9. кока̄ликасуттаван̣н̣ана̄
89. наваме кока̄лико бхиккху йена бхагава̄ тенупасан̇камӣти койам̣ кока̄лико, касма̄ ча упасан̇ками? айам̣ кира кока̄ликарат̣т̣хе кока̄ликанагаре кока̄ликасет̣т̣хисса путто паббаджитва̄ питара̄ ка̄рите виха̄ре васати чӯл̣акока̄ликоти на̄мена, на пана девадаттасса сиссо. со хи бра̄хман̣апутто маха̄кока̄лико на̄ма. бхагавати пана са̄ваттхийам̣ вихаранте две аггаса̄вака̄ пан̃чаматтехи бхиккхусатехи саддхим̣ джанападача̄рикам̣ чарама̄на̄ упакат̣т̣ха̄йа вассӯпана̄йика̄йа вивекава̄сам̣ васитука̄ма̄ те бхиккхӯ уййоджетва̄ аттано паттачӣварама̄да̄йа тасмим̣ джанападе там̣ нагарам̣ патва̄ виха̄рам̣ агамим̣су. таттха несам̣ кока̄лико ваттам̣ ака̄си. тепи тена саддхим̣ саммодитва̄, ‘‘а̄вусо, майам̣ идха тема̄сам̣ васисса̄ма, ма̄ но кассачи а̄рочесӣ’’ти пат̣ин̃н̃ам̣ гахетва̄ васим̣су. васитва̄ пава̄ран̣а̄дивасе пава̄ретва̄ ‘‘гаччха̄ма майам̣, а̄вусо’’ти кока̄ликам̣ а̄пуччхим̣су. кока̄лико ‘‘аджджа, а̄вусо, екадивасам̣ васитва̄ све гамиссатха̄’’ти ватва̄ дутийадивасе нагарам̣ пависитва̄ мануссе а̄мантеси – ‘‘а̄вусо, тумхе две аггаса̄ваке идха а̄гантва̄ васама̄непи на джа̄на̄тха, на те кочи паччайенапи нимантетӣ’’ти. нагарава̄сино ‘‘кахам̣, бханте, тхера̄, касма̄ но на̄рочайиттха̄’’ти? ким̣, а̄вусо, а̄рочитена, ким̣ на пассатха две бхиккхӯ тхера̄сане нисӣданте, ете аггаса̄вака̄ти. те кхиппам̣ саннипатитва̄ саппипха̄н̣ита̄дӣни чева чӣварадусса̄ни ча сам̣харим̣су.
кока̄лико чинтеси – ‘‘парамаппиччха̄ аггаса̄вака̄ пайуттава̄ча̄йа уппаннала̄бхам̣ на са̄дийиссанти, аса̄дийанта̄ ‘а̄ва̄сикасса детха̄’ти ваккхантӣ’’ти там̣ ла̄бхам̣ га̄ха̄петва̄ тхера̄нам̣ сантикам̣ агама̄си. тхера̄ дисва̄ва ‘‘име паччайа̄ нева амха̄кам̣, на кока̄ликасса каппантӣ’’ти пат̣иккхипитва̄ паккамим̣су. кока̄лико ‘‘катхан̃хи на̄ма сайам̣ агган̣ханта̄ майхампи ада̄петва̄ паккамиссантӣ’’ти а̄гха̄там̣ уппа̄деси. тепи бхагавато сантикам̣ гантва̄ бхагавантам̣ вандитва̄ пуна аттано парисам̣ а̄да̄йа джанападача̄рикам̣ чаранта̄ анупуббена тасмим̣ рат̣т̣хе тамева нагарам̣ пачча̄гамим̣су. на̄гара̄ тхере сан̃джа̄нитва̄ саха париккха̄рехи да̄нам̣ саджджетва̄ нагарамаджджхе ман̣д̣апам̣ катва̄ да̄нам̣ адам̣су, тхера̄нан̃ча париккха̄ре упана̄месум̣. тхера̄ бхиккхусан̇гхасса ниййа̄дайим̣су. там̣ дисва̄ кока̄лико чинтеси – ‘‘име пуббе аппиччха̄ ахесум̣, ида̄ни па̄пиччха̄ джа̄та̄, пуббепи аппиччхасантут̣т̣хапавивиттасадиса̄ва ман̃н̃е’’ти тхере упасан̇камитва̄, ‘‘а̄вусо, тумхе пуббе аппиччха̄ вийа, ида̄ни пана па̄пабхиккхӯ джа̄таттха̄’’ти ватва̄ ‘‘мӯлат̣т̣ха̄нейева несам̣ патит̣т̣хам̣ бхиндисса̄мӣ’’ти тарама̄нарӯпо никкхамитва̄ йена бхагава̄ тенупасан̇ками. айамеса кока̄лико, имина̄ ча ка̄ран̣ена упасан̇камӣти ведитаббо.
