6. сам̣йоджанасуттаван̣н̣ана̄

6. чхат̣т̣хе сам̣йоджанийесу дхаммесӯти дасаннам̣ сам̣йоджана̄нам̣ паччайабхӯтесу тебхӯмакадхаммесу. асса̄да̄нупассита̄ти асса̄дато пассита̄ пассанабха̄воти аттхо. ниббида̄нупассита̄ти ниббида̄васена уккан̣т̣ханавасена пассанабха̄во. джа̄тийа̄ти кхандханиббаттито. джара̄йа̄ти кхандхапарипа̄като. маран̣ена̄ти кхандхабхедато. сокехӣти антониджджха̄йаналаккхан̣ехи сокехи. паридевехӣти таннисситала̄лаппиталаккхан̣ехи паридевехи. дуккхехӣти ка̄йапат̣ипӣл̣анадуккхехи. доманассехӣти мановигха̄тадоманассехи. упа̄йа̄сехӣти адхиматта̄йа̄салаккхан̣аупа̄йа̄сехи. дуккхасма̄ти сакалават̣т̣адуккхато. паджахатӣти маггена паджахати. паха̄йа̄ти еттха пана пхалаккхан̣о катхито. имасмим̣ сутте ват̣т̣авиват̣т̣ам̣ катхитам̣. чхат̣т̣хам̣.