9. упа̄лисуттаван̣н̣ана̄
99. наваме дурабхисамбхава̄нӣти самбхавитум̣ дуккха̄ни дуссаха̄ни, на сакка̄ аппесаккхехи аджджхога̄хитунти вуттам̣ хоти. аран̃н̃аванапаттха̄нӣти аран̃н̃а̄ни ча ванапаттха̄ни ча. а̄ран̃н̃акан̇ганиппха̄данена аран̃н̃а̄ни, га̄мантам̣ атиккамитва̄ манусса̄нам̣ анупача̄рат̣т̣ха̄набха̄вена ванапаттха̄ни. панта̄нӣти парийанта̄ни атидӯра̄ни. дуккарам̣ павивеканти ка̄йавивеко дуккаро. дурабхираманти абхирамитум̣ на сукарам̣. екаттети екӣбха̄ве. ким̣ дассети? ка̄йавивеке катепи таттха читтам̣ абхирама̄петум̣ дуккарам̣. двайам̣двайа̄ра̄мо хи айам̣ локоти. харанти ман̃н̃ети харанти вийа гхасанти вийа. маноти читтам̣. сама̄дхим̣ алабхама̄насса̄ти упача̄расама̄дхим̣ ва̄ аппана̄сама̄дхим̣ ва̄ алабхантасса. ким̣ дассети? ӣдисасса бхиккхуно тин̣апан̣н̣амига̄дисаддехи вивидхехи ча бхӣсанакехи вана̄ни читтам̣ виккхипанти ман̃н̃ети. сам̣сӣдиссатӣти ка̄мавитаккена сам̣сӣдиссати. уплависсатӣти бйа̄па̄давихим̣са̄витаккехи уддхам̣ плависсати.
кан̣н̣асам̣дховиканти кан̣н̣е дховантена кӣл̣итаббам̣. пит̣т̣хисам̣дховиканти пит̣т̣хим̣ дховантена кӣл̣итаббам̣. таттха удакам̣ сон̣д̣а̄йа гахетва̄ двӣсу кан̣н̣есу а̄син̃чанам̣ кан̣н̣асам̣дховика̄ на̄ма, пит̣т̣хийам̣ а̄син̃чанам̣ пит̣т̣хисам̣дховика̄ на̄ма. га̄дхам̣ виндатӣти патит̣т̣хам̣ лабхати. ко ча̄хам̣ ко ча хаттхина̄готи ахам̣ ко, хаттхина̄го ко, ахампи тираччха̄нагато, айампи, майхампи чатта̄ро па̄да̄, имассапи, нану убхопи майам̣ самасама̄ти.
ван̇каканти кума̄рака̄нам̣ кӣл̣анакам̣ кхуддаканан̇галам̣. гхат̣иканти дӣгхадан̣д̣акена рассадан̣д̣акам̣ пахаран̣акӣл̣ам̣. моккхачиканти сам̣париваттакакӣл̣ам̣, а̄ка̄се дан̣д̣акам̣ гахетва̄ бхӯмийам̣ ва̄ сӣсам̣ т̣хапетва̄ хет̣т̣хупарийабха̄вена париваттанакӣл̣анти вуттам̣ хоти. чин̇гулаканти та̄лапан̣н̣а̄дӣхи катам̣ ва̄таппаха̄рена париббхаманачаккам̣. патта̄л̣хакам̣ вуччати пан̣н̣ана̄л̣и, та̄йа ва̄лука̄дӣни минанта̄ кӣл̣анти. ратхаканти кхуддакаратхам̣. дхануканти кхуддакадханумева.
идха кхо пана воти еттха воти нипа̄таматтам̣, идха кхо пана̄ти аттхо. ин̇гха твам̣, упа̄ли, сан̇гхе вихара̄хӣти еттха ин̇гха̄ти чоданаттхе нипа̄то. тена тхерам̣ сан̇гхамаджджхе виха̄раттха̄йа чодети, на̄сса аран̃н̃ава̄сам̣ ануджа̄на̄ти. касма̄? аран̃н̃асена̄сане васато кирасса ва̄садхурамева пӯриссати, на гантхадхурам̣. сан̇гхамаджджхе васанто пана две дхура̄ни пӯретва̄ арахаттам̣ па̄пун̣иссати, винайапит̣аке ча па̄моккхо бхависсати. атхасса̄хам̣ парисамаджджхе пуббапаттханам̣ пубба̄бхинӣха̄ран̃ча катхетва̄ имам̣ бхиккхум̣ винайадхара̄нам̣ аггат̣т̣ха̄не т̣хапесса̄мӣти имаматтхам̣ пассама̄но саттха̄ тхерасса аран̃н̃ава̄сам̣ на̄нуджа̄нӣти. дасамам̣ утта̄наттхамева̄ти.
упа̄ливагго пан̃чамо.
дутийапан̣н̣а̄сакам̣ нит̣т̣хитам̣.