5. мигаса̄ла̄суттаван̣н̣ана̄

75. пан̃чамасса а̄димхи та̄ва йам̣ ваттаббам̣, там̣ чхакканипа̄те вуттамева. дуссӣло хотӣтиа̄дӣсу пана дуссӣлоти ниссӣло. четовимуттинти пхаласама̄дхим̣. пан̃н̃а̄вимуттинти пхалан̃а̄н̣ам̣. наппаджа̄на̄тӣти уггахапарипуччха̄васена на джа̄на̄ти. дуссӣлйам̣ апарисесам̣ нируджджхатӣти еттха пан̃ча дуссӣлйа̄ни та̄ва сота̄паттимаггена пахӣйанти, даса арахаттамаггена. пхалаккхан̣е та̄ни пахӣна̄ни на̄ма хонти. пхалаккхан̣ам̣ сандха̄йа идха ‘‘нируджджхатӣ’’ти вуттам̣. путхуджджанасса сӣлам̣ пан̃чахи ка̄ран̣ехи бхиджджати па̄ра̄джика̄паджджанена сиккха̄паччаккха̄нена титтхийапаккханданена арахаттена маран̣ена̄ти. таттха пурима̄ тайо бха̄вана̄париха̄на̄йа сам̣ваттанти, чатуттхо вад̣д̣хийа̄, пан̃чамо нева ха̄на̄йа на вад̣д̣хийа̄. катхам̣ панетам̣ арахаттена сӣлам̣ бхиджджатӣти? путхуджджанасса хи сӣлам̣ аччантакусаламева хоти, арахаттамагго ча кусала̄кусалакаммаккхайа̄йа сам̣ваттатӣти евам̣ тена там̣ бхиджджати. саваненапи акатам̣ хотӣти сотаббайуттакам̣ ассутам̣ хоти. ба̄хусачченапи акатам̣ хотӣти еттха ба̄хусаччанти вӣрийам̣. вӣрийена каттаббайуттакам̣ акатам̣ хоти, тасса акататта̄ саггатопи маггатопи париха̄йати. дит̣т̣хийа̄пи аппат̣ивиддхам̣ хотӣти дит̣т̣хийа̄ пат̣ивиджджхитаббам̣ аппат̣ивиддхам̣ хоти апаччаккхакатам̣. са̄майикампи вимуттим̣ на лабхатӣти ка̄ла̄нука̄лам̣ дхаммассаванам̣ нисса̄йа пӣтипа̄моджджам̣ на лабхати. ха̄на̄йа паретӣти ха̄на̄йа паваттати.

йатха̄бхӯтам̣ паджа̄на̄тӣти ‘‘сота̄паттипхалам̣ патва̄ пан̃чавидхам̣ дуссӣлйам̣ апарисесам̣ нируджджхатӣ’’ти уггахапарипуччха̄васена джа̄на̄ти. тасса саваненапи катам̣ хотӣти сотаббайуттакам̣ сутам̣ хоти. ба̄хусачченапи катам̣ хотӣти вӣрийена каттаббайуттакам̣ антамасо дуббалавипассана̄маттакампи катам̣ хоти. дит̣т̣хийа̄пи суппат̣ивиддхам̣ хотӣти антамасо локийапан̃н̃а̄йапи паччайапат̣иведхо като хоти. имасса хи пуггаласса пан̃н̃а̄ сӣлам̣ паридховати, со пан̃н̃а̄паридхотена висесам̣ па̄пун̣а̄ти.

пама̄н̣ика̄ти пуггалесу пама̄н̣агга̄хака̄. памин̣антӣти паметум̣ тулетум̣ араханти. еко хӣноти еко гун̣ехи хӣно. пан̣ӣтоти еко гун̣ехи пан̣ӣто уттамо. там̣ хӣти там̣ пама̄н̣акаран̣ам̣. абхиккантатароти сундаратаро. пан̣ӣтатароти уттаматаро. дхаммасото ниббахатӣти сӯрам̣ хутва̄ паваттама̄нам̣ випассана̄н̃а̄н̣ам̣ ниббахати, арийабхӯмим̣ па̄пети. тадантарам̣ ко джа̄неййа̄ти там̣ евам̣ ка̄ран̣ам̣ ко джа̄неййа. сӣлава̄ хотӣти локийасӣлена сӣлава̄ хоти. йаттхасса там̣ сӣланти арахаттавимуттим̣ патва̄ сӣлам̣ апарисесампи нируджджхати на̄ма, таттха йутти вутта̄йева. ито паресу двӣсу ан̇гесу ана̄га̄мипхалам̣ вимутти на̄ма, пан̃чаме арахаттамева. сесаметтха вуттанайа̄нуса̄ренева ведитаббам̣. чхат̣т̣хам̣ утта̄наттхамева.