3. ан̃н̃атарабра̄хман̣асуттаван̣н̣ана̄

54. татийе саммоданӣйанти саммодаджананим̣. са̄ран̣ӣйанти саритаббайуттакам̣. вӣтиса̄ретва̄ти парийоса̄петва̄. китта̄вата̄ти киттакена. сандит̣т̣хико дхаммо хотӣти са̄мам̣ пасситаббо хоти. ака̄ликоти на ка̄лантаре пхалада̄йако. ехипассикоти ‘‘ехи пасса̄’’ти евам̣ дассетум̣ сакка̄ти а̄гаманӣйапат̣ипадам̣ пуччхати. опанеййикоти аттано читтам̣ упанетаббо. паччаттам̣ ведитабботи са̄мам̣йева джа̄нитаббо. вин̃н̃ӯхӣти пан̣д̣итехи. парийа̄динначиттоти а̄диннагахитапара̄мат̣т̣хачитто хутва̄. чететӣти чинтети. сесаметтха утта̄намева. имасмим̣ пана сутте бра̄хман̣ена локуттарамагго пуччхито, саттха̄ра̄пи сойева катхито. со хи са̄мам̣ пасситаббатта̄ сандит̣т̣хико на̄ма̄ти.