5-7. пат̣хамаа̄джа̄нӣйасутта̄диван̣н̣ана̄

97-99. пан̃чаме ан̇гехӣти гун̣ан̇гехи. ра̄джа̄рахоти ран̃н̃о арахо ануччхавико. ра̄джабхогготи ран̃н̃о упабхогабхӯто. ран̃н̃о ан̇ганти ран̃н̃о хаттхапа̄да̄диан̇гасамата̄йа ан̇гантева сан̇кхам̣ гаччхати. ван̣н̣асампанноти сарӣраван̣н̣ена сампанно. баласампанноти ка̄йабалена сампанно. а̄хунеййоти а̄хутисан̇кха̄там̣ пин̣д̣апа̄там̣ пат̣иггахетум̣ йутто. па̄хунеййоти па̄хунакабхаттасса ануччхавико. даккхин̣еййоти дасавидхада̄наваттхупаричча̄гавасена саддха̄да̄насан̇кха̄та̄йа даккхин̣а̄йа ануччхавико. ан̃джаликаран̣ӣйоти ан̃джалипаггахан̣асса ануччхавико. ануттарам̣ пун̃н̃аккхеттам̣ локасса̄ти саббалокасса асадисам̣ пун̃н̃авируханат̣т̣ха̄нам̣.

ван̣н̣асампанноти гун̣аван̣н̣ена сампанно. баласампанноти вӣрийабалена сампанно. джавасампанноти н̃а̄н̣аджавена сампанно. тха̄мава̄ти н̃а̄н̣атха̄мена саманна̄гато. дал̣хапараккамоти тхирапараккамо. аниккхиттадхуроти ат̣т̣хапитадхуро паггахитадхуро, аггапхалам̣ арахаттам̣ аппатва̄ вӣрийадхурам̣ на никкхиписса̄мӣти евам̣ пат̣ипанно. имасмим̣ сутте чатусаччавасена сота̄паттимагго, сота̄паттимаггена ча н̃а̄н̣аджавасампанната̄ катхита̄ти. чхат̣т̣хе тӣн̣и ча магга̄ни тӣн̣и ча пхала̄ни, тӣхи маггапхалехи ча н̃а̄н̣аджавасампанната̄ катхита̄. саттаме арахаттапхалам̣, арахаттапхаленева ча маггакиччам̣ катхитам̣. пхалам̣ пана джавитаджавена уппаджджанато джавоти ча ваттум̣ ват̣т̣ати.