бхагава̄ там̣ туритатуритам̣ а̄гаччхантам̣ дисва̄ва а̄вадждженто ан̃н̃а̄си ‘‘айам̣ аггаса̄ваке аккоситука̄мо а̄гато, сакка̄ ну кхо пат̣иседхету’’нти. тато ‘‘на сакка̄ пат̣иседхетум̣, тхересу апараджджхитва̄ а̄гато, екам̣сена пана падуманирайе ниббаттиссатӣ’’ти дисва̄ ‘‘са̄рипуттамоггалла̄непи на̄ма гарахантам̣ сутва̄ на ниседхетӣ’’ти ва̄дамочанаттхам̣ арийӯпава̄дасса ча маха̄са̄ваджджабха̄вадассанаттхам̣ ма̄ хеванти тиккхаттум̣ пат̣иседхеси. таттха ма̄ хеванти ма̄ евам̣ абхан̣и. саддха̄йикоти саддха̄йа а̄гамакаро паса̄да̄вахо, саддха̄таббавачано ва̄. паччайикоти паттийа̄йитаббавачано.
пакка̄мӣти камма̄нубха̄вена чодийама̄но пакка̄ми. ока̄сакатан̃хи каммам̣ на сакка̄ пат̣иба̄хитум̣. ачирапаккантасса̄ти паккантасса сато начиренева. саббо ка̄йо пхут̣о ахосӣти кесаггаматтампи ока̄сам̣ аваджджетва̄ сакаласарӣрам̣ ат̣т̣хӣни бхиндитва̄ уггата̄хи пӣл̣ака̄хи аджджхоттхат̣ам̣ ахоси. йасма̄ пана буддха̄нубха̄вена татха̄рӯпам̣ каммам̣ буддха̄нам̣ саммукхӣбха̄ве випа̄кам̣ да̄тум̣ на саккоти, дассанӯпача̄ре виджахитаматте дети, тасма̄ тасса ачирапаккантасса пӣл̣ака̄ ут̣т̣хахим̣су. кала̄йаматтийоти чан̣акаматтийо. белувасала̄т̣укаматтийоти тарун̣абелуваматтийо. пабхиджджим̣сӯти бхиджджим̣су. та̄су бхинна̄су сакаласарӣрам̣ панасапаккам̣ вийа ахоси. со паккена гаттена джетаванадва̄ракот̣т̣хаке висагилито маччхо вийа кадалипаттесу нипаджджи. атха дхаммассаванаттхам̣ а̄гата̄гата̄ манусса̄ ‘‘дхи кока̄лика, дхи кока̄лика, айуттамака̄си, аттанойева мукхам̣ нисса̄йа анайабйасанам̣ паттосӣ’’ти а̄хам̣су. тесам̣ саддам̣ сутва̄ а̄раккхадевата̄ дхикка̄рамакам̣су, а̄раккхадевата̄нам̣ а̄ка̄садевата̄ти имина̄ упа̄йена йа̄ва аканит̣т̣хабхавана̄ екадхикка̄ро удапа̄ди.
турӯти кока̄ликасса упаджджха̄йо туруттхеро на̄ма ана̄га̄мипхалам̣ ватва̄ брахмалоке ниббатто. со бхуммат̣т̣хадевата̄ а̄дим̣ катва̄ ‘‘айуттам̣ кока̄ликена катам̣ аггаса̄ваке антимаваттхуна̄ аббха̄чиккхантена̄’’ти парампара̄йа брахмалокасампаттам̣ там̣ саддам̣ сутва̄ ‘‘ма̄ майхам̣ пассантассева вара̄ко насси, овадисса̄ми нам̣ тхересу читтаппаса̄даттха̄йа̄’’ти а̄гантва̄ тасса пурато ат̣т̣ха̄си. там̣ сандха̄йетам̣ вуттам̣ – ‘‘турӯ паччекабрахма̄’’ти. песала̄ти пийасӣла̄. коси твам̣, а̄вусоти нисиннакова кабараккхӣни уммӣлетва̄ евама̄ха. пасса йа̄ван̃ча те идам̣ апараддхати йаттакам̣ тайа̄ апараддхам̣, аттано нала̄т̣е маха̄ган̣д̣ам̣ апассанто са̄сапаматта̄йа пӣл̣ака̄йа мам̣ чодетаббам̣ ман̃н̃асӣти а̄ха.
