т̣хито. тададхимуттоти таттхева адхимутто. таббахулавиха̄рӣти тена бахулам̣ вихаранто. сахабйатам̣ упападжджатӣти сахабха̄вам̣ упападжджати, тасмим̣ девалоке ниббаттатӣти аттхо. нирайампи гаччхатӣтиа̄ди нирайа̄дӣхи авиппамуттатта̄ апарапарийа̄йавасена таттха гаманам̣ сандха̄йа вуттам̣. на хи тасса упача̄раджджха̄нато балаватарам̣ акусалам̣ аттхи, йена анантарам̣ апа̄йе ниббаттеййа. бхагавато пана са̄вакоти сота̄паннасакада̄га̄миана̄га̄мӣнам̣ ан̃н̃атаро. тасмим̣йева бхавети таттхева арӯпабхаве. паринибба̄йатӣти аппаччайапаринибба̄нена паринибба̄йати. адхиппайа̄соти адхикаппайого. сесаметтха вуттанайенева ведитаббам̣. имасмим̣ пана сутте путхуджджанасса упапаттиджджха̄нам̣ катхитам̣, арийаса̄вакасса тадева упапаттиджджха̄нан̃ча випассана̄па̄дакаджджха̄нан̃ча катхитам̣.