5. уттийасуттаван̣н̣ана̄

95. пан̃чаме тун̣хӣ ахосӣти саттӯпаладдхийам̣ т̣хатва̄ апуччхам̣ пуччхатӣти тун̣хӣ ахоси. саббаса̄муккам̣сикам̣ вата мети майа̄ саббапуччха̄нам̣ уттамапуччхам̣ пуччхито саман̣о готамо сам̣са̄дети но виссаджджети, нӯна на висахати на саккоти виссаджджетунти евам̣ па̄пикам̣ дит̣т̣хим̣ ма̄ пат̣илабхӣти. тадасса̄ти там̣ евам̣ уппаннам̣ дит̣т̣хигатам̣ бхавеййа. паччантиманти йасма̄ маджджхимадесе нагарасса уддха̄па̄дӣни тхира̄ни ва̄ хонту дуббала̄ни ва̄, саббасо ва̄ пана ма̄ хонту, чора̄сан̇ка̄ на хоти. тасма̄ там̣ аггахетва̄ ‘‘паччантимам̣ нагара’’нти а̄ха. дал̣худдха̄панти тхирапа̄ка̄рапа̄дам̣. дал̣хапа̄ка̄раторан̣анти тхирапа̄ка̄ран̃чева тхирапит̣т̣хисан̇гха̄т̣ан̃ча. екадва̄ранти касма̄ а̄ха? бахудва̄расмин̃хи нагаре бахӯхи пан̣д̣итадова̄рикехи бхавитаббам̣, екадва̄ре екова ват̣т̣ати. татха̄гатасса ча пан̃н̃а̄йа ан̃н̃о садисо наттхи. тасма̄ саттху пан̣д̣итабха̄васса опамматтхам̣ екам̣йева дова̄рикам̣ дассетум̣ ‘‘екадва̄ра’’нти а̄ха. пан̣д̣итоти пан̣д̣иччена саманна̄гато. бйаттоти веййаттийена саманна̄гато. медха̄вӣти т̣ха̄нуппаттийапан̃н̃а̄сан̇кха̄та̄йа медха̄йа саманна̄гато. анупарийа̄йапатханти анупарийа̄йана̄макам̣ маггам̣. па̄ка̄расандхинти двиннам̣ ит̣т̣хака̄нам̣ апагатат̣т̣ха̄нам̣. па̄ка̄равиваранти па̄ка̄расса чхиннат̣т̣ха̄нам̣. тадеветам̣ пан̃ханти там̣йева ‘‘сассато локо’’тиа̄дина̄ найена пут̣т̣хам̣ т̣хапанӣйапан̃хам̣ пунапи пуччхи. саббо ча тена локоти саттӯпаладдхийам̣йева т̣хатва̄ ан̃н̃ена̄ка̄рена пуччхатӣти дассети.