11. джа̄н̣уссон̣исуттаван̣н̣ана̄

177. ека̄дасаме упакаппатӯти па̄пун̣а̄ту. т̣ха̄нети ока̄се. но ат̣т̣ха̄нети но анока̄се. нерайика̄нам̣ а̄ха̄ро на̄ма таттха ниббаттанакаммамева. тенева хи те таттха йа̄пенти. тираччха̄найоника̄нам̣ пана тин̣апан̣н̣а̄дивасена а̄ха̄ро ведитаббо. манусса̄нам̣ оданакумма̄са̄дивасена, дева̄нам̣ судха̄бходжана̄дивасена, петтивесайика̄нам̣ кхел̣асин̇гха̄н̣ика̄дивасена. йам̣ ва̄ панасса ито ануппавеччхантӣти йам̣ тасса митта̄дайо ито даданта̄ анупавесенти. петтивесайика̄ ева хи парадаттӯпаджӣвино хонти, на ан̃н̃есам̣ парехи диннам̣ упакаппати. да̄йакопи аниппхалоти йам̣ сандха̄йа там̣ да̄нам̣ диннам̣, тасса упакаппату ва̄ ма̄ ва̄, да̄йакена пана на сакка̄ ниппхалена бхавитум̣, да̄йако тасса да̄насса випа̄кам̣ лабхатийева.

ат̣т̣ха̄непи бхавам̣ готамо парикаппам̣ вадатӣти анока̄се уппаннепи тасмим̣ н̃а̄таке бхавам̣ готамо да̄насса пхалам̣ парикаппетийева пан̃н̃а̄петийева̄ти пуччхати. бра̄хман̣асса хи ‘‘евам̣ диннасса да̄насса пхалам̣ да̄йако на лабхатӣ’’ти ладдхи. атхасса бхагава̄ пан̃хам̣ пат̣иджа̄нитва̄ ‘‘да̄йако на̄ма йаттха каттхачи пун̃н̃апхалӯпаджӣвит̣т̣ха̄не ниббатто да̄насса пхалам̣ лабхатийева̄’’ти дассетум̣ идха бра̄хман̣а̄тиа̄дима̄ха. со таттха ла̄бхӣ хотӣти со таттха хаттхийонийам̣ ниббаттопи ман̇галахаттхит̣т̣ха̄нам̣ патва̄ ла̄бхӣ хоти. асса̄дӣсупи есева найо. са̄дхувагго утта̄наттхойева̄ти.

джа̄н̣уссон̣ивагго дутийо.

чатуттхапан̣н̣а̄сакам̣ нит̣т̣хитам̣.

(21) 1. караджака̄йавагго

211. пан̃чамасса пат̣хама̄дӣни утта̄наттха̄нева.