атха нам̣ ‘‘адит̣т̣хиппатто айам̣ кока̄лико, гилитависо вийа на кассачи вачанам̣ на кариссатӣ’’ти н̃атва̄ пурисасса хӣтиа̄дима̄ха. таттха кут̣ха̄рӣти кут̣ха̄рисадиса̄ пхарусава̄ча̄. чхиндатӣти кусаламӯласан̇кха̄те мӯлейева никантати. ниндийанти ниндитаббам̣ дуссӣлапуггалам̣. пасам̣сатӣти уттаматтхе самбха̄ветва̄ кхӣн̣а̄савоти вадати. там̣ ва̄ ниндати йо пасам̣сийоти йо ва̄ пасам̣ситаббо кхӣн̣а̄саво, там̣ антимаваттхуна̄ чоденто ‘‘дуссӣло айа’’нти вадати. вичина̄ти мукхена со калинти со там̣ апара̄дхам̣ мукхена вичина̄ти на̄ма. калина̄ тена̄ти тена апара̄дхена сукхам̣ на виндати. ниндийапасам̣са̄йа хи пасам̣сийанинда̄йа ча самакова випа̄ко.
саббасса̄пи саха̄пи аттана̄ти саббена сакена дханенапи аттана̄пи саддхим̣ йо аккхесу дханапара̄джайо на̄ма, айам̣ аппаматтако апара̄дхо. йо сугатесӯти йо пана саммаггатесу пуггалесу читтам̣ дӯсеййа, айам̣ читтападосова тато калито махантатаро кали.
ида̄ни тасса махантатарабха̄вам̣ дассенто сатам̣ сахасса̄нантиа̄дима̄ха. таттха сатам̣ сахасса̄нанти нираббудаган̣ана̄йа сатасахассан̃ча. чхаттим̣сатӣти апара̄ни чхаттим̣сати нираббуда̄ни. пан̃ча ча̄ти аббудаган̣ана̄йа пан̃ча аббуда̄ни. йамарийагарахӣти йам̣ арийе гараханто нирайам̣ упападжджати, таттха еттакам̣ а̄йуппама̄н̣анти аттхо.
ка̄ламака̄сӣти упаджджха̄йе пакканте ка̄лам̣ ака̄си. падуманирайанти па̄т̣ийекко падуманирайо на̄ма наттхи, авӣчимаха̄нирайасмим̣йева пана падумаган̣ана̄йа паччитаббе екасмим̣ т̣ха̄не ниббатти.
вӣсатикха̄рикоти ма̄гадхакена паттхена чатта̄ро паттха̄, косаларат̣т̣хе еко паттхо хоти. тена паттхена чатта̄ро паттха̄ а̄л̣хакам̣, чатта̄ри а̄л̣хака̄ни дон̣ам̣, чатудон̣а̄ ма̄ника̄, чатума̄ника̄ кха̄рӣ, та̄йа кха̄рийа̄ вӣсатикха̄рико. тилава̄хоти ма̄гадхака̄нам̣ сукхуматила̄нам̣ тиласакат̣ам̣. аббудо нирайоти аббудо на̄ма па̄т̣ийекко нирайо наттхи, авӣчимхийева пана аббудаган̣ана̄йа паччитаббат̣т̣ха̄нассетам̣ на̄мам̣. нираббуда̄дӣсупи есева найо.
вассаган̣ана̄пи панеттха евам̣ ведитабба̄ – йатхева хи сатам̣ сатасахасса̄ни кот̣и хоти, евам̣ сатам̣ сатасахассакот̣ийо пакот̣и на̄ма хоти, сатам̣ сатасахассапакот̣ийо кот̣ипакот̣и на̄ма, сатам̣ сатасахассакот̣ипакот̣ийо нахутам̣, сатам̣ сатасахассанахута̄ни ниннахутам̣, сатам̣ сатасахассаниннахута̄ни екам̣ аббудам̣, тато вӣсатигун̣ам̣ нираббудам̣, еса найо саббаттха̄ти. дасамам̣ хет̣т̣ха̄ вуттанайенева ведитаббам̣. сесам̣ саббаттха утта̄наттхамева̄ти.
тхеравагго чатуттхо.